MATIMANGOU KAPYII 20 - KARANU KABI SAMTAM

Tingkum tangkii lung tang karam

¹ Sateichii kathok nlai kaga ahom mah chabyii ninado sagyiireng kadi bah kikii poikalei sating gamlui hangninanii sating gamto kahum tei Inii ngoutakle.

² Sateichii ahnii mwigatpwi, peipao sanhii katunii, sara kashyii mak-kii seitan, gotei jum wosii, tingkum tangkii jangpii ahgo rengpeinei sanii,

³ Kathok nlai kaga ahom lungkii toikai aitakle, sateichii tingkum tangkii tei sang kasuta ahnii luihang go chuisii hem matulak tang karam jangpii chabyii kai aisii ah gamkii seal kai aitakle. Aitaito ahgo tinglang shangniika jangpii mpat tang karamle.

⁴ Sateichii sagongbam hangtei Inii ngoutakle, sateichii teigamto bam kaleimeihang dateikii samtak katii- mah teimaham tei pyiitakle. Satei- chii Jisumah sakchyii kapung jangpii sateichii Saraamah samkang jang- piinii phyiibaatoi kaleimei hangmah, ninado saramkownahgo mak-kii ahmah tingtu paramgo mata kasu ninado ahnyiimah seiphang gamkii mak-kii bah gamkii siiti tei doukasu ahnyiimah rakot hang gotei Inii ngoutakle; sateichii ahnyiinii ring- khiisanii, Kristago kaswisii tingkum tangkii magong takle.

⁵ Tai kalei ka- mashak kakimei hangteinii tingkum tangkii tei sang kasuta ring gong- makle, ai ai karei ringkakhii teile.

⁶ Karei ringkakhii kito njai poi njoi katumei tei sadoibile ninado mateile; tei kakum mei phyiiryii teito hangna kashang katai teinii teimaham gale; nlenii ahnyii teinii Saraamah ninado Kristamah kanat kajum atingmei tiitangle, sateichii ahgo kaswisii tingkum tangkii magong tangle.

Seitan go kangam

⁷ Sateichii tingkum tangkii tei sang sekchii, seitan gotei ahmah kabang kiteito laat mpat tangle,

⁸ sateichii sazyii pouryii saka madaito kalei luihang, Gog ninado Magog go kasang kasu teipii chuisii hem tang karam jangpii ninado saryii kikii poi ndui tang karam jangpii pat tangle. Ahnyii teinii dwi- jaimah kangneng jyiika moitangle.

⁹ Sateichii ahnyiinii sazyii pouryii hangki marouhou patsii kamateimei hangmah bamni ninado lungkasyii namdi gotei bang wotakle; nlenii sating gamto mi humsii ahnyiigo rutoi aitakle.

¹⁰ Sateichii ahnyiigo kasang kasu teipii chuisii hem kalu seitan gotei, saramkownah teiniido kasang kasu lungkakalingmei teiniido kalei, mi ninado sulphurmah mi jailungkii toikai aitakle, sateichii ahnyiigo kalui gasii tinghum tingna tiikamage tangle.

Kalui samtak katii

¹¹ Sateichii sagongbam kadi kaha hangninii sateichii teiphyiiryiito bam kalei ah gotei Inii ngou takle, Ah doi teito sating ninado sazyii teinii pakga takle, sateichii ahnyii jangpii bamtei dousutakle.

¹² Sateichii kataimei- hang, kadi kacheng, sagongbam doi teito sat kalei tei Inii ngoutakle; sateichii larek hangtei laat mpat takle, sateichii larek kikii hangninii karingmah larek bung tei laat mpat takle. Sateichii kataimei hang gotei ahnyiimah tha taiswisii larek hang kikii ryiikai kabam taiswisii samtak tiitakle.

¹³ Sateichii dwijai teinii ahmah katai tei mpat aitakle. Katai ninado katai sazyii teiniido ahnyiinii jumkalei katai tei mpat aitakle, sateichii meihang gotei ahnyiinii tiikabam tha taiswisii samtak tiita- kle.

¹⁴ Sateichii katainei kataimeimah sazyii gotei mi mah jailungkii toikai aitakle. Ai mi mah jai ai, hangna kashang katai teile.

¹⁵ Sateichii karingmah larekbung lungkii mei kata hangniniimah zei ryiikabam tei dousuleponii, ah gotei mimah jailungkii toikai aitakle.