MARK 13 - KARANU KABI SAMTAM

Saraa kamaningki tiimaga tang karam jangpii Jisunii reipii katam

¹ Jisunii Saraa kamaning ki lungto tat kapat tinglang kak, mpou boumei hangninanii tamle, “Madhiikapyiipii, julo, kuitu hang ninado ki hang ai daziikapii ma- datpo!”

² Jisunii mpouda khekalatle, “Nangnii ki kadi hang ai ngoumakpo? Kuitu hangninii kado kashoisii kaibam lakle, matum madum tei tiikou aitangle.”

Kamage ninado kaset kalak kapyii

³ Sateichii mpounii saraa kama- ning ki lampangkii ju karyiisii Olip zang gamto bamsii kalei kak, Pitar, Jems Jon ninado Andhrunii mpougo makumpii n-nhiile,

⁴ “Nyiigo tampyiilo, ai kadadou pat tangpo, sateichii ai kakum hang ai gongtuna kadapei tiimangou tangpo?”

⁵ Teito Jisunii ahnyii dakii tamtu takle, “Mei kaniido gonyiigo chyii- tatma lak tang karam jangpii sakai wolo.

⁶ ‘I-Mpou teile, sii hangka gu zei kito gong tangle; teito mei hang- kago ahnyiinii chyiitatma tangle.

⁷ Sateichii gonyiinii satii saryii sam ninado saryii sam kahi katu shiigong chiido lung mage sulo, ai kakum hang ai pat tangle, nlenii kalui tinglang teinii makle.

⁸ Kadapokii Lui hangninanii lui hangninii phyii- ryiikii, sagong sazyii hangninanii sagong sazyii hangninii phyiiryiikii saryii tiitu tangle, bam katham katham kito malyii chyiitu tangle, aihang ai kamage kalak pat tutang karam abang teile.

⁹ “Gonyii rangtiisii sakai wolo; dapochiinii ahnyiinii gonyiigo jumsii samtak-ki pangkhii tangle; sateichii Jehudimei mah ndwibamni hang kito gonyiigo dat tangle, sateichii gonyii- nii gu jangpii sakchyii pyiimatu tang karam jangpii sazyii apum katiimei ninado sagongmei doito sat tangle.

¹⁰ Sateichii lui hangda kabi rasam tei reipii tam ai tangle,

¹¹ teito ahnyiinii gonyiigo jumsii pyiitoi kalei tinglang kak tei gonyiinii kadapei sam tam tangposii lung mage sulo, nlenii tei tinglang sek teikii mati kapyii tei gonyiinii tamlo, dapokii tam kalei tei nangnii makle, nlenii rangii kamateiniile.

¹² Sateichii asanapiinii asanapiigo ninado Pfiinii nah-go tai matu tang karam jangpii pyiitoi tangle; nahmeinii pwi-pfiigo mazhiirou tangle, sateichii ahnyiigo gi malei tangle.

¹³ Meihangnii gonyiigo gu jangpii ngourou tangle, nlenii kalui katang leh kalumei teinii keikapyii tei doutangle.

Kamage kamarhii kadi

¹⁴ “Nlenii kahing ngou ka-nraang teinii satjyii kasu bam kiteito sat kalei tei gonyiinii ngou kalei tinglang kak, (kafiimeinii tiwolo) tei kak tei Judiya kito kalei mei teinii zang hangki pak kai matulo.

¹⁵ Ki kapou phyiiryiito kaleipii teinii kilungto kalei mah kata kara poi mpat tang karam jangpii hum matu sulo, liitdo liit matu sulo.

¹⁶ Sateichii lu kito kaleipii teinii ki nlaigong mpou nat poi matu sulo.

¹⁷ Sateichii moi mpung kalei mei pwi sateichii nah napamsii kalei mei jangpii teidou tei doishyiile.

¹⁸ Ai kakum hang ai siitaidou pat kasu tiisii gonyiinii Saraago riitalo.

¹⁹ Kadapokii Saraanii mahlyii tii- kapyii saroi sekto tingnei katangpii pat sang patlei kasu ninado patdo patloi kalak teiziikii mage kadi leimik hangtei gong tangle.

²⁰ Sa- teichii Bangpiinii leimik hangtei tiimadui pyiisu lepochiinii, meikado keikapyii dou wolakle, nlenii Bang- piinii kapai kalumei, jangpii leimik hang ai tiimadui pyiitakle.

²¹ “Sateichii tinglang teikak tei, mei kata hangninanii, julo, aiki Krista leile, makchii, julo, Krista louki leile sii gonyiigo tam lepo- chiinii, teitei gonyiinii malum sulo.

²² Kadapokii Krista zei katiimei ninado Lungkakalingmei zei katii pat tangle, sateichii tiikabuinii, Saraanii kalei kalumei go katangdo chyiitatma tang karam jangpii tiikamangou ninado kamadat tha hangdo tiimangou tangle.

²³ Nlenii sakailo, matum madum tei Inii gonyii dakii reipii tampyii takle.

Meinah sapfii mpou teinii gongtang karam

²⁴ “Kamage kamarhii tinglang hangtai tei, leimik tei myiitangle, sateichii sakhii teiniido valakle,

²⁵ sating gamto sageiti hang teido tak hum tangle, sateichii sating gam teimaham hangdo nlai tangle.

²⁶ Sateichii meinah sapfii mpou tei kamong phyiiryiito teimaham ninado pumtei kava kito kahum tei ahnyiinii ngoutangle.

²⁷ Teito mpounii Sating gamluigo lang mpat tangle, sazyii nlai sekto sating nlai katang, siika madaito mpounii kalai kalumei hang gotei poi ndwi tangle.

Kadiitbang kito madhii kalu

²⁸ “Kadiitbang gamto ndasam tei madhiilo, kadiitbang ainii kha madeksii nhii karanu boipat tusek-kii salumdou tei gonglei takle katu tei gonyiinii tile.

²⁹ Tei takumpii aikakum hang ai pat katu gonyiinii ngou sekchii, tinglang tei natakle, ki kamwiku sekto leitakle katu tei gonyiinii tilo.

³⁰ Kasangpii Inii gonyii dakii tam leile, ai kakum hang ai pat kasuta, aiha ai gatu lakle;

³¹ Sating ninado sazyii tei gatu tangle, nlenii gu sam hang ainii gasang galakle.

Meikado tinglang tei timakle

³² “Nlenii leimik ninado tinglang tei kadadou tangpo katu tei sating gamto kalei Apfii tei supiinii sating gamto kalei Sating gamlui ninado meinah sapfii mpou teiniido timakle.

³³ Sakailo, tiikadalo, dapochiinii tinglang tei kadadou gong tangpo katu gonyiinii timakle.

³⁴ Teiteinii mei hangninanii mpouki toisii sazyii kaki hangninii ki mbui katu, mpouki kaleimei hang go mpou mpoumah tha tiitang karam nsang nsangtei pyii kalei; sateichii ki takam kakoipii godo tiikadalo sii kakhat kapyiipii takumle.

³⁵ Teijangpiinii tiikadalo, Kadapokii aki pumpii teinii ting- khiilam makchii tinghum asumkii, makchii ting valiit kasunii makchii tingchoi kagong tinglang tei gonyiinii timakle.

³⁶ Mpounii nlai kagong kak gonyiinii zyiisii kalei doudo malahle.

³⁷ Sateichii Inii gonyii dakii tam kalei ai Inii meihang dakii tam leile: Tiikadalo!”