LUKNII KARYII KABI RASAM JUKAMATI 9 - KARANU KABI SAMTAM

Jisunii mpou boumei keariisiinakhii go lang ka-mpat

¹ Jisunii mpou boumei keariisii- nakhii go lat ndwisii, sara kashyiigo baakatoi sateichii katii kanhiimeigo tii mbi katu mah teimaham sateichii pumtei tei ahnyii dakii pyiitakle.

² Sateichii mpounii Saraa mah sating sazyii tam tat matu tang karam jangpii ahnyiigo lang mpatle.

³ Sateichii mpounii ahnyii dakii tamle, “Gonyiinii mbui jangpii koktui kado, takou kado, tiirok kado, sana kado, mah hang- ninii kado pung sulo; peijoudo hangna pung sulo.

⁴ Sateichii gonyiigo lukakei ki kiteito gonyiinii bamlo, gonyiinii teiki namdi kiteito tat tu kasuta.

⁵ Sateichii mei kata hang- ninanii gonyiigo lukei suleponii namdi kiteito gonyiinii tat kapat kak ahnyii phyiiryiikii sakchyii tiima- ngou tang karam jangpii gonyii pi kito buinei tei piitamtoi ailo.”

⁶ Teito ahnyiinii tatpatsii nam namki maasii kabi rasam tei tam ralipyiile ninado katii kanhiimei go bamlyii hang kito tii-mbipyiile.

Herot mah karampou

⁷ Sateichii Galili ki sagong Herotnii patsii kaleihang ai shiiwo sek-kii, mpou hangkapii ti karampou aitakle. Dapochiinii mei kangkanii tamle, Jon dwi mpum kapyiipii ringloi takle

⁸ mei kangkanii tamle, Ilaijahgo mangoupyiile sateichii mei kangkaniido tamle, Ndou Lung- kakalingmei hang kak kito mei hangninii ringkhii takle

⁹ Herotnii tamle, “Inii Jon phyiibung baa ndang aitakle, nlenii Inii mpou kaang kito ai kakum sam hang shii sii kalei mei ai tapo?” Teito mpounii Jisugo kadou tang karam jangpii fiitu takle.

Jisunii mei tang mangiigo bai kalu

¹⁰ Teito tiilamlwi kapyiimei teinii nlaigongsii ahnyiinii tii kalei matum madum tei Jisu dakii tam takle. Mpounii ahnyiigo pangsii, Bethsaida sii kalat namdi hangniniiki ahnyii roinapii tat tutakle.

¹¹ Sateichii mei- moi teinii teitei tiwo sek-kii, mpoutai swiwo takle; sateichii mpounii ahnyiigo ntasii lukai wosanii Saraa mah Sating Sazyii mah kaang kito tampyii takle; sateichii katii kanhii tii ka-mbi kamareimei ahnyii gotei tii mbipyii takle.

¹² Sateichii leimik liit hou sek-kii, mpou boumei keariisiinakhii teinii mpouda gongsii tamle, “Mei moi ainii baang aikito kalei namdi sateichii ningkam ki maasii, ki rhiitang karam sateichii mah kachii kasak douwo kabui jangpii ahnyiigo langtoi pyiilo, dapokii aikito nyiinii kamakum bam kito bamle.”

¹³ Sateichii ahnyii dakii mpounii tamle, “Gonyiinii ahnyiigo kachii kasak pyiilo.” Teito ahnyiinii tamle, “Nyiinii maasii aimei hang jangpii kachii kasak tei lyii suchiinii, nyii danii tiirok pang mangii sateichii kaa pakna doito kisii gale.”

¹⁴ Kadapochiinii ahnyii tei sapfiimei tang mangiikii niile. Sateichii mpounii mpou boumei dakii tamle, “Ahnyiigo mei rekngii ngiipii ndwi ndwi tiisii bam matulo.”

¹⁵ Sateichii ahnyiinii aitiisii ahnyiihang go mbam takle.

¹⁶ Teito mpounii tiirok pang mangii sateichii kaa pakna tei poisii, sating gamkii rajang matu hakalang tamsanii tiirak takle, sateichii mpou boumei dakii pyiitakle meihang dakii jailosii.

¹⁷ Sateichii ahnyii hangteinii chii wosii moi maghii takle; sateikii ahnyii- nii chii kamasak tei mpou boumeinii razyii keariisiinakhii poi nduiwo takle.

Pitarnii Jisugo Krista seklesii tam ka-mpat

¹⁸ Tingneikii Jisunii mpou roinapii riita kajyii tinglangki, mpou boumei teinii mpouda gongle. Teito Jisunii ahnyii dato n-nhiile, “Mei- hang ainii n-gu talesii kahi leipo?”

¹⁹ Teito kangkanii tamle, “Nang Jon dwi mpum kapyiipii tei lesii ah- nyiinii khekalatle, kangkanii tamle, nang Ilaijah teile; Kangkanii tamle, nang ndou karei lungkakalingmei hang kak kito hangninii ringkhii kalu teile” sii.

²⁰ Sateichii mpounii ahnyii dakii tamle, “Nlenii gonyiinii n-gu tale- ziipo?” Pitarnii khekalatle, “Nang Saraanah Krista teile.”

Jisunii mpoumah kamage ninado ringkakhii mah sam reipii mati kapyii

²¹ Sateichii ahnyii dakii teisii kakhatsii meida kado sam ai tam mpat sulosii mpounii mwija pyiisanii tamle.

²² “Meinah sapfii mpou teinii kamage kalak pung tangle, kating- mei hang, kanat kajum tingdimei hang sateichii ajaitingshang kati ojameinii mazhii kasu tei doutang takle. Mpougo gitoi tangle, sateichii leimik hangtum kashang piinei leimik mpounii ringkhii tangle.”

²³ Sateichii mpounii meihang dakii tamle, “Mei kata kangkanii gutai swinyii lepochiinii, mpounii mpou jangpii mangai aisii, mpoumah Krosh tei neikii neikii poi matu matulo, sateichii gutai swi matulo.

²⁴ Kadapochii rangii keikanyiimei hangteinii teitei maga tangle: satei- chii gujangpii rangii maga kaleimei hangteinii teitei kei kalu doutangle.

²⁵ Kadapochiinii mei hangninanii sazyii pouryii matum madum ai dou wosanii, mpoupum sek maga kalei mak-kii kou ai leponii, kadapei liipat leipo?

²⁶ Kadapochii gujangpii sateichii gusamtam hang jangpii mei kata kangkanii nrou leponii, meinah sapfii mpou teinii mpou doito nrou- tangle–mpoumah pumtei kava kito sateichii sating gamlui mah pumtei kava kito mpounii kagong kak.

²⁷ Sateichii Inii gonyii dakii ka- sangpii tam leile, aikito satsii kalei- mei kangkanii Saraa mah sating sazyii ngou kasuta katai tei kadou lakle.”

Jisu mah Jaitalui kakali

²⁸ Sateichii samhang ai tam kalei- tai, jang siisatnii kakum sousek-kii, Jisunii mpougo kaswisii Pitar, Jon ninado Jemsgo pangsii, riita tang karam jangpii zang gam tatpi takle.

²⁹ Sateichii mpounii riita kalei kak, mpou mah jupa tei kali takle sateichii mpou mah peimani hangtei haranousii seilik takle.

³⁰ Sateichii julo, binasek-kii mpougo mei hang- nanii sam rashii takle; ahnyii tei Moses ninado Ilaijah teile.

³¹ Ahnyii teinii sating gam Pumtei kava kiteito gongle sateichii Jisugo karashiile mpounii Jerosalem kito taipyii siinii Saraa mah kamaning kaang tei kalang sii tiimatui tang karam jangpiinii.

³² Pitar ninado mpougo kaswi kaleimei tei tiigatpii zyiitu takle. Nlenii ahnyiinii gungtu siinii Jisu mah Pumtei kava sateichii mei hangnanii mpougo kaswisii sat kalei tei ngoutakle.

³³ Sateichii ahnyiinii Jisu dato n-nou kalei tinglang kak, Pitar nii mpou dakii tamle, “Pumpii nyiinii aiki kabam ai kadaziikapii bipo; Nyiinii dwipeiki hangtum lamle, hangninii gojangpii, hangninii Moses jangpii, sateichii hangninii Ilaijah jangpii,” (Mpounii dapei tamziipo katu mpounii kasangpii timakle.)

³⁴ Sateichii mpounii sam ai tam leibangpii, kamong tei gong siinii ahnyiigo gomneiwo takle; sateichii ahnyiinii kamong lung tei liitto sek-kii, hingtakle.

³⁵ Teito rok hang- ninii teinii kamong kiteito tamle, “Ai ai Inii kalai kalu gunah sapfii mpou teile! mpounii katam swilo.”

³⁶ Sateichii roktei ntak sek-kii, Jisu roinapii kalei tei ngoutakle; sateichii ahnyiinii malhii supii bamtakle. Tinglang teiki ahnyiinii ngou kalu tei samah kado meida kado tam makle.

Sara kashyii kaswi kalei nah sapfiimei hangniniigo tii-mbi kapyii

³⁷ Supounei tei Jisu sateichii mpou boumei hangtum tei zang gamto tat hum sek-kii, mei hangkiinii mpougo kadou takle.

³⁸ Sateichii julo, meimoi kak kiteito sapfiimei hangninanii saale, “Madhiikapyiipii, Inii n-go khang leile, Gunah sapfii mpougo ju seilo!

³⁹ Sateichii julo, kashyii rangii teinii mpougo jum sek-kii, mpounii saa saa tule. Kashyii rangii teinii mpougo tiimaset tiimalak sii mwi kito poktai mahum pat matule. Sateichii mpougo ahnyiinii mpatpyii rousii mpatpyiile.

⁴⁰ Sateichii Inii go boumeigo sara kashyii tei baatoi seilosii khangle, nlenii ahnyiinii baatoi peiwo lak kiile.”

⁴¹ Teito Jisunii khekalatle, “Oh kamalum kaga ninado karampoumei ha, Inii gonyiigo kada takii kaswisii bamsii gonyiigo tiiha tangpo? Gonah sapfii mpou gotei aiki pang gonglo.”

⁴² Sateichii nah napou teinii tatpi leibangpii, sara kashyii teinii mpougo sazyiikii poi kousii tii kamage pyiitakle. Jisunii sara kashyii gotei kakhatsii namtakle, sateichii nah napou gotei tii mbipyii takle, sateikii mpou pwinei mpou pfii dakii nah sapfii mpou gotei pyiiloi takle.

⁴³ Sateichii ahnyiihang teinii Saraa mah teimaham kadi gotei ngou wosii khiipat takle. Sateichii mpounii tiikalei hang aigo meihangnii sung gasii leibangpii, mpounii mpou boumei dakii tamle,

Jisunii mpoumah katai kaang kito nlailoisii reipii rali kapyii

⁴⁴ Inii gonyiigo tamle kajyii ai mangai sulo, “Dapochiinii Meinah Sapfii Mpou gotei mei bah kikii pyii ailezii takle.”

⁴⁵ Nlenii tam kalei ai ahnyiinii tisutakle, sateichii ah- nyiinii teitei swi kito tipei kalak tiisii ahnyii dato kabai aitakle; sateichii tamsii kalei aikaang kito ahnyiinii mpougo n-nhii hingtakle.

Tapiinii kadi disangpo

⁴⁶ Sateichii Boumei kak kito tapii-pii kadi disangpiipo sii kajyiipat tutakle.

⁴⁷ Teito ahnyiinii maning kalei tei Jisunii tiwo takle, teipiinii mpounii nah kacheng hangninii ket tosii mpou kukii masat takle.

⁴⁸ Sateichii ahnyii dakii tamle, “Mei kata kangkanii gu zei kito nah kacheng aigo lukai lepochiinii, n-gu lukaiziile; sateichii mei kata kang- kanii n-gu lukai leponii, n-gu lang m-mang kapyiipii godo lukaiziile; kadapochiinii gonyii hang kak kito kacheng cheng sangpii teinii kadi disang piile.”

Gonyiigo mazhii kasu tiikasu meihangtei gonyii jangpiile

⁴⁹ Jon nii tamle, “Pumpii mei hangninanii go zei kito sara kashyii hang go baatoisii kalei nyiinii ngou wosii nyiinii mpougo namle. Kada- ponii mpounii nyiigo kaswisii tat makle.”

⁵⁰ Jisunii Mpougo tamle, “Nam sulo, kadapochiinii gonyiigo mazhii kasu tiikasu meihang teinii gonyii jangpiiniile.”

Samariya meinii Jisugo lukaipyii kasu

⁵¹ Jisugo Sating gam pangkhii tang karam tinglang tei gong sek-kii, mpounii Jerosalem ki kathang tatliit tang karam jangpii swi maningsii tatpat takle.

⁵² Sateichii mpou doi reisii sam kapungmeigo lang matu takle; sateichii ahnyiinii maasiinii mpou jangpii tiida tang karam jangpii Samariyamei mah ranam hangniniiki tatliit takle.

⁵³ Nlenii teiki mei teinii Jisugo lukaipyii su- takle, dapochiinii mpounii Jerosalem ki khiitang karam jangpii tat kalei tei ahnyiinii tiigatpii titakle.

⁵⁴ Sa- teichii mpou boumei Jems ninado Jon nii ai ngou wosii ahnyiinii tamle, “Bangpii, nyiinii sating gamto mi m-mangpyii matusii ahnyiigo tiimaga malei katu ai nangnii marai lakpo?”

⁵⁵ Sateichii Jisunii nryii gongsii ahnyiigo n-gile.

⁵⁶ Sateichii Jisu ninado mpou boumei tei nam hangniniiki tat tuloi takle.

Jisutai switang karam meihang go jai kaju

⁵⁷ Sateichii ahnyiinii pwidi tat leibangpii, mei hangninanii Jisu dakii tamle, “Nangnii katat bamlyii hangki Inii gotai switangle.”

⁵⁸ Teito Jisunii mpou dakii tamle, “Saramii kounah hang mah ki kachet bamle. Nlenii meinah sapfii mpou mah phyiibung tei zyiimaa nkum tang karamni gale.”

⁵⁹ Jisunii mei kaki hangninii dakii tamle, “gutai swi wolo.” Nlenii mpounii tamle, “Bangpii, n-gu maa gu pfiigo tiigoi rei maleilo.”

⁶⁰ Jisunii mpougo khekalatle, “Kataimeinii kataimei gotei poigoi matulo. Nlenii nangnii maasii Saraa mah Sating Sazyii tamroi tulo.”

⁶¹ Sateichii mei kaki hangnina- niido tamle, “Bangpii Inii gotai swile, Nlenii n-gu maasii guki kalungmeigo kaluimah n-nousam tamrei maleilo.”

⁶² Teito Jisunii mpou dakii tamle, “Mei kata hangninanii lu karakpot go mpou bahpii jumbam sanii atailam- kii nryiigong kajumei teinii Saraa mah Sating Sazyii jangpii tii kajyii- makle.”