METIU 14 - KARANU KABI SAMTAM

Jon dwi mpum kapyiipanii katai

¹ Teitinglangki Sagong Herotnii Jisu mah nha tei shii wosii, mpouki kaleimei dakii tamle, “Jon dwi mpum kapyiipii tei aile,

² mpou ai katai kito ringkhii wotakle; teijangpiinii mei tiikalak tha kadi hang katii mah teimaham tei mpou dato leile.”

³ Kadapokii mpou sanapii Filip nou, Herodias jangpii Herotnii Jon go jumsii reng pei wosii kabangki lungkii kaile.

⁴ Kadapodinchii Jon nii mpou dakii, “Nangnii mpoupeigo manou katu ai ajai maklesii tam aitakle!”

⁵ Sateichii mpounii ahgo girangnyii kado mpounii Jehudimei gotei hingtakle, kadapokii ahnyiinii mpougo Lungkakalingmei hangninii lesii poi leile.

⁶ Nlenii Herotgo kalung piinei leimik gong sek-kii, Herodias nah sapwi mpei teinii ahnyii doito takoi tiimangou takle, sateichii Herot tei hangkapii dzyii ranga takle,

⁷ teipiinii mpoupeinii kata kara kakhang tei mpoupeigo mpounii pyiitangle katupii riishii tei njasii mpounii tam aitakle.

⁸ Teito mpou pwinii ralikapyii teitei swisii mpoupeinii tam takle, “Jon dwi mpum kapyiipii mah phyii- bung tei kok hangninii kikii kaiwosii, aikito ninado aitoi n-gu pyiilo.”

⁹ Sagong tei swi kamage takle, nlenii mpou kanghemei hang doito mpounii pyii tanglesii riishii tiikabam jangpii mpoupeinii kamarei tei pyii ailo katupii mpounii mwija pyii aitakle.

¹⁰ Teipiinii mpounii mei langkai pyiisanii kabang ki lung teito Jon mah phyiibung tei baa-dang aitakle;

¹¹ sateichii mpou mah phyiibung tei kok hangninii kikii kai wosii poiliit sapwi mpei gotei pyiitakle, sateichii mpoupeinii ah pwida poipat takle.

¹² Sateichii mpou mah boumei teinii gongsii katai pumtei poisii tiigoi aitakle sateichii ahnyiinii maasii Jisu dakii tam takle.

Jisunii mei thang mangiigo pyii-kachii

¹³ Jisunii ai shii wosek-kii teibam kiteito malyii hangninii tong wosii kamakum bam hangniniiki sisii mpouroinapii tat tutakle; nlenii mei- moinii teitei shii wosek-kii ahnyiinii namdi namdi kito pipii mpoutai swi-wotakle.

¹⁴ Sateichii Jisunii malyii lungto tatpatsii meimoi gotei ngou wosek-kii mpou lungtei ahnyiigo lungkasyiipiinii tokryii takle satei- chii mpounii ahnyii mah ra katchii tei tii-mbipyii takle.

¹⁵ Teipiinei tingkhiilam tei mpou boumei teinii mpouda gongsii tamle, “Ai ai kamakum bamle, sateichii tinglang ritakle, meimoi ai nam namki maasiinii ahnyii jangpii chiitak lyiimatu tang karam jangpii langtoi ailo.”

¹⁶ Jisunii tamle, “Ahnyiigo langtoi sudo bile, gonyiinii ahnyiigo mah kachii kasak pyiilo.”

¹⁷ “Nyii mah tiirok pang mangii ninado kaa pakna aisupiinii aiki samah kado gale.”

¹⁸ Teito mpounii tamle, “Teitei aiki guda poipatlo.”

¹⁹ Sateichii mpounii meihang gotei hiinhii phyiiryii bamlosii mwija pyiisanii, tiirok pang mangii sateichii kaa pakna tei poisii sating gam rajang matusii satoi pyiitakle. Sateichii tiirak wosii tiirok hangtei boumei dakii pyiisanii boumei teinii meihang dakii pyii takle.

²⁰ Sateichii ahnyii hangnii chii wosii moi maghii takle, sateichii ahnyiinii kamasak kapak kapang hangtei poi ndwi katu kak, razyii keariisiinakhii katokryii tei poi ndwi wotakle.

²¹ Sateichii ahnyii chiikalu mei tei sapwimei ninado nahmei hang go fiihaisupii sapfiimei thang mangii kiile.

Jisunii dwi phyiiryiito katat

²² Sateichii mpounii meimoigo langtoi kalei kak, Jisunii mpou boumeigo malyii hangninii lung liit malu wosii dwijai lugang tei doi reisii tat matu takle.

²³ Sateichii mpounii meimoi gotei langtoi kaleitai, riita tang karam jangpii mpou roinapii zang hangninii gam tatpi takle, sateichii tingkhiilam gong sek-kii mpouroinii teibam kito leitakle;

²⁴ sateichii aitoi tinglang ai ting- kainii gwimatu n-noukalei dwi teipii rotsii malyii tei dhiisii dwijai kito leitakle dapodinchii tingkainii teigotei gwisii bamle.

²⁵ Tingchoi pung tum-to pung siiruk tinglang kak ki mpounii dwijai phyiiryiito pipii tatsii ahnyiida gongle.

²⁶ Nlenii mpounii dwijai phyiiryiito tat kalei tei ahnyiinii ngou wosek-kii, ahnyii tei hang- kapiinii hingtakle, “Ai ai mei-maa lesii tamsii,” ahnyiinii saramsii teisii saa takle.

²⁷ Nlenii Jisunii teisek-kii ahnyii dakii tamle, “I-le, hingsulo.”

²⁸ Sateichii Pitarnii mpougo khe- kalatle, “Bangpii, ai ai nang kasang leponii, Inii dwi phyiiryiito goda pat tang karam jangpii n-gu mwija pyiiseilo.”

²⁹ Mpounii tamle, “Patlo.” Teito Pitar nii malyii lungto tatpat tosii, dwi phyiiryiito pipii tatsii Jisuda pat takle,

³⁰ nlenii mpounii tingkai tei ngou wosek-kii, hingtakle sateichii dwikang ngalum liit tutakle, “Bangpii, n-gu keipyiilo,” sii mpounii saa sii tamle.

³¹ Teisek-kii Jisunii bah hampat mpougo jum wosii mpou dakii tamle, “O, kamalum tang kasumei, dajangpii nang maning kariirhii leipo?”

³² Sateichii ahnyiinii malyii lung liit to-sek-kii tingkai tei gwisu takle.

³³ Sateichii malyiilungto kaleimei teinii “Kasangpiinii, nang Saraa nah sapfii mpou teile,” sii ahnyiinii mpougo mata takle.

Genesaret kito Jisunii rakani meigo tii mbi kapyii

³⁴ Ahnyiinii dwijai tei ka majupat tosii Genesaret sazyiiki gong takle.

³⁵ Sateichii bam teiki meihang teinii ti-wosek-kii, teimah bang kito kalei bamlyii kikii sam tei tam mangousii katchii kanhii mei hangtei mpouda pang gongtakle;

³⁶ Sateichii ahnyiinii mpoumah peikaa katangdo rakani- meigo deng matulosii khang takle, sateichii deng kalumei hang gotei tii mbipyii takle.