MATIMANGOU KAPYII 22 - KARANU KABI SAMTAM

¹ Teito teimah namdimah pwidi kadi sum teito Saraamah ni- nado Jaonah mah sagongbam kiteito, dwi kamating kamaleek takumpiinii vakatu, karingmah dwimah karyii longkalei tei ahnii gudakii mangou takle.

² Sateichii teimah karyiiku kanato riiti jat keariisiinakhii mati kalei ruibang tei leile; teimah riiti tei sakhii mata mati leile, sateichii teimah ruibang nhii teipiinii lui- hangmah ra katchii tei tii mbipyii tang karam jangpiiniile.

³ Sateichii teiki tei kasheeng katu tei samah kado gatangle, nlenii Saraamah ninado Jaonah mah sagongbam tei namdi teilungto leitangle, sateichii ahmah kikaleimei hangteinii ahgo mata tangle;

⁴ Ahnyiinii ahmah ju tei ngoutangle ninado ahmah zei tei ahnyiimah seiphang gam leitangle.

⁵ Sateichii tinghum katu tei leiloi lakle. Ahnyii jangpii thaomimah mak-kii leimikmah kava tei kabi gale, kadapokii Bangpii Saraa teinii ahnyiimah kava tei tangle, sateichii ahnyiinii kalui gasii sagong tiisii magong tangle.

Jisunii gongtang karam

⁶ Teito Ahnii gudakii tamle, “Samkang hang ai malum kamajyii ninado kasangle; sateichii lungka- kalingmei mah rangii hangmah Bangpii Saraa teinii madousupii pat tang karam hangtei ahmah kikalei- mei hang dakii mangou matu tang karam jangpii ahmah sating gamluigo lang mpat takle.”

⁷ Sateichii, “Julo! I-kalangsii gong tangle! Larek aikito saa mpat kabam sam hang gotei ryiikalu ah teinii sadoibile!”

⁸ Sateichii aihang go shiikalu ninado ngoukalu ah tei Jon I-le. Sateichii aihang ai Inii shii wosek-kii ninado ngou wosek-kii, teihang tei gudakii mangou kapyii sating gamlui pibang tei Inii riita tang karam jangpii koumang takle.

⁹ Nlenii Ahnii gudakii tamle, “Nangnii teitei tiilak tang karamle! Inii n-go go kang- sanamei lungkakalingmei hang go ninado larek aimah samkang hang go swisii kaleimei hang go njoi katu kikaleimei hangniniile, Saraago matalo.”

¹⁰ Sateichii ahnii gudakii tamle, “Larek aikito saa mpat kabam sam hangtei seal kai aisulo, kada- pokii tinglang tei natakle.

¹¹ Kashyii tha tiikaleimei teinii kashyii tei tiijousii leimatulo, sateichii kahong- mei teinii hongsii leijou matulo, sateichii kasang kamajyiimei hang- teinii kasang tei tiijousii leimatulo, ninado kamateimei hangteinii matei- jousii leimatulo.”

¹² “Julo, I-kalangsii gong tangle; sateichii gumah alangh tei meihang dakii mpou mpoumah tiikabam tha taiswisii pyiitang karam jangpii n-gu kaswisii langhtei Inii poigong tangle.

¹³ Inii Alpha ninado Omega, karei ninado akat, kahou ninado kalui teile.”

¹⁴ Ahnyiinii karingmah ruibang dateito riiti chiitang karam majyii tei doukabui tiisii sateichii namdi lung tei takam kamjao kito liit kabui tiisii ahnyiimah peijou kathang tei shyii matei kaleimei hangtei sadoibile.

¹⁵ Nlenii chyiihang, ashoi kapoi- meihang, sapwimei sapfiimei kashyii kahong tha katiimeihang sateichii meigo kagi meihang, sateichii tingtu paramgo kamatamei hang ninado kashyiigo kamarei, kashyii tha katiimei hangtei sabato leile.

¹⁶ “Jisu, Inii Charsh hang jangpii gonyii dakii aihang ai sakchyii pyiimatu tang karam jangpii gumah sating gamluigo lang magong takle. Inii vakabi sagei tingtang pwi, Devit mah maa ninado tatreng teile.”

¹⁷ Rangii teiniido amyiipeipwi teiniido tamle, “Gonglo,” sateichii shii sii kalei ah teinii, “Gonglo” sii tam matulo. Sateichii saryiisii kalei ah teinii gong matulo, kamareimei hangteinii karingmah dwi tei matapii sak matulo.

Kalui sam

¹⁸ Larek aimah saa ka-mpat samhang go shii kalumei hang dakii Inii sakchyii pyii leile: mei kata hangninanii sam hang aikikii kai mpam leponii, Saraanii larek ai- lungkii ryii kabam sararahum hang tei ah dakii kai mpam pyii tangle.

¹⁹ Sateichii mei kata hangninanii ai saa ka mpat sam mah larekmah samhang kiteito poitoi aileponii, Saraanii karingmah ruibang kito ninado kamatei namdi kiteito katunii larek ailungto ryiikai kabam ki teito, ahmah njai tei poitoi aitangle.

²⁰ Aihang dakii sakchyii pyii kalei ah teinii tamle, “Nle, I-kalangsii gong tangle.” Amen, gongpyiilo, Bangpii Jisu!

²¹ Bangpii Jisumah jumage kati tei kamateimei hang go kaswipyii matulo, Amen.