LUKNII KARYII KABI RASAM JUKAMATI 15 - KARANU KABI SAMTAM

Maga kalei Jaonah

¹ Aitoinii aha-kahamei sateichii kem kama katiimei hangnii sam shiitang karam jangpii mpouda gongle.

² Teito Kabijai katiimei ninado jaitingshang kati ojamei tei- nii manam maraangsii tamtu takle, “mei aipounii kem kama katiimeigo lukaile sateichii ahnyiigo kaswisii mah chiile.”

³ Teipiinii mpounii ahnyiigo ndasam ai tam pyiile:

⁴ “Gonyii kak kito mei hangninii mah Jaonah haikii kabam kiteito Jaonah hangninii maga ai-lepochii- nii, reksokchyiisii sokchyii nkhii gotei sazyii kamarong kikii kaibam siinii, maga kalei Jaonah gotei dou kasuta fiilak tang karam ta leipo?

⁵ Sateichii mpounii teitei douwo sekchii ntasii mpou kachyii gamkii kaiwole;

⁶ sateichii mpounii ki gong sek-kii, mpou kanghemei sateichii ki tiinanapamei hang go lat magong siinii, ahnyii dakii tamle, ‘N-gu kaswisii ntale, dapochiinii maga kalei gu Jaonah tei Inii douwo takle.’

⁷ Inii gonyii dakii tam leile, tei takumpii, lung kalisudo kamazhii, kasang kamajyiimei reksokchyiisii sokchyii-nkhii sungnii kem kama katiimei hangninanii lung kali kalu jangpiinii sating gamto nta tangle.

Maga kalei sanahgyii

⁸ “Mak-kii sapwimei hangninanii sanahgyii kearii kabam kito, mpou- peinii sanahgyii hangninii maga ailepochiinii, thaomi maseisii ki kalung beksii teitei dou kasuta fiilak tang karam sapwimei ta leipo?

⁹ Sateichii teitei douwo sek-kii, mpoupeinii mpoupei kanghemei ninado ki tiinaniipamei hang go lat magongsii tamle, ‘N-gu kaswisii ntale, kadapochiinii maga kalei gu- mah sanahgyii tei Inii dou wotakle.’

¹⁰ Tei takumpiinii Inii gonyii dakii tam leile, Kem kama katiimei hangninanii lung kali kalu jangpii Saraa mah Sating gamlui hang doito ka-nta teile.”

Maga kalei nah sapfii mpou

¹¹ Sateichii mpounii tamle, “Mei hangninii kinah nah sapfiimei hangna leile.

¹² Teito tiinapii teinii mpou Pfii dakii tamle, ‘Pfii-o, gumah luha tei n-gu jaipyiilo,’ teito Pfii teinii mpou mah mahbam tei mpou nah hangna kak-kii njaipyii aitakle.

¹³ Tinglang thang supii, nah sapfii mpou tiinapii teinii mpou mah kabam kalei kaga tei poi nkomsii, sazyii kadi hangniniiki tatpat takle; sateichii teibam kiteito mpounii miitou kasu tiilung lungsii mpou mah kalei hangtei tiimaga lahok aitakle.

¹⁴ Sateichii mpounii kalei hangtei tiitoi lahok aisek-kii, teiki sazyiiki tak kateeng tei pat takle, sateichii mpou tei mah kado gatakle.

¹⁵ Teipiinii mpounii tatpat siinii teiki sazyiiki ranam meinah hangniniiki manaa takle, ahnii mpougo ah-lu kikii bak koilosii langkai takle.

¹⁶ Sateichii mpou ai baktak tei chiisii mpoumoi maghii matunyii takle; teitii kido meinah kaniido mpougo samah kado seisu takle.

¹⁷ Akatpii mpounii mpou swiki maning gong siinii tamle, ‘Gu pfii nii janglaisii kikaleimei kadaziikanii moi kama- ghii tiirok tei dousii ninado masaksii bamle, nlenii Inii aikito moi mazyiisii galeziitakle!

¹⁸ Inii tusat tosii gu pfiida nlaigong tang takle, sateichii Inii mpou dakii tam tangle, “Pfii-o, Inii Saraa doito sateichii godoito ma takle.

¹⁹ Inii gonah sapfii mpou lesii lat kajyii sutakle, nangnii janglaisii goki kaleimei hangninii takumpii n-gu poi seilo.’ ”

²⁰ Sateichii mpounii tusat tosii mpou pfiida nlai gongtu takle. “Nlenii mpounii akak dhiilei- bangpii, mpou pfiinii mpougo ngouwo takle ninado lungsyii takle, sateichii mpounii pakpatsii nah gotei gaiwo takle sateichii matwum takle.

²¹ Teito nah sapfii mpou teinii mpou dakii tamle, ‘Pfii-o, Inii Saraa doito sateichii godoitodo ma takle; Inii gonah sapfii mpou lesii lat kajyii sutakle.’

²² Nlenii pfii teinii mpouki kaleimei dateikii tamle, ‘Peijou kathaang kabi bisang tei kalangsii poipat mpougo njoukai pyiilo; sateichii mpou bah jungna kikii bah rangkat kaipyiilo, sateichii mpoupi kikii pichot kaipyiilo;

²³ Sateichii twomnah luikabi tei baagongsii gi ailo, sateichii nje, nyiihangnii chii- sanii nta nlangle.

²⁴ Kadapochiinii gunah sapfii mpou ai tai kalei kito ringloi takle,’ sateichii ahnyiinii nta nlangtu takle.

²⁵ “Teitinglang kitei mpou nah sapfii mpou katingpii tei lubam kito leile, sateichii mpounii gongsii ki manang sek-kii, lhii tiisii rale tiikalei khoitei mpounii shiitakle.

²⁶ Teito mpounii kikaleimei hangniniigo lat tosii, pat kaleihang ai kadapeiposii n-nhiile.

²⁷ Teito kikaleipii teinii mpou dakii tamle, ‘Go taikarhiipii tei ki nlaigong takle, teijangpiinii go pfiinii, mpougo katii kanhii gasii dou kalu jangpiinii, luikabi twomnah tei gipyii takle.’

²⁸ “Nlenii mpounii rarhii takle sateichii ki kalung liit sutakle, teito mpou pfiinii patsii mpougo liitlosii hemtakle.

²⁹ Nlenii mpounii mpou pfiigo khekalatle, ‘Julo, tingkum aitiiziikii Inii gu nga ngasii bamle, sateichii nangnii kakhatsam tei Inii madou kado swikasu tiilei makle; teitii kido Inii gu kanghemeigo kaswisii nta nlang njoitang karam jangpiinii Amyiinah hangninii kado nangnii n-gu pyiisang pyii leimakle.

³⁰ Nlenii gonahsapfii mpou aipounii sapwimei karalumeigo kaswisanii gomah mahbam hangtei tiimagasii nlai kagong kak, nangnii mpou jangpii twomnah luikabi tei gipyiile!’

³¹ Teito mpou pfiinii mpou dakii tamle, ‘Gunah sapfii mpou nangnanii n-gu taksupii kaswisii bamle, sateichii gumah kalei hangtei go- mahle.

³² Nyiinii nta nlang kajyiile, kadapochiinii ai, go taikarhiipii ainii katai kito ring takle; sateichii maga kalei kito douwo takle.’ ”