MATIMANGOU KAPYII 6 - KARANU KABI SAMTAM

Seal hang kalaat

¹ Aitoinii Jaonah teinii seal sana kak kito seal karei tei tiipaksii kalaat tei Inii ngoutakle, sateichii karing kounah madai kak kito hangninanii sating katuimah rok takumpiinii, “Patlo!” sii katam tei Inii shiitakle.

² Sateichii Inii ngou- takle, sateichii julo, takoi kaha hangninii sateichii teiphyiiryiito tongkalei ahteinii kokpi hangninii poileile, sateichii ahgo sagong phyii- hung tei choikaipyii takle, sateichii ahnii ngamsii ngamsii sateichii ngam tang karam jangpii tatpat takle.

³ Sateichii ahnii seal hangna kashang tei kalaat tinglang kak, hangna kashang karing kounah teinii, “Patlo,” sii katam tei Inii shiitakle.

⁴ Sateichii takoi kaki hangninii patle, teiteinii kaghangle, sateichii teiphyiiryii tongkalei ahgotei sazyii pouryiito kamajung poitoi matutang karam jangpii sateichii hangninanii hangniniigo kagi matu- tang karam jangpii kamazhii tei pyiitakle sateichii saryiikhang kadi hangninii ahdakii pyiitakle.

⁵ Sateichii ahnii hangtum kashang seal tei kalaat tinglang kak, Hang- tum kashang karing kounah teinii “Patlo!” sii katam tei Inii shiitakle. Sateichii julo takoi katek hangninii sateichii teiphyiiryii tongkalei ahbah kitei masui chyii kajupii hangninii leile.

⁶ Sateichii karing kounah madai kak kito pat kalei takumpii, “Gihu ser hangniniigo sanah dinar hangninii sateichii achyiiti ser hangtumgo sanah dinar hangniniile, nlenii thao ninado darkhati jou gonii tiimashyii sulo” sii katam tei Inii shiitakle.

⁷ Sateichii ahnii madai kashang seal tei kalaat tinglang kak, madai kashang karing kounah teinii “Patlo!” sii katam tei Inii shiitakle.

⁸ Sateichii Inii ngoutakle, sateichii julo, takoi hadak katu hangninii sateichii teiphyiiriito tongkalei ahmah zei tei kataile, sateichii kataimei mah sazyii teinii ah-tai swileile satei- chii sazyii pouryii njai madaimah njai hangninii phyiiryiito teimaham katunii, saryiinii, atak kateengnii, rahum rapi kashyiinii sateichii sazyii pouryiimah saram kounah hangnii gitat matutang karam jangpii ahnyii dakii pyiitakle.

⁹ Sateichii ahnii mangii kashang seal tei kalaat tinglang kak, Saraamah samtam jangpii sateichii ahnyiinii pyiikalei sakchyii tei jangpii gikalei ahnyiimah rakot hangtei pyiikatoibam kang teikii Inii ngoutakle;

¹⁰ Ahnyiinii rok sagoisii saale, “Kamatei ninado kadi kathang Bangpii!” Sazyii pouryii lung kalei- meigo tinglang kada thakii samtak tei tiisupii sateichii nyiigo kagimei- mah powtei ruisupiinii bam tangpo?

¹¹ Teito ahnyii mei nsang nsang go paijou pi rot katang kaha pyiitakle. Sateichii ahnyiigo takumpii gitang karam, ahnyiigo kaswisii kikaleimei tiisii kaleimei hangdo ahnyiimah kangsanameido gikat kasuta, ahnyiinii aitoi tinglang shangniikii jangpii ntak matulosii ahnyii dakii tampyii takle.

¹² Sateichii ahnii saruk kashang seal kalaat tei Inii ngoutakle. Sateichii malyii kachyii kadi pat takle, leimik teinii peitek takumpii tek takle, sateichii sakhii teinii zai takumpii ghang takle.

¹³ Sateichii tingkai katei teinii gwi ka-nlai tinglang kak kadhiit-ti kamadek hang go kadhiitbang gamto gwi ka m-mang takumpii sating gam sageiti hang teinii sazyii pouryii takmang tangle.

¹⁴ Sateichii larekgum kajui kalei takumpii sating tei gatutakle sateichii zang hang goteido dwipii ska madai magui katu sazyii hang godo mpou mpoumah bam kiteito poitoi takle.

¹⁵ Teito sazyii pouryiimah sagongmei hangnii, sateichii saryii kito aphyii kasatmei hangnii, kanimei hangnii, ninado katei kamaham mei hangnii, kikaleimei hangnii sateichii laat kabam mei hangnii zang kuitu karung ninado kuitu kadi kak kito mbeile.

¹⁶ Ahnyiinii zang zang dakii ninado kuitu kadi kadi dateikii tamle, “Nyii phyiiryii takmangsii sagongbam gamto bam kalei ah doiteito, sateichii Jaonah mah rakarhii kiteito nyiigo kabai pyiilo,

¹⁷ kadapokiiahnyiimah rakarhiimah leimik kadi tei gongtakle sateichii tanii teidoi teito satto buipo?”