METIU 22 - KARANU KABI SAMTAM

Myiikapang takbai mah ndasam

¹ Jisunii ahnyii dakii ndasampii nlailoisii tamle,

² “Sating gam sazyii teinii mpounah sapfii mpou jangpii myiikapang mah takbai pyiikalei sagong hangninii takumle,

³ Sateichii ‘myiikapang takbaiki gong hailosii lat kalu meihang gotei maa lat tulosii mpouki kaleimeigo lang matu takle, nlenii ahnyiinii gongnyii sutakle.

⁴ Nlailoisii mpounii kikalei- mei kakimei dakii aitiisii lang matu takle; gong hailosii lat kalumeihang dateikii tamlo, Julo, Inii pyii-chii tang karam takbai tei tiikada bam takle; gumah twom madang ninado twomnah hangtei gibam takle, sateichii mahlyiihang tiidasang bam takle, myiikapang mah takbai kitei gonglo.’

⁵ Nlenii ahnyiinii teigotei mah kado lung hungsii poisei supii tat tutakle; hangninanii mpoumah luki, kaki hangninanii mpoumah li-laa katiini tat tutakle.

⁶ Sateichii kakimei hangteinii mpou mah kikalei mei gotei jumsii tii-nroupyii takle sateichii ahnyiigo girang aitakle.

⁷ Sagong tei hangkapii rarhii takle sateichii mpou mah saryiimei gotei lang matusanii meigo kagimei hang gotei tiimaga aitakle, ahnyii mah namdi teido mi rutoi malei takle.

⁸ Teito mpounii mpouki kalei- mei dakii tamle, ‘gumah myiikapang mah takbai tei tiikadabam takle, nlenii gonghailosii Inii lat kalumei hangtei gong haikajyii sutakle.

⁹ Teijangpiinii pwidi lamjang kadi hang kitei maasii gonyiinii kangou kangou hang gotei myiikapang mah takbaiki gong hailosii lat tulo.’

¹⁰ Teipiinii ki kaleimei teinii pwidi kadi hang kitei maasii kabigodo kashyii godo, ahnyiinii kangou hang gotei poi ndwi wotakle sateichii sabato kagongmei hangteinii myiika- pang bam tei tokryii takle.

¹¹ “Nlenii sagongnii sabato gong kalei meihang gotei julesii tat kaliit tinglang kak, myiikapang nat kai ka- sumei hangninii teikikii ngoutakle;

¹² teito sagongnii mpou dakii tamle, ‘Kangpiiwo nang myiikapang nat kaisupii aiki kadakumpii liit topo?’ Sateichii mpounii mah kado malhii wolak takle.

¹³ Teito sagongnii nga kangamei dateikii tamle, ‘Mpougo pi- bah reng peisii saba kamyii kiteikii toikai ailo, teibam kiteito mpounii ghii kagetsii hat tangle.’

¹⁴ “Kadapokii Saraanii mpou mah sating gam sazyiiki gong hailosii mei hangkago latsii leile, nlenii mei chengniikanii lat kalei tei lukaile.”

Aha kapyii mah kaang kito kachyiinhii katu

¹⁵ Teito Farasismei teinii maasii Jisugo kada takumpii mpoumah samtam kito maiwo tangpo katupii sam rashii takle.

¹⁶ Sateichii ahnyii- nii Herot tai kaswimeigo kaswisii ahnyii mah boumeigo lang magongsii tam matule, “Madhiikapyiipii, nangnii kasangle, sateichii Saraamah kasang pwidi tei kasang kasangpii ralipyiile sateichii mei kagodo hingmakle katu nyiinii tile, kadapokii nangnii mei-ju juleimakle.

¹⁷ Teipiinii nyiidakii tam seilo, nangnii kadalesii maningpo? Kaisar dakii aha kapyii ai ajai manii ajaimakpo?”

¹⁸ Nlenii Jisunii ahnyii mah lungchoi kashyii tei tiwosii tamle, “Kabijai katiimei, gonyiinii n-gu ka- dajangpii ajai juleipo?

¹⁹ Aha kapyii jangpii sanahgyii tei n-gu mangoulo!” Ahnyiinii sanagyii hangninii mpou- da poigong takle.

²⁰ Teito mpounii ahnyii dakii tamle, “Phyiibung ninado zei ai tamahpo?”

²¹ Ahnyiinii khekalatle, “Kaisar mahle.” Teito mpounii ahnyii dakii tamle, “Teitii leponii Kaisar mah tei Kaisar dakii sateichii Saraa mah tei Saraa dakii pyii ailo.”

²² Sateichii ahnyiinii ai shii wosek-kii sung gatakle, sateichii mpougo toisii tat tutakle.

Ringkakhii mah kaang kito kachyiinhii katu

²³ Ringkakhii katu ai galesii tam kalei Sadhumei teinii teipiinei mpouda gongsii n-nhiile,

²⁴ “Madhiikapyiipii, Moses-nii tambamle, ‘nah kaga sapfiimei hangninanii tai aileponii, mpou-tai karhiimeinii mpou-nou gotei manou wosii mpou jangpii atii- anah mbam tang karamle.’

²⁵ Aitoinii nyii kak ki sanamei sana leile; sung kating tingsangpii teinii nou tiisii taitakle, sateichii nah lungkasu taiswisii, mpou-nou tei mpou-tai ka- rhiipii dakii kaidek aitakle.

²⁶ Hangna kashang ninado hangtum kashangdo sateichii sana kashang katang tei teitiisii pat takle.

²⁷ Sateichii kalui luisang kito sapwi mpei tei taitakle.

²⁸ Teijangpii ringkakhii piinei leimik sapwi mpei tei ahnyii sana kak kito tapii-noule tangpo? Kadapokii ahnyii hangnii mpoupeigo manou takle.”

²⁹ Nlenii Jisunii ahnyiigo kheka- latle, “Gonyiinii ma-aitakle, dapo- dinchii gonyiinii kabi rasam ninado Saraa mah teimaham gotei tisu takle.

³⁰ Kadapokiiringkakhii kiteito ahnyiinii kalakna tiimakle sateichii ahnyiigo kalakna tiisii pyiimakle, nlenii ahnyiinii sating gamto sating gamlui hang takumpii leile.

³¹ Sateichii kataimei ringkakhii mah kaang kito,

³² ‘Inii Abraham, Isak ninado Jakob mah Saraale sii gonyii dakii Saraanii tam kabam tei gonyiinii fiimakde?’ Mpounii katai mei mah Saraa makle, nlenii karingmei mahle.”

³³ Sateichii meimoi teinii teitei shii wosek-kii ahnyiinii mpou mah ralikapyii tei sung gatakle.

Kadi kakhatsam

³⁴ Nlenii Sadhumeinii mah kado khekalatpei kalak tiisii mpounii ahnyiigo khepyii takle katu tei Fa- rasismeinii shii wosek-kii,

³⁵ Ahnyii kak kito Ajaitingshang kati ojamei hangninanii mpougo ajai jutang karam jangpii mpougo sam hangninii kachyiinhiile.

³⁶ “Madhiikapyiipii, ajaitingshang hang kak kito kadapii teinii kadi disangpiipo?”

³⁷ Teito Jisunii mpou dakii tamle, “ ‘Nangnii Bangpii go Saraago golung matum madumpii, rakot matum madumpii sateichii lungswi matum madumpii haisii lungsyii tang karamle.’

³⁸ Ainii kadi disang ninado karei kakhatsam teile,

³⁹ sateichii aitakumpii hangna kashang tei aile: ‘Nangnii goroinapii n-go lungkasyii takumpii nangnii goki tiinaniipa- meigo lungsyii tang karamle.’

⁴⁰ Ajaitingshang ninado Lungkaka- lingmei mah ralikapyii hangtei ai kakhatsam hangna kikii poi njabam takle.”

Krista mah kaang kito kachyiinhii katu

⁴¹ Farasismei hangnii ndwi kalei tinglang kak, Jisunii ahnyiigo sam hangninii kachyiinhiile,

⁴² “Krista mah kaang kito gonyiinii kadalesii maningpo? Mpou ai ta-nah Sapfii mpoupo?” Ahnyiinii mpoudakii tamle, “Mpou ai Devit nah Sapfii mpoule.”

⁴³ Mpounii ahnyii dakii tamle, “Teitiileponii, ‘Devitnii rangii lamto mpougo kada takumpii Bangpii latpo?’ Devitnii tamle,

⁴⁴ ‘Bangpiinii gu Bangpii dakii tamle: Inii n-go ngou karoumeigo gupi kangkii poikai kasuta, gu bah ajiilamto bamlo.’

⁴⁵ Devitnii mpougo ‘Bangpii’ lat leponii, Krista ai kada takumpiinii mpou nah sapfii mpou tangpo?”

⁴⁶ Sateichii mei kado mpougo sam hangninii kado khekalatpei wolak takle, sateichii teipiinei leimik sekpii meikado mpougo nlailoisii kachyii- nhii hingtakle.