LUKNII KARYII KABI RASAM JUKAMATI 23 - KARANU KABI SAMTAM

Jisugo Pailat doi Pangkakhii

¹ Teito ahnyiihangnii gungtusii, mpougo Pailat doikii pang- khiile.

² Sateichii ahnyiinii mpougo kama luikaipyii sii tamle, “Ai sapfii mpou ai nyii luigo tiikarampou, Kaisor sagong dakii aha-kapyiigo kanam sateichii mpou roinapiinii Krista sagong lesii katam nyiinii kadoutakle.”

³ Teito Pailatnii mpougo n-nhiile, “Nang Jehudimei mah sagongpo?” Teito Jisunii mpou dakii khekalatle, “Nangnii tam kalei teile.”

⁴ Sateichii Pailatnii kanat kajum tingdimei ninado meimoi dateikii tamle, “Inii mei aipou gamto samah kado kama doumakle.”

⁵ Nlenii ahnyiinii kisii sangtingsii tamle, “Mpounii Judiya sazyii hang kikii, Galili kito aiki bam katangpii, meigo n-gi nrung tiikaile.”

Jisugo Herot dakii lang kakai

⁶ Nlenii Pailatnii teitei shiiwo sek-kii, “Aipou ai Galili kito kalung meide,” sii mpounii n-nhiile.

⁷ Sateikii mpou ai Herot nii jum kalei sazyii lungto kalei meile katu tei mpounii tiwo sek-kii, teitinglang kaktei Herot pum sekpiinii Jerosalem kito kalei taiswisii, mpounii Jisugo mpou dakii lang mpat aitakle.

⁸ Herot nii Jisugo ngouwo sek-kii, kisii nta takle, kadaponii mpounii Jisu kaang kito shii katu jangpiinii, tinglang karei kito mpougo kadounyiisii bam leile, sateichii Jisunii kamadat tha tiika- mangou tei mpounii junyiisii bamle;

⁹ Teipiinii mpounii Jisugo sam hang- kii kachyii n-nhiile, nlenii Jisunii mpougo samah kado khepyii makle.

¹⁰ Sateichii kanat kajum tingdimei ninado ajaitingshang kati ojamei teinii adoilampang tatpatsanii Jisu phyiiryiikii sam teisii tam mashyiisii satle.

¹¹ Sateichii Herotnii mpou saryiimeigo kaswisii Jisugo maning malasii ninado hoksii nuisii mpougo sagong natkai kai malu wosii Pailat dakii lang mpatloi takle.

¹² Teipiinei leimik sek teikii Herot nei Pailat ai hangninanii hangniniigo kaningbitu takle; kadapochiinii asung karei kinii mpoupiina tei kangourou leile.

Jisugo gitoitang karam jangpii pyii kalei

¹³ Sateichii Pailatnii kanat kajum tingdimei, apum katiimei ninado meihang go lat nduisii,

¹⁴ ahnyii dakii tamle, “Meihang go tiikaram- poumei hangninii takumpiinii go- nyiinii aipou aigo gudakii pang gong takle. Aitoinii julo, Inii gonyii doito mpougo jai kaju kak, gonyiinii kama luikai kapyii sam hang tei aipou gamto samah kado kama tei Inii doumakle.

¹⁵ Nle, Herot niido doumakle; teijangpiinii mpounii nyii dakii mpougo lang nlailoi mpatle, sateichii julo, mpougo gi kamajyii tha hangninii kado mpounii tiimakle.

¹⁶ Teijangpiinii Inii mpougo ting- rangpii kache chepyiisii mpat aitang takle.

¹⁷ Jehudimei mah Kaakamaju Hang-ngi aiki ai mpounii ahnyii jangpii mei hangniniigo kabang kito matapii laat mpatpyii leile.”

¹⁸ Sateichii ahnyiinii rok hang- ninii tiisii saale, “Jisugo gilo, nyii jangpii Barabas go mpatpyiilo.”

¹⁹ Mpounii Namdi kito n-gi nrong tii ka-mpat jangpii sateichii meigo kagi jangpiinii kabang kikii bang bamle.

²⁰ Teito Pailatnii Jisugo mpat pyiinyiisii saasii ahnyiida tam loile,

²¹ Nlenii ahnyiinii Saasii Saasii, “Mpougo krosh gamkii gi ailo! Mpougo Krosh gamkii gi ailo!” sii tamle.

²² Sateichii mpounii ahnyii dakii hangtum kashang tiisii tamle, “Dajangpiipo, mei aipounii kadapei kashyii tii aipo? Mpougo gitang karam kaang samah kado Inii doumakle, teijangpiinii Inii mpougo laaksii mpat ai tangle.”

²³ Nlenii ahnyiinii rok sagoisii saa katu tei nkhii supii Jisugo Krosh gamkii gi ailosii saa sii tamle, sateikii ahnyii mah saa kalei teipiinii ngamwo takle.

²⁴ Teito ahnyiinii kakhang taiswisii tiimatu tang karam jangpii Pailatnii mwija pyii aitakle.

²⁵ Sateichii n-gi nrong tii ka-mpat jangpii sateichii meigo kagi jangpiinii Kabang kikii bang kabam, ahnyiinii kakhang mei tei mpounii mpatpyii aitakle; nlenii ahnyiinii kamaning tei tiipyii tang karam jangpii Jisugo mpounii ahnyii dakii pyii aitakle.

Jisugo krosh gamkii dhangsii kagi

²⁶ Sateichii ahnyiinii mpougo chyiitat leibangpii, namdi kito gong kalei, Sairin mpfii Simon gotei ahnyiinii jum wosii, Jisu taito pungtat matu tang karam jangpii, mpou gamkii ahnyiinii Krosh tei lok kaipyii takle.

²⁷ Sateichii meimoi moisang mpoutai swisii tatle, tei kak kitei, sapwimei kangkanii mpou jangpiinii mageesii hatsii bamle.

²⁸ Nlenii Jisunii ahnyiida nryiigongsii tamle, “Jerosalemki sapwimei, Gu jang- piinii hat sulo, nlenii gonyiinii gonyii jangpii sateichii gonyii nahmei jang- pii hatlo.

²⁹ Kadapochii julo, Saraa niigamei, moi mpungsang mpung kasumei sateichii rana pyiisang pyiisak kasumei ahnyii tei doibile sii ahnyiinii tam tang karam leimik hang tei gong lei takle.

³⁰ Tei ting- lang kaktei zang kadi hang go, nyii phyiiryii tak mang seilo, ‘sateichii zang kacheng hang go, nyiigo gompyiilo,’ sii ahnyiinii tam tutangle.

³¹ Kadapochiinii ruibang madek leibangpiinii ai kakum hang ai ahnyiinii tiilepochiinii, ruibang taisii taang kalei tainii kadapei pat tangpo?”

³² Sateichii kashyii tha katiimei hangna godo gitang karam jangpii Jisugo kaswisii chyiitatle.

³³ Satei- chii ahnyiinii Phyiibungrou bamni sii kalat bam kitei pisek-kii, teiki teikii ahnyiinii mpougo Krosh gamkii jotpyii gisii dhang aitakle, Sateichii Kashyii tha katiimei hangna: hang- niniigo bah ajiilam sateichii hangni- niigo bah abilamkii Krosh gamkii dhangsii gile.

³⁴ Teito Jisunii tamle, “He pfii-o! ahnyiigo maga pyiilo; kadapochiinii ahnyiinii kadapei tiiziipo katu tei ahnyiinii timakle.” Sateichii ahnyii kak kito doi kabi tei kajusii, ahnyii kakto mpou mah peimani tei njaitu takle.

³⁵ Teito meimoinii dato satsii jule, nlenii apum katiimei teinii mwi mesii hoksii nuisii tamle, “Mpounii mei kakimei gonii keipyiile, mpou ai kalai kabam Saraa mah Krista tei lepochiinii, mpounii mpougo mpou roinapii keipyii matulo!”

³⁶ Sateichii saryiimei teiniido patsii, kahengdwi pyiisaksii hoksii nuile,

³⁷ Nang Jehudimei mah sagong lepochiinii, goroinapii kei- wolo!”

³⁸ Sateichii mpou phyiibung phyiiryiikii: “Ai-ai Jehudimei mah Sagongle” sii ryii kabam zei teido leile.

³⁹ Sateichii Krosh gamkii kuikaju kabam kashyii tha katiimei hangna kak kito mei hangninanii mpougo maning malasii tamle, “Nang Krista tei makde? goroinapiinii n-godo neigodo kei wolo.”

⁴⁰ Nlenii kaki hangniniipou teinii n-gisii tamle, “Mpounii dou kalei mage tei njoichak tchiisii nangnii douziile katu tisii tisii, nang Saraago hing makpo?

⁴¹ Sateichii neinii kasangpii mage ai doumajyiile, kadaponii neinii tiikalei hang mah alangh tei douziile. Nlenii sapfii mpou ainii kama hangninii kado tiimakle.”

⁴² Sateichii mpounii tamle, “He Jisu, gomah Sagong Sazyiiki gongwo sekchii n-gu maningseilo.”

⁴³ Teito Jisunii mpou dakii tamle, “Kasangpii Inii n-go tam leile, tingnei nangnii n-gu kaswisii kasaga bamki bam tangle.”

Jisunii katai

⁴⁴ Aitoinii pung saruk kakum tatakle, sateichii pung sokchyii takasuta tei sazyii pouryii matum madum tei myii takle;

⁴⁵ Sateichii leimik mah kava tei ga ai sek-kii, Saraa Kamaning ki kikalungkii lam kabam peira tei hetriit hangna tii ai sek-kii,

⁴⁶ Jisunii rok sagoisii saasii tamle, “Pfii-o, gobah kikii gu rangii pyii aitakle!” aitiisii tamsii mpounii tai takle.

⁴⁷ Sateichii Saryiimei mei hai phyiiryiito phyii kasatpii teinii pat kalei tei ngouwo sek-kii, Saraago tam matoisii tamle, “Madou supii sapfii mpou ai kama kagameile.”

⁴⁸ Teito ai jutang karam jangpii gong ndwi kalumei hang teinii pat kalei tei ngouwo sek-kii, takou byiisii byiisii ahnyiinii nlaitu takle.

⁴⁹ sateichii mpougo kajuti katumei hangnii sateichii Galili kito mpoutai swi kagong sapwimei hang teinii matum madum ai jusii akak dhiihaisii satle.

Jisugo poigoi katu

⁵⁰ Aitoinii Arimati sii kalat Jehudimei nam namdi kito lungkalei Joseph sii kalat sapfiimei hangninii bamle, mpou ai samtak katii katingmei kak ki kahaimei mei kabi sateichii kasang kamajyiimei hang- niniile;

⁵¹ Mpounii ahnyii mah sat kalu riishii ninado tiitang karam tha gotei mazhii makle, mpou ai Saraa mah Sating sazyii kagong go koisii kalei mei hangniniile.

⁵² Sapfii mpou aipou ainii Pailat doi liitsii Jisumah katai pum tei khangle.

⁵³ Teito mpounii teitei poi m-mangsii, kamajyii kou- namaipei hangniniipii kajyii wosii, meigo kado goi kasu, kuitu kikii biit kabam roubam kikii mpougo mazyii takle.

⁵⁴ Sateichii ai-ai tiikakada piinei leimikle, sateichii bam ntak piinei leimik gongtunale.

⁵⁵ Teito mpougo kaswisii Galili kito kagong sapwimei hangteinii tai swi manangsii, roubam nei mpoupum tei kada takumpiinii kaibampo katu tei ngoutakle.

⁵⁶ Teito ahnyiinii nlaitu takle, sateichii kairum kabi pot ninado gam kamanuk thao tiikada wotakle, sateichii bam ntak piinei teinii ahnyiinii kakhatsam taiswisii bam ntak takle.