MARK 1 - KARANU KABI SAMTAM

Jon dwi mpum kapyiipanii ralikapyii

¹ Ai ai Saraa nah sapfii mpou Jisu Krista mah kabi rasam abangle.

² Lungkakalingpii Isaiya mah larek bung kikii ryii kabam takumpii: “Julo, Inii godoikii gusam kapungmei lang m-mangle, Ahnii go puidi tiikada pyii tangle.”

³ Sazyii kamarong kito saa kalei rok hangninii teinii, “Bangpii mah pwidi tiikadalo, mpou mah pwidi tiimajyiilo.”

⁴ Teitakumpii Jon nii sazyii kamarongki gongsii dwi mpum pyiile sateichii kabi rasam tam ralipyiile; mpounii meihang dakii tamle, “Go kem kito nrek wolo, sateichii dwi mpum wolo sateichii Saraanii go kem hangtei magapyii tangle.”

⁵ Sateichii Judiya bang ninado Jerosalem namdi kito kalei mei hangnii gongsii Jon-nii katam shiile sateichii ahnyii mah kem hangtei tam mpatsii Jon nii ahnyiigo Jordan karyii kito dwi mpumpyiile.

⁶ Jon-nii poutungki-kounah mai peimani kaile, mpounii kiiki kikii tiigyii haikak kakle, sateichii mpou- nii kacheng num chiile ninado saram khuidwi sakle.

⁷ Mpounii meimoi dakii matile, “Gutaito gongtang karam mei hangninii teinii gusung disang dile, Inii nkwimang mpoumah pichot-rengdo hektoi kajyiimakle.

⁸ Inii gonyiigo dwi kito mpumpyiile, nlenii mpounii gonyiigo rangii kamateipii mpumpyii tangle.”

Dui ka mpum ninado Jisugo kahem

⁹ Tei-tai tinglang thang supii, Galili kito kalei Nazaret sazyii kito Jisu tei gongle, sateichii mpougo Jon dwi mpum kapyiipanii Jordan karyii kito dwi mpumpyii takle.

¹⁰ Sateichii binasek-kii Jisunii dwi kangto tusek-kii sating gam laat kapyii ninado mahao takumpii sating gamto rangiinii mpou phyiiryii jung kahum tei mpounii ngoutakle.

¹¹ Sateichii sating gamto kahum rok hangninii shiile, “Nang ai Inii lungkasyii Gunah sapfii mpou teile, Inii go phyiiryiikii hangkapiinii lung mangle.”

¹² Sateichii binasek-kii rangiinii mpougo sazyii kamarong hangninii kikii pangkai pyiitakle.

¹³ Teiki teito mpougo zangrekdai-nii Seitan nii hemsii bamle sateichii ranam kounahgo kaswisii bamle, nlenii sating gam rangiinii humsii mpougo kaswi pyiile.

Jisunii kaa kalimei madaigo kalat

¹⁴ Jon dwi mpum kapyiipiigo kabang kikii kai kaleitai, Jisunii Galiliki liitsii Saraa mah sating sazyii mah kabi rasam tei tam ralipyiile.

¹⁵ Mpounii tamle, “Ting- lang tei gongtakle, Saraa mah sating sazyii tei natakle, gonyii lung kalisii kabi rasam gotei malum wolo.”

¹⁶ Jisunii Galili dwijai kuto tat kalei kak, mpounii Simon ninado mpoutaikarhiipii Andru dwijai kito ralangpii kaalisii kalei tei ngoule, dapokii ahnyii tei kaa kalimeile.

¹⁷ Jisunii ahnyii dakii tamle, “Patlo, gutai swi-wolo, ninado Inii gonyiigo mei kanum mei tiipyii tangle.”

¹⁸ Teisek-kii ahnyiinii ralang tei kai aisii mpou-tai swi-wotakle.

¹⁹ Mpounii chengniikii dhiisii tathum sek-kii, Zebedi nah Jems ninado Mpou-tai karhiipii Jon malyii gamto ralang potsii kalei tei ngou- takle.

²⁰ Teisek-kii Jisunii ahnyiigo latle, teito ahnyiinii ahnyii pfii Zebedigo ahnyiinii malyii zanglei kalupii gotei kaswisii malyii gamkii kaibam sanii Jisutai swi wotakle.

Kashyii rangii kaswi katumei hangninii

²¹ Jisu ninado mpou-tai kaswimei Kaiparnam namdi kitei liitle, sateichii bam ntak piinei leimik Jisunii Jehudimei mah ndwibamki lungtei liitsii ralipyiile.

²² Sateichii mpounii ralikapyii tei shiikalu meihangnii akhiipat takle, dapo- chiinii mpounii Ajai tingshang kati ojamei takumpii supii teimaham kajum meigo reisii ralipyiile.

²³ Teitinglang sek-kii sara kashyii kaswi kaleimei hangninii Jehudimei mah ndwibamki tei liitsii saale,

²⁴ “Nang nyiigo dapei tiinyiipo, Nazaret ki Jisu? Nang nyiigo tiima- shyiilesii aiki gong leipo? Nang tapo katu I tile, Nang Saraa mah kamatei sam katam meile.”

²⁵ Jisunii kashyii rangii gotei tamle, “Malhii sulo, ninado ah dato tat pat tolo!”

²⁶ Kashyii rangii teinii mei gotei kalungtu takle, ninado mpou dato tat pat-to takle.

²⁷ Meihang teinii akhii patsii hangninanii hangninii dakii tamle, “Ai kadapeipo? ai kasatai rali kapyiide Mei aipounii teimaham jumsii kashyii rangii hang go kakhatle ninado mpou-sam swile!”

²⁸ Sateichii Galili pungbang hangki Jisu mah tang-ha tei kahitu takle.

Jisunii mei hangkago tii mbi kapyii

²⁹ Ahnyiinii Jehudimei mah ndwi- bam ki teito tatpat-tosii ahnyiinii Simon ninado Andru ki liit takle Jems nei Jon go kaswisii.

³⁰ Simon hnei tei riirhiisii azyii gamto zyiile ninado Jisu gong sek-kii, mpoupei mah ra-katii tei tam mangou takle.

³¹ Jisunii mpoupeida patle, bahto jumsii chyiimatu masat takle, teito kariirhii tei bitakle, ninado mpou- peinii ahnyiigo nga-ngatu takle.

³² Sateichii tingkhiilam leimik liit sek-kii, ra-kanimei hang go ninado sara kashyii kaswi kalei meigo Jisuda pang gongle.

³³ Namdi kito kalei meihangnii kijang teito gong ndwitakle.

³⁴ Mei hangka ra-katham katham tiisii kalei meigo Jisunii tii mbipyiile; sateichii sara kashyii hangkago baatoi pyiile, mpounii sara kashyii hang gotei mah kado malhii matu makle. Kadapokii ahnyiinii mpougo tapo katu tile.

Jisunii Galili kito tam rali kapyii

³⁵ Supounei tingchoi nukii valiit kasunii, Jisunii tusii teiki teito tatpat takle, ninado kamakum bam hangniniiki maasii teito riitale,

³⁶ sateichii Simon ninado mpou-tai swikalei meinii tatpatsii mpougo fiitu takle.

³⁷ Sateichii ahnyiinii mpougo dou wosek-kii, ahnyiinii mpouda tamle, “Meihangnii Abang- piigo fiileile.”

³⁸ Nlenii Jisunii ahnyii dakii khekalatle, “N-je namdi kaki kido nyiinii adoidoi maasii Inii kabi rasam tei tam ralipyiine, kadapokii Inii aijangpii gongle.”

³⁹ Sateichii mpounii Galili sazyii hangki liitsii tam ralipyiile ninado sara kashyii hang go baatoi pyiile.

Jisunii mei hangniniigo tii mbi kapyii

⁴⁰ Sateichii mpara tiisii kalei mei hangninanii Jisuda gongsii mpou doito kok-kumsanii tiihalosii khangle, “Nangnii n-gu bimatunyii lepochiinii tii-mbi wobuile.”

⁴¹ Jisunii mpougo lungkasyii pii- nii tokryii takle, Jisunii bah hampat mpougo dengle ninado tamle, “Inii mazhiipyii takle, bitulo.”

⁴² Mpounii teitei tamsek-kii binasek-kii mpara tii kalei tei bitakle.

⁴³ Jisunii mpougo kakhat katumsii manoisek-kii matat toi aitakle,

⁴⁴ Sateichii Jisunii mpou dakii tamle, “Julo, nang meida kado ai rasam ai tam sulo, nlenii tat tulo, Atingpiida maasii mpougo mangoulo, nangnii gora tei bitakle katu tei meidakii mati tang karam jangpii Mosesnii kakhat kabam Saraago pyiitang karam tei karatlo.”

⁴⁵ Nlenii mpounii tatpatsii tingha tei madupii tamtu takle, teijangpiinii Jisu tei namdi kitei madupii bampei lak takle, teipiinii mpounii kamakum bam kitei bamle ninado ahnyiinii siika madaito mpougo fiigongle.