LUKNII KARYII KABI RASAM JUKAMATI 12 - KARANU KABI SAMTAM

Kabijai katiimei dato sakai wolosii katam

¹ Tei tinglangki mei tang tang- pii gong ndwi siinii, hangni- nanii hangniniigo kapiidiit tusek-kii, Jisunii karei reisangki Mpou boumei dakii tamle, “Kabijai katiimei mah Ahee kiteito gonyii sakai wolo, katu- nii ahnyii mah kabijai katii goteile.

² Sateichii gombingsii tam mpat lak tang karam samah kado gale, sateichii tilak tang karam kamakum samah kado gale.

³ Teijangpiinii gonyiinii kamyii kito tam kalei hangtei kava kito shii tangle; sateichii kamakum kilungto gonyii- nii khoi kikii tam kalei hangtei ki kapouryii gamto saa mpat tangle.”

Tago hing tangpo

⁴ “Gu kangmei, Inii gonyii dakii tam leile, pumgo giwosii, tei taito samah kado tiipei kalak ahnyiigo hing sulo.

⁵ Nlenii gonyiinii tago hing tangpo katu Inii gonyii dakii tamle, gi kaleitai mibam kikii toikai tang karam mah teimaham kalei Saraa gotei hinglo; nle, Inii gonyiigo tam leile, mpougo hinglo.

⁶ “Paisa pumna jangpii Nkinah mangii tei joimakpo? Teitii kido Nki- nah hangniniigo katangdo Saraanii mangaipyii makle.

⁷ Sateichii go phyii- taam hang katangdo pak fiitakle, teijangpiinii hing sulo; gonyiinii nkinah hang sungdo mai teeng kile.

Tam ka-mpat sateichii Kristago mazhii kasu

⁸ “Sateichii Inii gonyii dakii tam leile, meihang doito n-gu mazhii katumei hang gotei meinah sapfii mpou teiniido Sating gamlui doito mazhiipyii tangle.

⁹ Nlenii meihang doito n-gu mazhii kasumei gotei Saraa mah Sating gamlui doito Mei- nah Sapfii Mpou teiniido mazhiipyii lakle.

¹⁰ “Sateichii Meinah Sapfii Mpou phyiiryiikii sam katam mei hang go magapyii tangle; nlenii Rangii kama- tei phyiiryiikii tam kamashyiimei goteinii magapyii lakle.

¹¹ “Sateichii ahnyiinii gonyiigo Jehudimei mah Ndwiki, Sateichii sazyii kakoirakmei sateichii teima- ham kajum meihang doi pangkhiisii jai kaju kak, gonyiinii kadapei kada takumpiinii khela tangposii swi kamage sulo.

¹² Kadapochiinii Rangii Kamateinii teiki tinglang sek-kii, gonyiinii kadapei tam tangpo katu tei gonyiigo tam ralipyii tangle.”

Kapang mah kanipii mah ndasam

¹³ Sateichii meimoi kak kiteito mei hangninanii mpou dakii tamle, “Madhiikapyiipii, gu pfiinii mah ma- sakdek kabam tei nei shana kakkii njaitang karam jangpii gusung katingpiigo tam seilo.”

¹⁴ Nlenii Jisunii mpou dakii tamle, “He mei, gonei phyiiryiikii samtak katii mak-kii gonei hangnamah mah njai katu jangpii apum tii kamajyii tei tanii n-gu kaipyiipo?”

¹⁵ Teito Mpounii ahnyii dakii tamle, “Sakai wolo, kadapochiinii meinah mah karing tiilung tei mpoumah mahbam kamoi kitei bam makle.”

¹⁶ Teito Jisunii ahnyii dakii ndasam hangninii tamle, “Mah kanimei hangninii mah sazyii kito samhii rachet hangkii dou wole.

¹⁷ Teito mpounii mpou roinapii maningtu takle, ‘Inii gumah samhii hang ai kakaini gatakle, Inii kadapei tiitangpo?’

¹⁸ Mpounii mpou roinapii tamle, ‘Inii aitii tang takle; Inii gu tiibou hangtei ratoisii, kisii kadi tiimakhii tang takle, teito gumah samhii sateichii gumah pot kaki kaki hang kaitang takle.

¹⁹ Sateichii Inii gu rangiigo tam tangle, Rangii, Inii gojangpii mah hangkii koibam takle tingkum hangkii jangpii; ntak kiilo, chiitulo, sak tulo, samousii nta tulo.’

²⁰ Nlenii Saraa nii mpou dakii tamle, ‘He kapangpii! tingnei tinghumkii gomah rangii tei godato poitoi ai tang takle; teito nangnii tiida kabam mah hangtei tamah tangpo?’ ”

²¹ Sateichii Jisunii tamle, “Saraa mah mik doito mah nisupiinii mpou- jangpii roinii kani kahii poi nkomsii kalei tei aitakumle.”

Saraa go malumlo

²² Sateichii mpounii mpou boumei dakii tamle, “Aijangpiinii Inii gonyii dakii tam leile, ringtang karam jangpii gonyiinii kadapei chiitangpo sateikii gonyii pum jangpiinii kadapei nhiitangpo sii lungnaang sulo.

²³ Kadapochiinii chiitak sung Rangiinii kile, sateichii peimani sung pumnii kile.

²⁴ Sagak hang gotei julo, ahnyiinii ralyiido ralyii leimakle, rachetdo rachet makle, ahnyiinii boudo boushiido gale, nlenii Saraanii ahnyiigo pyiichiile. Gonyiinii ruinah sung kadaziikapii mai teeng kipo?

²⁵ Sateichii gonyii tanii lungnaang katu teipii mpou tiilung kikii jungna takii tiimathang kiwo buipo?

²⁶ Teipiinii hang kakto kacheng katangdo gonyiinii tiipeiwo lak lepodinchiinii, kaki kaki jangpii gonyiinii kada tiisii lungnaang leipo?

²⁷ Siiramto lung kalei hiipa gotei julo, kada takumpiinii ahnyiinii lung leipo? Ahnyiinii thatamakle, alangdo tiileimakle; nlenii gonyii dakii Inii tam leile. Sagong Solomon katang- piinado ai hiipa ngou kabi hangninii takumpiinii ngou kabi peimani tei kaimakle.

²⁸ Sateichii tingnei ringsii kalei, supounei mibam kikii toikai aitang karam Aningki hiipa gotei Saraanii aiziikii hungsii tiipyii lepo- chiinii; he kamalum tang kasumei, mpounii gonyiigo kisii peimani kaipyii lakpo?

²⁹ “Sateikii gonyiinii kadapei chiitangpo ninado kadapei sak tangpo sii fii sulo, sateichii gonyii lung maning kariirhii sulo.

³⁰ Ka- dapochiinii sazyii pouryii luihangnii mah aihang ai fiile; sateichii go pfii teinii teihang tei nangnii maraile katu tei tile.

³¹ Teijangpiinii mpou mah Sating Sazyii gotei fiilo sateichii mahlyiihang ai gonyii dakii kaipyii tangle.

Sating gamto mah kani

³² “Hing sulo, Jaonah kachengmei! Kadapochiinii gonyii dakii sating sazyii pyii katu tei gonyii Pfiinii kamarei teile.

³³ Gonyii mah kalei hangtei joitoisii sana tei kagameigo pyiitoi ailo, ham kalak sana takou tei gonyii jangpii tiiwolo; katunii kara- gameinii gongpeiwo kalak, karak niido tiimaga peiwo kalak, Sating gamkii gonyii mah kani kahii tei poi ndwi wolo.

³⁴ Kadapochiinii gonyii mah seh sana kalei nitei gonyii lung teido leisang leitangle.”

Ki kaleimeinii koisii kabam

³⁵ “Gonyii sakai wolo, sateichii thaomi maseisii bamlo.

³⁶ Sateichii Myiikapang mah takbai ki teito ahnyii mah Apumpiinii nlaigongsii kikam kakhii katu tinglang kak, ahnyiinii mpoujangpii kalangsii ki kam latpyii tang karam jangpii koisii kabam mei takumpii gonyiinii koilo.

³⁷ Apumpiinii nlai kagong tinglang kak kikaleimei mik raksii ninado tiidasii kalei dou kalumei tei doibile. Inii gonyii dakii kasangpii tam leile, mpounii peijou loktoi takpokii, chiitang karam jangpii ahnyiigo mbam siinii mpounii patsii ahnyiigo nga ngapyii tangle.

³⁸ Sateichii mpounii hangna kashang ju kagong ninado hangtum kashang ju kagong tinglang kak gong ahnyiigo aitiisii ngouwo lepochiinii ahnyii tei doibile.

³⁹ Sateichii ai tilo, karagameinii kadadou gong tangpo katu tinglang tei ki apumpiinii tilepochiinii, mpounii mpou ki tei toi mareisii ki tei ram malu lakle.

⁴⁰ Gonyiido tiidasii bamlo, kadapochiinii Meinah Sapfii Mpou teinii gonyiinii maning kasu tinglang kak gong tangle.”

Maning kamakhang mak-kii maning makhang kasu ki kaleimei

⁴¹ Sateichii Pitar nii tamle, “Bangpii, nangnii tam kalei ndasam ai nyiigo manii, mak-kii meihang godo tam leipo?”

⁴² Teito Bangpiinii tamle, “Teitii lepochiinii tapii tei malum kabui ninado kasakai ki kaleipiipo? Teiteinii ki apumpiinii kalung mah sanglosii mei hangniniigo kaibam taklepokii mpounii kikaleimei kaki- mei hang go tinglang tiisii kachii kasak jaipyiisii kabampii teile.

⁴³ Mpou pumpiinii nlai kagongki tei takumpiinii dou kalumei tei doibile.

⁴⁴ Kasangpii Inii gonyii dakii tamleile, mpou pumpiinii mpou mah kabam hangtei sanglosii mpou phyiiryiikii kaipyii tangle.

⁴⁵ Nlenii ki kaleipii teinii, gumah Apumpii teinii tinglang kathaangkii sousii gongtang lesii mpou lung kito tamsii maning taklepokii, ki kaleimei kakimei sapwi sapfii gotei laaksii sateichii chii sii saksii panhiitu lepo- chiinii,

⁴⁶ ki kaleipii teinii maning kasu piinei ninado tikasu tinglang kak tei ki apumpii teinii nlaigong tangle. Mpougo jaina tiisii rumdang tangle sateichii katam swikasumei mah sadoi kashyiimah njai tei mpou godo doumatu tangle.

⁴⁷ “Sateichii mpou pumpiimah kamaning kamarei tei tiwosanii, da tiida kasu sateichii mpou mah apum- piinii kamaning kamarei taiswisii tiikasu ki kaleipii gotei dat m-moi tangle.

⁴⁸ Nlenii mpou ki apumpii mah kamaning kamarei tei tisupiinii, dat katu dou kamajyii tha katii ki kaleipii gotei dat matam tangle; sateichii hangkii pyii kabam mei dateito kisii poile tangle.

Titang karam tinglang

⁴⁹ “Inii sazyii pouryiikii mi kaitang karam jangpii gongle, sateichii aitoisekto mi sungpat takpochiinii, Inii kamaning kamarei tei kadapeipo?

⁵⁰ Inii dwi mpum tang karam hangninii leile, sateichii ai-ai gong kasuta Inii kadaziikapii kamage tangpo!

⁵¹ Sazyii pouryiikii kamajung pung gong tang karam jangpii Inii gong leilesii gonyiinii maning leipo? Inii gonyii dakii tam leile, makle, nlenii njairiit riit tang karam jangpiile.

⁵² Kadapochiinii aitoi sekpiinii mpung hangninii kito mei mangii kalei tei jai mangii tiisii kapak tangle; hangtum teinii hangna go sateichii hangna teinii hangtum go kangourou tangle.

⁵³ Apfiimei teinii ahnyii nah sapfiimei hang gotei kapak tangle, sateichii nah sapfiimei hang teinii ahnyii pfiimei gotei mazhii lakle. sateichii apwimei teinii ahnyii nah sapwimei gotei mazhii lakle. Hneimei teinii ahnyii nah noumei gotei mazhii lakle; sateichii nah noumei teinii ahnyii hneimei gotei mazhii lakle.”

⁵⁴ Sateichii mpounii meimoi dakiido tamle, “Leimik kaliit lamtui teito mongjyii chyii kapat tei gonyiinii ngou wosek-kii, ‘sating ryiitang takle’ sii gonyiinii tambak leile, sateichii teitei teitiisii patle.

⁵⁵ Sateichii lamka lam tuito tingkai gwipi sek-kii, ‘tingthang tiigat tang takle’ sii gonyiinii tamle, sateichii teitei patle.

⁵⁶ He kabijai katiimei! gonyiinii sazyiigo jusii ninado sating go jusii tinglang tei tiwole. Nlenii tingneishang mah tinglang ai gonyiinii tipei kalak ai kadapei jangpiipo?

Gomah ngoukarou meigo rahet wolo!

⁵⁷ “Sateichii kadapei katii teinii majyiipo katu tei gonyii roinapiinii kada tiisii maning mashak makpo?

⁵⁸ Mei kata hangninanii n-go siiset matusii Samtak ki pangkhii lepo- chiinii, Samtak ki liit kasunakii nangnii mpougo kaswisii pwidi lamto tat leibangpii siiset tei karashii matei ailo, suleponii mpounii n-go samtak katiipii doikii chyiimaa tangle, sateichii mpounii n-go darga- mei bah kikii pyii aitangle; sateichii n-go kabang kikii kai aitangle.

⁵⁹ Inii godakii tam leile, Nangnii mbang tang karam sana tei matei kasuta, teibam kito nangnii patsang patpeiwo lakle.”