METIU 17 - KARANU KABI SAMTAM

Jisu mah jaitalui kalikatu

¹ Sateichii leimik siiruk tai Jisunii mpougo kaswisii Pitar ninado mpou sanamei Jems ninado Jon go pangsii kasagoi zang hang- niniiki ahnyiigo sipiinii pangkhiile.

² Sateichii mpounii ahnyii doito jai talui kali takle sateichii mpou jutei leimik takumpii vatakle, sateichii mpoumah peimani tei kava takumpii haranou takle.

³ Sateichii julo, Moses ninado Ilaijah tei ahnyiida gongsii mpougo kaswisii sam rashiisii bam takle.

⁴ Teipiinii Pitarnii Jisudakii tamle, “Bangpii nyiinii aiki kalei ai bile; nangnii mazhiisei lepodinchii, Inii aikikii dwipei ki, gojangpii hangninii, Moses jangpii hangninii, sateichii Ilaijah jangpii hangninii tiile.”

⁵ Mpounii tam leibangpii julo, vakabi mongjyii hangninanii ahnyiigo gomnei wotakle, sateichii julo, mongjyii kiteito rok hangninanii tamle, “Ai ai Inii lungkasyii gunah sapfii mpou teile; Inii mpougo hangkapii lung mangle, gonyii mpounii katam tei shiilo!”

⁶ Boumeinii roktei shii wosek-kii hangkapii hingtakle sateichii ju makumpii sazyii koumang takle.

⁷ Nlenii Jisunii tatpat ahnyiigo dengsii tamle, “Gungtu wolo, hingsulo.”

⁸ Ahnyiinii rajang matu kaju tinglang kak Jisu roina supiinii meikagodo ahnyiinii ngousu takle.

⁹ Sateichii ahnyiinii zang gamto aitiisii kahum tinglang kak, Jisunii ahnyii dakii tamle “Meinah sapfii mpou teinii katai kito ringkhii kasuta meida kado gonyiinii ngou kalu tei tam mpat sulosii kakhatpyii takle.”

¹⁰ Teito boumei teinii mpou dato n-nhiile, “Teitiileponii ajaitingshang kati ojamei teinii Ilaijahnii gongrei tang karamlesii kadajangpii tampo?”

¹¹ Mpounii khekalatle, “Ilaijahnii reipii gongsii mpounii mahlyii hang tiikada tangle, kasangle,

¹² nlenii Inii gonyii dakii tamleile, Ilaijahnii gong takle sateichii ahnyiinii mpougo timakle, nlenii ahnyiinii kamarei tei mpou dakii tiitakle. Teitakumpii meinah sapfii mpou teido ahnyii bah kito kamage kalak tei leh tangle.”

¹³ Teito mpounii Jon dwi mpum kapyiipii mah kaang kito ahnyii dakii tam leile katu tei boumeinii tiwo takle.

Sara kashyiinii kaswi kalei nahmei hangniniigo tii mbikapyii

¹⁴ Sateichii ahnyiinii meimoida kagong tinglang kak mei hangni- nanii mpouda pat kok-kumsii tamle,

¹⁵ “Bangpii, gunah sapfii mpougo lungsyii pyiilo! Kadapokii mpou tai-taipi tusii hangkapii kamagesii bam takle, kadapokii mpou adwi amiki tak-takliitle;

¹⁶ Sateichii Inii go boumei dakii mpougo pang gongle, nlenii ahnyiinii mpougo tii mbipei wolak kiile.”

¹⁷ Jisunii khekalatle, “Oh kama- lum kaga ninado karampou mei-ha, Inii kadatakii gonyiigo kaswisii bam tangpo? Inii gonyiigo kadatakii leh njoi tangpo? Mpougo aiki guda pang gonglo.”

¹⁸ Sateichii Jisunii sara kashyii gotei n-gisii kakhatle, teito sara kashyii teinii nah sapfii mpou dateito tat pat-to takle sateichii nah sapfii mpou tei teisek-kii biwo takle.

¹⁹ Teito boumei teinii Jisuda makumpii gongsii tamle, “Nyiinii ai ai baatoi pei kalak ai kadapei jangpiiniipo?”

²⁰ Mpounii ahnyii dakii tamle, “Gonyii mah kamalum kacheng jangpiiniile, kadapokii Inii gonyii dakii kasangpii tam leile, gonyiinii njang-gaiti lwirou langkii kamalum tei leipodinchii, gonyiinii zangtung aigo tam tangle, ‘aikito luki tat tulo,’ sateichii teiteinii tat tutangle; sateichii gonyiinii tiipei kalak mah kado gatangle.

²¹ Nlenii aikakum ai Saraa go kariita ninado malot karyii teipii supiinanii patsang patlakle.”

Jisunii mpoumah katai kaang kito nlailoisii reipii katam

²² Ahnyiinii Galili kito ndwi kalei kak, Jisunii ahnyii dakii tamle, “Meinah sapfii mpou gotei mei bah kikii pyiitoi ailezii takle,

²³ sateichii ahnyiinii mpougo gitangle ninado leimik hangtum kasang piinei mpounii ringkhii tangle.” Sateichii ahnyii hangkapii swi shyiitakle.

Saraa kamata ki mah aha kapyii

²⁴ Ahnyiinii Kaiparnam ki kagong tinglang kak Saraa kamaning ki aha kahameinii Pitar-da patsii tamle, “Gonyii mah Madhiikapyiipiinii aha pyii leimakde?”

²⁵ Mpounii tamle, “Pyii leile” sateichii mpounii ki gong sek-kii, Jisunii mpou dakii reipii tam takle: “Nang kadalesii maningpo? Sazyii pouryii mah sagong hangnii tadato aha poi leipo? Sazyii mei dato manii spumnah datopo?”

²⁶ Mpounii ‘spumnah mei dato’ lesii katam kak, Jisunii mpou dakii tamle, teitiileponii, “sazyii-nahnii pyii kajyii makle.

²⁷ Nlenii nyiinii ahnyiigo rakarhii tei tiimatulak tang karam jangpii nang dwijai kitei maasii kaa chyiitulo, sateichii kaa mai karei tei chyii mpatlo, sateichii nangnii kaa tei mwi pak jusekchii Sekhel hangninii ngoutangle; teitei poisii ahnyii dakii gumah ninado gonyii mah aha tei pyii ailo.”