LUKNII KARYII KABI RASAM JUKAMATI 20 - KARANU KABI SAMTAM

Jisumah pumtei kaang kito kakachyii

¹ Tingneikii Jisunii Saraa ka- maning kilungto meigo rali- pyiisii kabi rasam tei ralipyii leibangpii, Kanat kajum atingmei, ajaitingshang kati ojamei teinii katingmeigo kaswisii gong;

² mpou dakii tamle, nyii dakii tampyiilo, “Nangnii kadapei pum-tei leisii aihang ai tiileipo? mak-kii pum-tei ai tanii n-go pyiipo?”

³ Teito mpounii ahnyii dakii khekalatle, “Inii gonyiigo samkang hangninii n-nhiile, n-gu tampyiilo,

⁴ Jon dwi mpum kapyiipii tei sating gamto manii meinah datopo?”

⁵ Sateichii ahnyii roinapii ahnyii kakto karashiisii tamle, “Nyiinii sating gamto lesii tam lepochiinii, dajangpii gonyiinii mpougo malum makpo? sii mpounii tam tangle.

⁶ Nlenii nyiinii meinah dato lesii tam lepochiinii, meihangpii nyiigo kuitu rot tangle, kadapokii ahnyii hangnii Jon aigo Lungkakalingmei hang- niniile katupii malumle.”

⁷ Teipiinii ahnyiinii kada kitopo timakle, sii khekalat takle.

⁸ Sateichii Jisunii ahnyii dakii tamle, “Kadapei pum-tei leisii Inii aihang ai tiileipo katu Iniido gonyii dakii tampyii lakle.”

Darkha toipyiimah ndasam

⁹ Sateichii mpounii meimoi dakii ndasam ai tam tutakle: “Mei hangninanii darkha toipyii hangninii tiiwosii, lu liipeimei dakii pyii aisii sazyii hangniniiki tinglang kathang- kii tat tutakle.

¹⁰ Sateichii tinglang tei gong sek-kii, lu liipeimei teinii darkha toipyii lu mah riiti kiteito mpougo pyii matu tang karam jangpii mpounii kikaleimei hangni- niigo ahnyiidakii langkaile, Nlenii lu liipaimei teinii ahgo lak lakpyii siinii mpougo bah marongpii mpatpyii takle.

¹¹ Sateichii mpounii kikalei mei hangniniigo langkai loile; ahnyiinii mpougodo lak lakpyii siinii, tii nrou tii sangam pyii siinii bah marongpii mpatpyii takle.

¹² Satei- chii mpounii hangtum kashang tiisii langkai loile, ahnyiinii ah godo datriit riitpyii takle ninado rat toi aitakle.

¹³ Teito darkha toipyiimah apumpii teinii tamle, ‘Inii kadapei tiitangpo? Inii lungkasyii gunah sapfii mpou gotei langkai tang takle; ahnyiinii mpougo sadzyii ngariit tiido malahle.’

¹⁴ Nlenii lu liipeimei teinii mpougo ngouwo sek-kii, ahnyii mei hangninanii hangninii dakii tamle, ‘Ai-ai Apumpii nah sapfii mpou teichiile, Nje mpougo gi aile, teito nyiinii mpou mah kabam hang- tei touwo buile.’

¹⁵ Teito ahnyiinii mpougo gi aisii, darkha toipyiilu kiteito rat toi aitakle. Teijangpiinii darkha toipyiilu mah apumpii teinii ahnyiigo kadapei tiitangpo?

¹⁶ Mpounii gongsii lu liipeimei gotei tiimaga ai tangle, sateichii riitilu tei mei kaki- mei dakii pyiitoi aitangle.” Ahnyiinii teitei shiiwo sek-kii, ahnyiinii tamle, “Saraa nii mazhii makle!”

¹⁷ Nlenii mpounii ahnyiigo jusii tamle, “Teitii lepochiinii, ai ‘Ki katiimei teinii mazhii kasu kuitu teinii, hang kak kito arou katii tiisang aki-ka mah kuitu tei tiitakle.’ sii ryii kabam ai kadapeipo?

¹⁸ Kuitu tei phyiiryiito kakou hangtei pakchet chet tangle, nlenii teiteinii mei kata hangninii gam takmang lepochiinii teitei karyiichet chet toi ai tangle.”

Aha shyiitang karam kaang kito n-nhii katu

¹⁹ Teito ajaitingshang kati ojamei sateichii kanat kajum tingdimeinii teitinglang sek-kii, mpougo jumtang karam jangpii tiile, nlenii ahnyii teinii meimoi gotei hingtakle. Kada- pochiinii mpounii ahnyii phyiiryiikii ndasam ai tam leile katu tei ahnyiinii titakle.

²⁰ Sateichii ahnyiinii shoisii mpoumah samtam kito jum wosii, teimaham jum kaleimei hang satei- chii Governor dakii mpougo pyiitoi ai tang karam jangpii, kasang jai katii meijai tingshang kajumeigo langkai takle.

²¹ Sateichii ahnyiinii mpougo n-nhiile, “Madhiikapyiipii, Nangnii kasang tei tampyii ralipyiile sateichii meiju jusii kagu kaphang tiileimakle, nlenii Saraa mah kasang pwidi tei tam ralipyiile katu tei nyiinii tile.

²² Nyiinii Kaisor go aha-kapyii ai ajai manii ajaimakpo?”

²³ Nlenii ahnyii mah lungswi tei ngou wosii, ahnyii dakii tamle,

²⁴ “N-gu sanahgyii hangninii mangoulo, tamah param ninado zei tei leipo?” ahnyiinii tamle, “Kaisor mah.”

²⁵ Teito mpounii ahnyii dakii tamle, “Teitii lepochiinii, Kaisor mah tei Kaisor go, sateichii Saraa mah tei Saraa go pyiilo”

²⁶ Sateichii ahnyiinii meidoi teito mpou mah samtam kiteito jumwo lak takle; nlenii ahnyiinii mpou mah khekalat kapyii samki teito sung gasanii malhii supii bam takle.

Taisii ringkhii tang karam kaang kito n-nhii katu

²⁷ Sateichii katai kito ringkakhii ai galesii tam kalei sadhumei kangkanii mpouda gongsii n-nhiile.

²⁸ “Madhiikapyiipii, Moses nii nyii jangpii ryiibamle, asanapii hangni- nanii nou tiiwosii nah gasii mpou nougo taidek lepochiinii, mpou taikarhiimei teinii mpou nou gotei manou wosii mpouki sanamei jangpii atat-areng tei mbamlo ziile.

²⁹ Tinglang hangniniiki ndou sana- mei sana bamle, katingpii tei nou tiiwosii nah gasii taitakle.

³⁰ Teito mpou taikarhiipii hangna kashangpii teinii sapwi mpei gotei manouwo takle, sateichii mpoudo nah gasii taitakle.

³¹ Hangtum kashangpii teiniido tei takumpii pat takle, teitiisii sanamei sana tei atat lusupii taiga takle.

³² Ka- lui kito sapwi mpei teido taitakle.

³³ Teijangpiinii ringkakhii piinei leimik sapwi mpei tei tapii noule tangpo? Kadapokii ahnyii sanamei sana teinii mpoupeigo manou takle.”

³⁴ Jisunii ahnyiigo khekalatle, “Sazyii pouryii meinii kalakna tiile,

³⁵ Nlenii katai kito ringkhiiloi tang karam jangpii kalai kalu sapwimei sapfiimei ninado gongtang karam aha kana kito lungtang karam mei teinii kalakna tiilakle.

³⁶ Ahnyii teinii sating gamluigo njoile, satei- chii tailakle, ahnyiinii Saraa nah meile, kadapochiinii ahnyiinii katai kito ringkhii takle.

³⁷ Sateichii Moses niido Bangpiigo, Abraham, Isak sateichii Jakob mah Saraa sii kalat tinglangki, kataimei ringloi ziilesii mpounii riingum kito mi kashong mah rasam kiteito mpou pum sekpiinii saa mpatpyii takle.

³⁸ Teipiinii Saraanii kataimah Saraa makle, nlenii karingmei mahle, Kadapochiinii mpou mik hoi kito matum madum ring ziile.”

³⁹ Teito ajaitingshang kati ojamei kangkanii khekalatle, “Madhiikapyiipii, nangnii tiigatpii khepyii takle,”

⁴⁰ Kada- pochiinii ahnyiinii mpougo nlailoisii kaki hangninii kado n-nhii hing takle.

Messaiya mah kaang kito kachyiinhii katu

⁴¹ Nlenii mpounii ahnyii dakii tamle, “Kada takumpiinii Krista ai Devit nah sapfii mpou lesii ahnyiinii tamwo tangpo?

⁴² Kadapochiinii Devit sekpiinii tam kamatoi lhii kiteito tamle, Abangpiinii gu Bangpii go tamle,

⁴³ Inii n-go ngou karoumeigo gupikangkii kai kasuta, gubah ajiilamto bamlo!

⁴⁴ Devit nii mpougo Bangpii sii latle; teitii lepochiinii kada takumpiinii mpou ai Devit nah tangpo?”

Jisunii ajaitingshang kati ojameigo tiiloi sulosii katam

⁴⁵ Sateichii meihangnii mpougo khoiking leibangpii, mpounii mpou boumei dakii tamle,

⁴⁶ “Peijou ka- thang njousii tatpat tatliitsii kalei- mei, sateichii meimoi ndwi katuki, meinii kamata kamarei, Jehudimei mah ndwi kito ninado takbai nito bam kasagoi bam kamarei mei,

⁴⁷ Kamipwimei hangki kasou katu, sateikii Kabijai tiisii thaangsang kariita ajaitingshang kati ojamei dateito sakai wolo, ahnyii teinii kisii kem kama kadi tei doutangle.”