LUKNII KARYII KABI RASAM JUKAMATI 22 - KARANU KABI SAMTAM

Jisugo gitang karam pwidi kafii

¹ Aitoinii Jehudimei mah kaa- kamaju Hang-ngi sii lat kalei ahee kei hai kasu tiirok Hang-ngi tei nagong leitakle.

² Sateichii kanat kajum tingdimei ninado ajaiting- shang kati ojamei teinii mpougo kada takumpii gitangpo katu pwidi fiitu takle; kadapochiinii ahnyiinii meimoi gotei hingle.

Judasnii Jisugo schoi choikai tang karam jangpii kamazhii

³ Sateichii keariisiinakhii kak kito Judas Iskariot katupii lungtei seitan liitto takle;

⁴ Teipiinii mpounii kanat kajum atingmei sateichii kadi ka- thangmeida maasii mpounii Jisugo ahnyii dakii kada takumpiinii schoi choikai pyiitangpo katu karashiitu takle.

⁵ Teito ahnyiinii ntasii mpougo sana pyiitang lesii rashiiwo takle.

⁶ Sateichii mpounii mazhii wosii meihang kaga tinglang kak-kii, ahnyii dakii mpougo schoi choikai pyii tang karam tinglang kabi tei fiitu takle.

Jisunii kakamaju mah malot chiitang karam jangpii tiida katu

⁷ Teito ahee kaihai kasu Tiirok Hang-ngi leimik, katunii Kaakamaju Hang-ngi mah Jaonah kagi leimik tei gong takle.

⁸ Sateichii mpounii Pitar nei Jon go lang mpatsii tamle, “Nyiinii chiitang karam Kaakamaju mah takbai tei nyiijangpiinii maasii tiikada tulo.”

⁹ Teito mpoupiinanii mpou dakii tamle, “Nlenii kada kikii tiida katu bangpiinii maraipo?”

¹⁰ Teito mpounii ahnei hangna dakii tamle, “Julo, goneinii namdi kitei tatliit sekchii, mei hangninanii dwikhii pungsii goneigo kadou tangle; mpounii tat kaliit kilung tei taiswisii tat liitlo.

¹¹ Sateichii ki pumpii gotei tamlo, ‘madhiikapyii- panii godakii tam leile, Inii gubou- meigo kaswisii kaakamaju mah takbai chii njoitang karam siisang karhiiki shangtei kadaki leipo?’ sii.

¹² Teito tiida kabam alaangki shang hangninii mpounii goneigo mangou tangle; teibam kiteikii tiida wolo.”

¹³ Sateichii mpoupiinanii maa siinii mpounii mpoupiina dakii tam kabam takumpiinii doutakle, teito mpoupiinanii kaakamaju mah takbai tei tiida wotakle.

Bangpiimah takbai

¹⁴ Sateichii tinglang tei gong sek-kii, mpounii tiilamlwi kapyiimei gotei kaswisii chiitang karam jangpii bamwo takle.

¹⁵ Teito mpounii ahnyii dakii tamle, “Inii kamage kalak leh kasunakii, Jehudimei mah kaaka- maju takbai ai gonyiigo kaswisii hangkapii chii njoinyii takle!

¹⁶ Kadapochiinii Inii gonyii dakii tam leile, Saraamah sating sazyiiki teito ai-ai madougong kasuta, Inii ai-ai chiiloi lak takle.”

¹⁷ Sateichii Jisunii peektei poi wosii, Saraago hakalang pyiisii tamle, “Peek ai poisii gonyiinii njai saklo;

¹⁸ Kadapochiinii Inii gonyii dakii tam leile, Saraa mah Sating Sazyii gong kasuta, aitoisekpiinii Inii Darkhati bang mah riiti ai saklak takle.”

¹⁹ Sateichii mpounii tiirok tei poisii hakalang pyiisii, tiirak takle sateichii ahnyii dakii pyii siinii tamle, “Ai ai gonyii jangpii pyii kabam gu-tchiile, gonyiinii n-gu maningsii leitang karam jangpii ai ai tiilo.”

²⁰ Sateichii chiisang wosek-kii, tei takumpiinii peek tei poisii tamle, “Peek ai gonyii jangpiinii majoumang kapyii guzaipii katii, sat tang karam karanu samtam teile.

²¹ “Nlenii julo, n-gu schoi choikai kapyiipii bah tei tak kachii bam gam n-gu kaswisii bamle.

²² Kadapokii Meinah Sapfii Mpou teinii Saraa nii maningda kabam tei taiswisanii tai tangle, nlenii schoi choikai kapyiipii jangpiinii kamagele!”

²³ Sateichii ai tha tiitang karam ai ahnyii kakto tapiinii tiileziipo sii ahnyii roinapii hangninanii hangni- niigo n-nhiitu takle.

Kasang Kadi

²⁴ Sateikii ahnyii hang kak kito tapiigo kadi disangpiile tangpo sii kajyiitu takle.

²⁵ Teito mpounii ahnyii dakii tamle, “Lui kakimei Sagongmei teinii ahnyii phyiiryiito Apum katii mah atha tei tiile, sateichii ahnyii phyiiryiito teimaham kajum meigo kabi tiikapyiimei sii latle.

²⁶ Nlenii gonyiinii tei takum makle; nlenii gonyii kak kito kadi disangpii teinii kasana nasangpii takumpii, sateichii kadi disangpii teinii anga kangamei takum matulo.

²⁷ Kadapochiinii kadapii bibwipo, kachii tinglang kak bam kajyiipii tei manii, mak-kii nga nga kajyiipii teipo? Kachii tinglang kak bam kajyiipii tei makpo? Nlenii Inii gonyii kakto nga kangamei hangninii takumle.

²⁸ “Sateichii gonyiinii n-gu, jai kaju hang kito n-gu kaswisii lei- humle.

²⁹ Sateichii gu pfiinii Gudakii Sagong Sazyii hangninii julosii pyii kabam takumpiinii,

³⁰ gonyiinii gumah Sating Sazyii kito gumah tak kachii bam gamto kaswisii chii sak kabui jangpii, Inii gonyii dakii Sagong Sazyii julosii pyii leile.

Pitarnii mazhiilak tang karam Jisunii reipii katam

³¹ “Simon, Simon! julo, gonyiihang go seitan nii jai jutang karam jangpii kamazhii tei poiwo takle, kabimeigo kashyiimei kak kito poitaam tang karam jangpii, tha katiimeinii Gihuti tei araang kito poitaam katu ta- kumpiinii.

³² Nlenii gomah kamalum tei gakasu jangpiinii Inii gojangpii riitale, sateichii nangnii golung kaliwo takle sekchii, gosanameigo tiisangting pyiilo.”

³³ Teito Pitarnii mpou dakii tamle, “Bangpii, Inii n-go kaswisii kabang ki liit kado mak-kii katai katang tei gotai switangle.”

³⁴ Mpounii tamle, “Inii tam leile, Pitar, nangnii n-gu timakle sii tam tumkii kasuta, tingzyii ruigang kunglakle.”

Takou, sanah takou sateichii saryiikhang

³⁵ Sateichii mpounii ahnyii dakii tamle, “Inii gonyiigo takou, pichot, sana takou pungtat sulosii lang ka- mpat kak, gonyiinii mah kado taang kalak tii tiimakpo?” Ahnyiinii tamle, “Samah kado taang kalak tiimakle.”

³⁶ Teito mpounii ahnyii dakii tamle, “Nlenii aitoinii sana takou kabam mei teinii teitei pung wolo, tei takumpii takou kabam mei teinii pung wolo, sateichii samah kado kagamei teinii mpou peimani joi wosii, saryiikhang tei lyii wolo.

³⁷ Kadaponii Inii gonyii dakii tam leile, kabi rasam kito katam, mpounii kakui kama mei mah sadoi kashyii tei dou njoile sii gu kaang kito tam kabam tei kasangpii gong tangle, Kadapochiinii gu kaang kito ryii kabam tei kasangpii gong leitakle.”

³⁸ Sateichii ahnyiinii tamle, “Bangpii, julo, aiki saryiikhang hangna bamle!” teito mpounii ahnyii dakii tamle, “Mazhiibui takle.”

Jisunii Olip zang gamto kariita

³⁹ Sateichii mpounii tatpat tosii, mpounii sating kata tiikalei takum- piinii, Olip zang gam tei tatpi takle; sateichii mpou boumei hang teido mpoutai swiwo takle.

⁴⁰ Sateikii mpounii teibam kitei piwo takle sek-kii, mpounii ahnyii dakii tamle, “Gonyiinii kahem ki liit kasu tiisii riitalo.”

⁴¹ Sateichii mpounii ahnyii dato kuitu kakating baikat takii akak dhiisii tatpat tosii, kok kumsii riitale.

⁴² “He Pfii-o, Nangnii mazhii lepo- chiinii, kamage kalak mah Peek ai gudato poitoi seilo. Nlenii katalyii tiikido Inii kamaning kamarei tei tiimatu supiinii nangnii kamaning kamarei tei tiimatulo.”

⁴³ Sateichii mpougo teimaham kaikapyii sating gamto Sating gamlui hangninii mpougo mangoule.

⁴⁴ Sateichii mpou- nii swi kamage beidiju siinii kisii teisii riitale, sateichii mpou mah ralaidwi sazyii jou kamang tei zai takum takle.

⁴⁵ Sateichii kariita kiteito mpou- nii gungtu sat tosii, mpounii mpou boumeida kapat kak, ahnyii tei swi kamagesii zyiisii kabam tei ngou wosii,

⁴⁶ ahnyii dakii tamle, “Gonyii kadajangpii zyii leipo? Kahemki liit kasu tiisii gonyii gungtu riitalo.”

Jisugo jum kalu

⁴⁷ Mpounii sam tam leibangpii, julo, meimoi tei gong takle, sateichii keariisiinakhii kak kito Judas Iskariotkatupii teinii ahnyii meimoi doitei reisii Jisu go matwum tang karam jangpii mpouda tat manang liit takle.

⁴⁸ Nlenii Jisunii mpou dakii tamle, “Judas, Nangnii Meinah Sapfii Mpou gotei matwum binapii schoi choikai ai lezii takpo?”

⁴⁹ Teito mpou dato kabam mei hang teinii pat tang karam tei ngou wosii ahnyiinii tamle, “Bangpii nyiinii saryiikhang teipii tat lopo?”

⁵⁰ Sateichii ahnyii kak kito mei hangninanii kanat kajum Tingdipiii ki kaleipii khoi ajiilam pang tei tat ndang aitakle.

⁵¹ Nlenii Jisunii tamle, “Aitiiloi sulo!” teito mpounii mpou khoi tei dengpyii siinii, ah gotei tii mbipyii takle.

⁵² Sateichii Jisunii kanat kajum Tingdimei, Jihudimei ndwi kito kadi kathang tiisii kalei ninado katingmei mpougo jumtang lesii kagongmei dakii tamle, “Kachui karagameigo jumtang karam takumpiinii, saryii- khang ninado tinglak poisii gonyiinii tatpat lei takpo?

⁵³ Inii gonyiigo Saraa Kamaning kilungto sating kata kaswisii kabam tinglang kak teinii gonyiinii gu gamkii bah kai- makle. Nlenii ai-ai gonyiinii tiitang karam tinglang ninado kamyii mah pumtei katii tinglangle.”

Pitarnii Jisugo mazhii kasu

⁵⁴ Teito ahnyiinii Jisugo jum wosii, Kanat kajum Tingdipii ki kalung tei pangliit takle, sateichii Pitar tei akak dhiihaisii mpoutai swi leile;

⁵⁵ Sateichii ahnyiinii ki kajang teito mi tiisii kaswisii bam leibang- pii, Pitar tei liit ahnyii kak bam takle.

⁵⁶ Sateichii Pitarnii mi lumsii bam leibangpii, sapwimei hangni- nanii mpougo ngou wosii, tiigatpii jumadaisii, “Ai sapfii mpou aido Jisutai swi leile,” sii tamle.

⁵⁷ Nlenii mpounii teitei mazhii supii tamle, “Sapwi mpei, Inii mpougo tido timakle.”

⁵⁸ Sateichii shangniikii sousek-kii, sapfiimei hangninanii mpougo ngou wosii tamle, “Nangdo ahnyii kak kito mei hangniniile.” Nlenii Pitar nii tamle, “Sapfii mpou, Inii makle.”

⁵⁹ Sateichii pung- kii kakum sou kaleitai, sapfiimei hangninanii teisii tamle, “Kasangpii, ai sapfii mpou aido Jisugo kaswi leile; kadaponii mpou ai Galili kito kalungmeile.”

⁶⁰ Nlenii Pitar nii tamle, “He sapfii mpou, nangnii tam kalei I-timakle.” sateichii mpounii tam leibangpii, ruigang teinii kungbak takle.

⁶¹ Sateichii Abangpiinii nryii- gongsii Pitargo jule, teito “Tingzyii ruigangnii kung kasunakii nangnii n-gu hangtum kashang tiisii mazhii- lakle sii mpougo Bangpiinii tam kabam samtam tei Pitar nii maning gong takle.”

⁶² Teito Pitar nii ki kajang patsii lung hungsii hatle.

Jisugo dzyii nuisii lak katu

⁶³ Sateichii Jisugo koi kaleimei teinii mpougo dzyii nuisii laakle;

⁶⁴ Sateichii ahnyiinii mpougo mik kajyii wosii n-nhiile, “Tanii n-go laak ziipo? tamlo!”

⁶⁵ Sateichii ahnyiinii kaki kaki sam kashyii hangkii mpou phyiiryiikii tamkai pyiile.

Samtak katii katingmei doikii Jisugo pangkakhii

⁶⁶ Sateichii tingva liit sek-kii, samtak katii katingmei, katunii Kanat kajum tingdimei sateichii ajaitingshang kati ojamei hang gong kadou takle. Sateichii ahnyiinii mpougo ahnyii mah samtak katii katingmei mah ndwini pangkhiisii tamle,

⁶⁷ “Nang Krista tei lepochiinii, nyii dakii tamlo.” Nlenii mpounii ahnyii dakii tamle, “Inii gonyii dakii tam kido gonyiinii malumsang malum lakle;

⁶⁸ sateichii Inii gonyiigo n-nhii kido gonyiinii khesang khelakle.

⁶⁹ Nlenii aitoi sekpiinii Meinah sapfii mpou teinii Saraa mah teimaham mah ajiilam pang teito bamtu tang takle.”

⁷⁰ Sateichii ahnyii hangpii tamle, “Teitii lepochiinii, Nang Saraa nah sapfii mpou teide?” Sateichii mpounii ahnyii dakii tamle, “I-le katu tei gonyiinii tam takle.”

⁷¹ Teito ahnyiinii tamle, “Nyiinii rei sakchyii kaki kadapei fiitang karam leipo? Kadapochiinii mpou mwiki sekto katam sam tei nyiinii shiitakle.”