MATIMANGOU KAPYII 9 - KARANU KABI SAMTAM

¹ Teito mangii kashang sating gamlui teinii ahmah kachem tei kongtakle sateichii sating gamto sageiti hangninii sating gamto sazyii tak kamang tei Inii ngoutakle. Kathok nlai kaga ahom mah chabyii tei ahgo pyiitakle,

² Sageiti teinii kathok nlai kaga ahom bamtei laat mpatpyii takle, sateichii mi mpung kadi kito pat kalei takumpii mika tei teikito pat takle; katok nlai kaga ahom kito pat kalei mika teipiinii leimik ninado tingkai hang gotei tii m-myii aitakle.

³ Sateichii mika kiteito sazyii pouryii kacheng hang gongtakle; sateichii sazyii pou- ryiimah aga nrekmah teimaham takumpiinii, ahnyiigodo teimaham tei pyiitakle.

⁴ Sateichii ahnyiimah saiphang gam teikii Saraamah seal kagamei hang go teipou teinii sazyii pouryiimah sanhii mak-kii ruibang mak-kii bang kamadek kata hang- ninii kagodo ahnyiinii tiimashyii sulosii ahnyii dakii tampyii takle.

⁵ Kacheng teinii ahnyiigo gitat lakle, nlenii ahnyiigo sakhii mangii tiikamage tang karam jangpii mazhii takle, sateichii ahnyiinii tiikamage katu tei aga nreknii meigo machyii teipii karou kak kamage katu takum takle.

⁶ Sateichii tei tinglang kak meinii kataigo fii kido teitei doulakle; sateichii ahnyiinii hangkapiinii taitunyii tangle, nlenii katai teinii ahnyii dato pakga tangle.

⁷ Kacheng hangmah jailui tei saryii jangpiinii tiikada kabam takoi hang gotei raile; sateichii ahnyiimah phyiibung gam teikii sonapii katii sagong mah phyiihung choikalei takumle; sateichii ahnyiimah juhang teinii meinah mah jupa takumle.

⁸ Ahnyiimah phyiitaam teinii lakpwi- meimah phyiitaam takumle, sateichii ahnyiimah ghii teinii Nongsamah ghii takumle.

⁹ Ahnyiimah takou hangtei sagyii piinii katii kokryii takumpii pungle, ahnyiimah kashii khoiteinii takoi garyii hangkanii saryiilam tat kalei khoi takumle.

¹⁰ Aga nrek takumpii ahnyiido mee leile, machyiido leile, sateichii ahnyiimah mee kitei meinahgo sakhii mangii tchii matutang karam mah teimaham tei leile.

¹¹ Ahnyii hang phyiiryiito kathok nlai kaga ahom mah sating gamlui teinii sagong takumpii leile; Ah zei teinii “Abaddon” sii Hebru latpii latle sateichii Grik latpiinii “Appolion” sii latle.

¹² Karei mage tei maju aitakle; julo, kamage hangna gong tang karam leile.

¹³ Teito saruk kashang sating gamlui teinii ahmah kachem tei kongtakle, sateichii Saraa doito kalei sonapii katii Saraago pyiitoi tang karambam mah ska madai teito rok hangninii teinii,

¹⁴ Kachem poikalei saruk kashang sating gamlui dateikii, “Euphrates” karyii kadi kiteikii reng kuikabam sating gamlui madai gotei mpat ailo, sii tam kalei tei Inii shiitakle.

¹⁵ Sateichii pung leimik, sakhii ninado tingkum tei jang tiikada kabam sating gamlui madai gotei, meinah mah njai hangtum kito njai hangninii gitat matutang karam jangpii, laat mpat aitakle.

¹⁶ Sateichii takoi saryiimei tei daziikapo katu Inii shiitakle, tei teinii million hainale.

¹⁷ Sateichii madhang kapyii kito takoi ninado takoigam tongkalei meihang gotei aitiisii Inii ngoutakle: katunii takhoi gam tongkalei meihang teinii takou gamkii kokryii tei mi takumpii kaghang, Sapphire takumpii mong- jai, sulphur takumpii kafiilang, sa- teichii takoimah phyiibung hangtei Nongsamah phyiibung takumle, sateichii ahnyiimah mwi kiteito mi mika ninado sulphur patle.

¹⁸ Ahnyiimah mwi kito kapat mi mika ninado sulphur ai Saraa rahum hangtum aipii meinah mah njai hangtum kito njai hangninii tiitat aitakle.

¹⁹ Kadapokii takoi hangmah teimaham teinii ahnyiimah mwi ninado mee hang kiteito leile; ahnyii- mah mee hangtei sanhiigo raile, sateichii phyiibung pungle ninado teihang teipiinii meinahgo deng matule.

²⁰ Sateichii Saraa rahum aihang ainii tiirang kasu mashak kalei meihang tei ahnyii bahpiinii katii tha hang kiteito lung kalimakle, mak-kii ngoudo ngoukasu shiido shii kasu, tatdo tatkasu, sona mah, sanah raguibamah, maikateeng kuitumah, kuitu ninado tingmah, tingtumah param hang go ninado sara kashyii hang go riitasii kalei tei toimakle;

²¹ mak-kii ahnyiinii meigo kagi kito, ashoi kajum kito, sapwimei sapfiimei kashyii kahong tha katii kito, mak-kii mah karaga kito ahnyiinii lung kalimakle.