MATIMANGOU KAPYII 4 - KARANU KABI SAMTAM

Sating gamto kamata

¹ Sam hang aitaito Inii jule sateichii takam hangninii sating gamto laatbamle, sateichii Inii kashii karei rok teinii kachem takumpii n-gu karashiisii tamle, “Aiki tat pilo; sateichii aitaito pat tang karam hangtei Inii n-go mangoule.”

² Binasek-kii rangiinii n-gu jum wotakle, (I-ai rangii kito leidile) sa- teichii julo, sating gamkii sagongbam hangninii dung bamle, sateichii sagongbam gamtei mei hangninii bamle.

³ Sateichii bam kalei ahgotei kaju kak mai kateeng kuitu Jasper ninado Carnelian go raile sateichii Emerald go karai tuipiirok teinii sagongbam gotei maguisii bamle.

⁴ Sateichii sagongbamgo baangmagui kabam nitei sagongbam makaisii madai nkhii leile; sateichii sagong- bam phyiiryii tei peimani kaha kai- kalei sateichii ahnyiimah phyiibung gamtei sona mah sagong phyiihung choikalei katingmei mei makaisii madai nkhii bam kalei tei Inii ngoutakle.

⁵ Sateichii Sagongbam kiteito sating kapeek katu rok hang, sateichii sating katwi hangkapii patle. Sateichii sagongbam doitei Saraamah rangii sana tiisii kalei mi vakalei mi sana leile;

⁶ Sateichii sagongbam doitei ralekgo karai malikpeek katu dwijai takum katu leile, sateichii sagongbam doitei ninado teigo magui kabang tei atai adoi mikpiinii katokryii karing kounah madai leile.

⁷ Sateichii karing kounah kareipii tei nongsago karai, hangna kashang teinii twom madang go karai, hangtum kashang teinii meinah jugo karai aju kapung sateichii madai kashang teinii jungkalei kalang ruinahgo raile.

⁸ Sateichii karing kounah madai tei kashii sarukruk pungle, sateichii lungdo poudo mikpiinii tokryiile; sateichii ahnyii teinii tinghum tingna ntak supii lhii tiile: “Kamatei, kamatei, kamatei, ndoushang, tingneishang ninado gongtang karam Ah ai Bangpii Saraa kadi teile!”

⁹ Sateichii karing kounah hang- teinii sagongbam gamto bam kalei, kalui gasii ringkalei ah dakii pumtei kava, sadzyii ngariit katii ninado hakalang kapyii tinglang kak,

¹⁰ katingmei mei makaisii madai nkhii teinii sagongbam gam teito bam kalei ahdoi teito koumangsii, kalui gasii ringkalei ahgo matale, sateichii ahnyiimah sagong phyiihung tei sagongbam doiteikii rat toi aitakpokii lhii tiile.

¹¹ “Nyii Bangpii, nyiimah Saraa, gomah pumtei kava sadzyii ngariit katii, ninado teimaham tei doumajyiile. Kadapokii nangnii mahlyiihang tii mpatpyiile, sateichii gomah kamaning kamazhii kito mahlyiihang ringleile ninado tii mpatpyii takle.”