MARK 8 - KARANU KABI SAMTAM

Jisunii mei thang madaigo pyii-chii katu

¹ Teitinglang kaktei meimoinii gong ndwiloi wotakle, sateichii ahnyiinii mah kado kachiipii gatakle, teito Jisunii mpouboumeigo mpouda lat magongsii tamle,

² “Inii meimoigo ngousii lungsyii takle, kadapokii ahnyiinii n-gu kaswisii kalei tei leimik hangtum pat takle sateichii ahnyiinii kachiipii mah kado gatakle.

³ Sateichii Inii ahnyiigo pyiichii supii kilamkii langtoi aidinchiinii ahnyii ai pwidilamto malhii tang takle, dapokii ahnyii mei kangkanii kadhii lamto gongle.”

⁴ Teito mpouboumeinii mpougo khekalatle, “Dakumpii mei hang- ninanii mei aizii-zii aigo mahpwizyii sumto baiwo tangpo?”

⁵ Jisunii ahnyiigo n-nhiile, “Go- nyiida tiirok pang kadazii leipo?” teito ahnyiinii tamle, “Sana.”

⁶ Teito Jisunii meimoi gotei sa- zyiito bamlosii tam kakhatle, sateichii mpounii tiirok pang sana tei poi wosii, Saraago hakalang tamsii, tiiraksii jailosii mpou-boumei dakii pyiitakle, teito ahnyiinii meimoi da- kii jaipyii takle.

⁷ Sateichii ahnyiinii kaa pak kacheng chengniikado bamle, Jisunii satoi tei pyiisii aido meimoi dakii jailosii pyii takle.

⁸ Sateichii ahnyiinii chii wotakle ni- nado maghiitakle, sateichii ahnyiinii chii kamasak razyii sana katokryii poi wole.

⁹ Sateichii teikito chii kalu mei tei mei thang madaikiile, teito Jisunii ahnyiigo langtoi aitakle.

¹⁰ Sateichii teisekto mpounii mpou- boumeigo kaswisii malyiilung liit tosii, Dalmanuta sazyii ki tat tutakle.

Farasismeinii kamadat hangninii tiimangoulosii kakhang

¹¹ Farasismei kangkanii Jisuda gongsii mpougo chyii n-gitu takle, sateichii sating gamto kamadat hangninii tiimangoulosii khangle, mpougo jai jutang karam jangpii.

¹² Nlenii Jisunii chyiidi ngaisii tamle, “Mei aimeinii kamadat hang- ninii fiikalei ai dajangpiipo? Kasang- pii Inii gonyiidakii tam leile, gonyiiha kito kamadat samah kado mangou- lakle.”

¹³ Teito Jisunii ahnyiigo toisii ma- lyiilung tatliit loisii mpounii dwijai lugang kaapat takle.

Farasismei ninado Herot mah ahee

¹⁴ Jisu boumei teinii tiirok tei pung mangai aitakle, ahnyiida tiirok pang-sang pangkii roinii malyiilung- tei bam takle.

¹⁵ Jisunii kakhatsii ahnyiigo tamle, “Julo, Farasismei ninado Herot mah ahee kiteito gonyii sakai wolo.”

¹⁶ Ahnyii kak kito ahnyii roinapiinii rashiitu takle, “Mpounii ai tamleile, dapochiinii nyiida tiirok gatakle.”

¹⁷ Ahnyiinii karashii kalei tei Jisunii tiwosii mpounii ahnyii dakii tamle, “Tiirok kaga jangpii gonyii dapei karashii leipo? Gonyiinii toi katangpii timak-ngoumakpo rei? Gonyii lung tei leipo?

¹⁸ Mik pungsii pungsii gonyii ngoumakde? Sateichii gonyiinii maning sutakde?

¹⁹ Inii mei thang mangii jangpii tiirok pang mangii tiirak katu kaktei gonyiinii chii kamasak tiirok razyii katokryii kadazii poi nkom wopo?” Ahnyiinii khekalatle, “Keariisiinakhii.”

²⁰ “Sateichii Inii mei thang madai jangpii tiirok pang sana tei tiirak katu kak gonyiinii chii kamasak tiirok razyii katokryii kadazii poi nkom wopo?” Sii Jisunii n-nhiile, ahnyiinii khekalatle. “Sana.”

²¹ Teito mpounii ahnyii dakii tamle, “Gonyiinii toi katangpii timakpo rei?”

Jisunii Bethsaida kito mik kachetmei hangniniigo tii-mbikapyii

²² Sateichii ahnyiinii Bethsaida ki gongle, teito mei kangkanii Jisuda mik kachetmei hangninii pang gongle, sateichii mik kachetpii gamtei dengsei losii ahnyiinii Jisu dato khangle.

²³ Teito Jisunii mik kachetpii gotei bahto jumsii nam ki teito siiba pangpat takle, teito Jisunii mik kachetpii mik kikii poktai masui kaipyiisii mpou gamkii mpou bah kaisii mpougo n-nhiile, “Nang mah kado ngoumakpo?”

²⁴ Teito mpounii jumakhiisii tamle, “Inii meinah ngoule; nlenii meinah tei ruibang tat kalei kumpii ngoule.”

²⁵ Jisunii nlailoisii mik kachetpii mik kikii mpou bah hangna tei kaipyii takle, toinii miktei tiigatpii ngou wotakle, mpou mik-hoi tei nlai- gong takle sateichii mpounii matum madum mateisii ngou wotakle.

²⁶ Teito Jisunii mpougo kakhatsii tamsii kilam lang matu takle; “Nam kitei nlaido nlai liit sulo.”

Pitarnii Jisu ai Krista lesii tam ka-mpat

²⁷ Sateichii Jisu ninado mpou- boumei teinii Kaisariya Filipi ki nam nam kitei tat gongle, sateichii pwidito tat leibangpii Jisunii mpou- boumei dato n-nhiile, “Meihangnii n-gu ai taleziipo?”

²⁸ Teito ahnyiinii khekalatle, “Jon dwi mpum kapyiipii, sateichii mei kangkanii tamle, Ilaijah, sateichii mei kangkanii Lungkakalingmei kak kito Lungkakalingmei hangninii lesii tamle.”

²⁹ Sateichii mpounii ahnyii dato n-nhiile, “Nlenii gonyiinii n-gu ai taleziipo?” Teito Pitar nii mpougo khekalatle, “Nang Krista teile.”

³⁰ Teito mpounii gu kaang kito meida kado tam sulo sii kakhatbing takle.

Jisunii kamage tang karam ninado mpounii taitang karam sam reipiinii katam

³¹ Sateichii mpounii mpou-bou- meigo ralipyiiloi tutakle, “Meinah sapfii mpou teinii kamage katu hangka doutangle sateichii kating- mei hangnii, Tingdimei hangnii ninado ajaitingshang kati ojamei hangnii mazhiilakle, mpougo gitangle, nlenii zangtumnii piinei-tai mpounii ringkhii tangle.”

³² Ai sam ai Jisunii madupii tamle, teito Pitarnii mpougo pangtam wosii n-gitakle.

³³ Nlenii Jisunii nryiigong mpou-boumeigo jule sateichii Pitar go n-gile, “Gutailam tat tulo, Seitan! Kadapokii nangnii kamaning tei Saraa dato gongmakle, nlenii meinah dato gongle.”

³⁴ Sateichii mpounii mpou-bou- meigo kaswisii meimoi gotei mpouda lat magongsii tamle, “Mei kata kangkanii gutai swinyii lepochiinii mpou mah kamaning tei toi ailo, krosh tei poi matu wolo sateichii gutai swi wolo.

³⁵ Kadapokii mei kata kangkanii mpou mah karing keikanyiimei teinii karing tei maga tangle; sateichii mei kata kangkanii gujangpii sateichii kabi rasam jangpii mpou mah karing maga kaleimei hangteinii keikapyii tei doutangle.

³⁶ Kadapokii mei hangni- nanii sazyii pouryii matum matum dou wokido mpou rangii tei ga ai dinchiinii kadapei liipat lei tangpo?”

³⁷ Kadapochiinii mei hangninanii mpou karing ai kadapeipii hek tangpo?

³⁸ Kadapokii mei-nou mainahgo kachyii ninado kakui kama ai-haki aito kalei mei kata kangkanii gujangpii ninado gusam jangpii n-rou lepochiinii ah dato meinah sapfii mpou teinado n-rou tangle, mpounii kamatei sating gamlui hang go kaswisii Pfii mah pumtei kava kito kagong kak tei.