LUKNII KARYII KABI RASAM JUKAMATI 1 - KARANU KABI SAMTAM

¹ Lungkasyii Theophilas: Nyii kakto pat kalei nha aigo mei moinii ryiisii bamtakle.

² Karei kito mik sekpiinii kangoumei sateichii teisam tamsii kalei meinii nyii dakii tam kapyii tei ahnyiinii ryiisii leile.

³ Teipiinii teimaham kadipii, pat kaleihang ai Inii karei reisang kito ti kalu taiswisii, Inii gojangpii adoidoi tiisii ryiikapyii ai bitanglesii ma- ningle.

⁴ Dapochiinii nangnii madhii kaluhang mah kasang tei tiwo kabui jangpiinii.

Jon dwi mpum kapyiipii manaa tang karam sam reipii kamati

⁵ Herotnii Judiya ki sagong pung kalei tinglang kak, Abija hemei, azei Zakaria sii kalat kanat kajum Ating- mei hangninii leile, sateichii mpou nou tei Aron nah sapwi mpei teile; Mpoupei zei tei Ilizabetle.

⁶ Ahnei hangna tei Saraa doito kasang kamajyii tiilung lungsii Bangpii mah Ajaitingshang sateichii Kakhat kapyii samtam hang gotei majaisii lung leile.

⁷ Sateichii Ahnei tei nah gale, kadapochiinii Ilizabet tei Saraa niigale, sateichii ahnei tei hangkapii tingtakle.

⁸ Tingneikii Zakarianii tingnei tingneikii tha tiisii kalei kito mpou leng tei poisii Saraa kilungto kanat kajum Atingmei hangninii tha tiisii leile.

⁹ Kanat kajum Atingmei jai taiswisii, Bangpii mah kakhatbam kitei liitsii makam ranuk karu tei mpou doiki tatakle. Teipiinii mpounii Saraa Bangpii kilungtei liit takle.

¹⁰ Sateichii makam ranuk tei rukalei kak, mei moinii ki kajangto matasii bamle.

¹¹ Sateichii Sating gamlui hang- ninanii mpouda hum, makam ranuk rukalei Saraago kakhatbam ajiilam teito sat takle.

¹² Zakaria teinii mpougo ngouwo sek-kii, saram takle sateichii hingtakle.

¹³ Nlenii sating gamlui teinii mpougo tamle, “Hingsulo” Zakaria, Saraanii gomah kariita tei shiitakle, sateichii gonou Ilizabet teinii nah sapfiimei hang- ninii mpung tangle, mpougo nangnii Jon sii lat tangle.

¹⁴ Nangnii daziikii nta ranga tangpo; sateichii kakimei teinii daziikii nta tangpo mpougo lung m-mang sekchii.

¹⁵ Mpounii Bangpii mah mik doito kadi kathang- mei hangninii mitangle, mpounii Darkhati dwi sateichii Jou saklakle, mpougo lung kalu sekto rangii kamateipii tokryii tangle.

¹⁶ Sateichii mpounii Isrelmeinah hangkiigo Bangpii ahnyii Saraada pang nlai- gong pyiitangle.

¹⁷ Sateichii Apfiimei mah lungtei Anahmei dakii pyii matu tang karam jangpii, sateichii katam swikasu meigo kasang mah swirek kikii maning nlaigong matu tang karam jangpii, Bangpii jangpii tiidasii kalei meigo tiida matu tang karam jangpii, mpounii Bangpii doi reisii Ilaijah mah rangii sateichii teimaham kito tat tangle lungka- kalingpii Ilaijah takumpii.

¹⁸ Zakarianii Sating gamlui dakii tamle, “Kada takumpii teitei Inii titangpo? kadapochiinii I-tingtakle sateichii gu noudo tingtakle.”

¹⁹ Sateichii Sating gamlui teinii mpougo khekalatle, “Saraa doito sat kalei Gabrel I-le; sateichii karashii tang karam sateichii nha kabi ai godakii punghum tang karam jangpii n-gu lang m-mangle.

²⁰ sateichii julo, aihang ai pat kasuta nangnii malhii supii bam tangle, dapokii nangnii gomah tinglangki pat tang karam gu samtam gotei nangnii malum makle.”

²¹ Sateichii meimoinii Zakariago koisii bamle, sateichii mpounii Saraa kamaning kilungto pat kari jangpii ahnyiinii sung gasii bamle.

²² satei- chii mpounii pat katu kak, ahnyiigo rashiipeiwo lak kiile, teito mpounii Saraa kamaning ki lungto mah kanii ngouwo taklesii ahnyiinii ngousii ti- takle, teito mpounii ahnyii dakii ajai tiimangoule sateichii lat pat sutakle.

²³ Sateichii mpou mah tha tiitang karam tinglang tei sang sek-kii, mpounii mpouki gongtu takle.

²⁴ Tinglang leimik aihang-tai teikii mpou nou Ilizabet tei mpung takle.

²⁵ sateichii ai tamsii mpoupeinii sakhii mangii mbaile, teiteinii, “mei doito gumah ka-nrou ai poitoipyii tang karam jangpii guphyiiryiikii Bangpiinii jumage kapyii leimik sek piinii gudato aitiisii mpatpyii takle.”

Jisu lungtang karam reipii kamati

²⁶ Sateichii Ilizabet moi kampung sakhii saruk kasang tinglang kak, Saraanii Sating gamlui Gabrelgo Galili kito Nazaret Namdi kikii lang m-mangle.

²⁷ Devitki mpung kito Joseph sii kalat sapfii mpou hang- ninii kikii n-nhiitak kaleipei kamatei ralhiipei datei mpou gongle, sateichii ralhiipei zei teinii Merile.

²⁸ Sating gamlui teinii mpoupeida patsii tamle, “kamajung tei nangnii doulo, Bangpiinii n-go kaswi leile, sateichii nang ai doi kabi peile!”

²⁹ Teito Merinii sating gamlui mah sampao tei shii wosii lungnyii lunghaotu takle, sateichii mpounii tam kalei sampao ai kadapeiposii mpoupei lung kito maningtu takle.

³⁰ Sating gamlui teinii mpoupei dakii tamle, “Hingsulo Meri! Saraanii n-go jumage pyii takle.

³¹ Julo, nangnii mpung tangle sateichii nah sapfiimei hangninii lung tangle, sateichii nangnii mpougo Jisu sii lat tangle.

³² Mpounii kadimei hangninii tii- tangle sateichii sagoi kaki Saraanah sapfii mpou sii lat tangle, mpou pfii Devitgo takumpii, Saraa bangpiinii mpougo sagong tiimatu tangle;

³³ Sateichii mpounii Jakobki atat areng phyiiryiito kalui gasii sagong tiisii lung tangle; mpou mah sagong sazyii tei kalui tiisang tiilakle.”

³⁴ Teito Merinii Sating gamlui dakii tamle, “Inii sapfiimeigo kaswi supiinii, dakumpiinii ai ai pat tangpo?”

³⁵ Teito Sating gamlui teinii mpoupei dakii tamle, “Rangii kama- tei teinii go phyiiryii humpyii tangle, Sateichii sagoi kaki mah teimaham teipii n-go akhii lakpyii tangle; teijang teipii lungtang karam nah tei Saraa nah, kamatei sii lat tangle.

³⁶ Sateichii julo, goki kalungmei pwi Ilizabet teinado tingsii taipei kalei kito nah sapfiimei hangninii mpung takle; sateichii Saraa niiga lesii tam kalei pei teinii mpung kalei tei sakhii saruk takle.

³⁷ Kadapochiinii Saraanii samah kado tiipei kalak gale.”

³⁸ Merinii tamle, “Inii Bangpii ki kalei meile, nangnii katam tei takumpii gudato pat matulo.” teito Sating gamlui teinii mpoupei dato tat tutakle.

Merinii Ilizabet da kagong

³⁹ Sateichii Merinii tinglang ailungkii gungtu ada tiisii kalangsii, azang gamto kabam Judah namdi kitei tat tutakle.

⁴⁰ Mpoupeinii Zakaria ki tatliitle, sateichii Iliza- betgo matale.

⁴¹ Merinii kamata khoi tei Ilizabetnii shiiwo sek-kii, nah teinii mpoupei lungto nsaktu takle, sateichii Ilizabetnii rangii kamateipii tokryii siinii,

⁴² lat sagoisii saale, “Nangnii sapwimei hang mangto adoi kabi peile, sateichii go moilungto kalei nah tei doibile!

⁴³ Gu bangpii pwinii guda kagong, gudato doi kabi ai kada kitopo?

⁴⁴ Kadapochiinii julo, gomah kamata khoitei shiiwo sek-kii, gulungto nah teinii ntasii nsaktu takle.

⁴⁵ Sateichii Bangpii dato mpoupei dakii tam kapyii samtei gong matwi tang lesii malum kalupei tei doibile.”

Merinii tam kamatoi lhii

⁴⁶ Merinii tamle, “Gulungnii Bangpiigo toile,

⁴⁷ Sateichii n-gu Keikapyiipii Saraa dato gu rangiinii ntale,

⁴⁸ kadapochiinii mpounii n-gu maningpyiile, mpouki kaleipei kasanapeigo; kadapokii julo, aitoisekpii meihangnii n-gu doi kabipeisii lat tangle;

⁴⁹ kadapochiinii Saraa kadi teinii gu gamkii tha kadi tiipyii takle. Mpou zei teinii kamateile.

⁵⁰ sateichii mpougo sadzyii ngariit katiimeigo aha-hato mpounii lungsyii kati tei mangoupyiile.

⁵¹ Mpoubah teipii tei maham mangoupyii takle, mpounii ahnyii lungtei ti kalu kito det katiimei hang go tii marou maruk toipyii takle.

⁵² Mpounii katei kakhangmeigo sagong bam ki teito tiisanapyii takle, Sateichii kasanamei hang go poi sagoipyii takle;

⁵³ Mpounii mazyii kaleimeigo kabi hang teipii tii tokryii pyiitakle, sateichii kanimeigo mpounii bah marongpii mpatpyiile.

⁵⁴ Mpounii Abraham sateichii mpoutaa mpou nahmei dakii kalui kaga tiisupiinii lungsyii kapyii tei maning matu tang karam jangpii,

⁵⁵ Nyii pei nyii paomei dakii tam kabam takumpiinii, mpouki kaleimei, Isrelmeinahgo tiiha takle.”

⁵⁶ Sateichii Merinii Ilizabet go sakhii tumkii kaswisii bam takpokii, mpoupeiki nlaitu takle.

Jon dwi mpum kapyiipiigo kalung

⁵⁷ Ilizabetnii manaa tang karam tinglang tei gong takle, sateichii mpoupeinii nah sapfiimei hangninii lungtakle.

⁵⁸ Mpoupeigo Abangpiinii jumage kapyii kadi tei mpoupei ki tiinamei sateichii ki kalungmei hangnii shii sek-kii, ahnyiinii mpou- pei go kaswisii nta njoile.

⁵⁹ Sateichii jang siisatnii takle sek-kii nah gotei Jehudimei kanat taiswisii ahnyiinii tiigyii malem tang karam jangpii gongle, sateichii ahnyiinii mpou gotei mpou pfii zei katou tak tang lesii bam takle.

⁶⁰ Nlenii mpou pwinii tamle, “Makle, Mpou zei ai Jon tak tangle.”

⁶¹ Ahnyiinii mpoupeida tamle, “Nlenii ai zei ai goki sadung kilungto mei zei kado gale.”

⁶² Sateichii ah- nyiinii mpou pfiigo ajai tiimangousii n-nhiile, mpou nah gotei zei kadapei tak katu mareiposii;

⁶³ Zakaria nii Atukok hangninii khangle, sateichii ryiipyii takle, “Aipou zeinii Jonle,” teito ahnyii hangnii sung gatakle.

⁶⁴ Teisek-kii Zakaria nii lat pat takle, sateichii mpounii Saraa go tam matoi tutakle.

⁶⁵ Teito ki tiinamei hangtei kahingpii tokryii takle, sateichii ai mah nha ai zang gamto kalei Judah nam hangki tam roitu takle.

⁶⁶ shii kalumei hangteinii maningsii n-nhii- tule, “Ai nah ai kadapei mitangpo?” Kadapokii mpouda Bangpii mah teimaham tei leile katu ai kasang takle.

Zakarianii doisam tam ka-mpat

⁶⁷ Sateichii mpou pfii Zakarianii rangii kamateipii tokryiisii mpounii aitiisii Saraa sam tam mpatle:

⁶⁸ “Nje nyiinii Bangpii go tam matoile, Isrelmei mah Saraa gotei. Kadapokii mpounii mpoumeigo gong tiihale sateichii ahnyiigo kaleipyii takle.

⁶⁹ sateichii mpou kikaleipii Devit mah atat-areng kito Keikapyiipii hangninii nyiijangpii pyiitakle.

⁷⁰ Ndouto mpounii mpou mah Lungkakalingmei paito riishii tiipyii takle:

⁷¹ Nyiigo ngoukaroumei sateichii jukaroumei bah hang kito nyiigo keipyii tangle.

⁷² Nyii pei nyii paogo jumage kapyii tei mangou tang karam jangpii, sateichii mpoumah sat tang karam karanu samtam hangtei maning matu tang karam jangpii,

⁷³ Sateichii nyii pfii Abraham dakii riishii tiikabam taiswisii;

⁷⁴ Nyiigo nyiimah ngou karoumei bah kito keipyii takpokii, mpou doito kahing gasii,

⁷⁵ kamatei kito, kasang kamajyii kito, nyii tiilung mata mpougo kahing gasii nga ngakabui jangpii tiipyii takle.

⁷⁶ Gunah, N-gonii sagoi kaki Saraa mah Lungkakalingpii sii lat tangle. Kadapokii nangnii mpou pwidi tiida tang karam jangpii Bangpii doi reisii tat tangle.

⁷⁷ Mpoumeigo ahnyii mah kem kama tei kaleipyiisanii Keipyii tanglesii tam mangou matu tang karam jangpii.

⁷⁸ Nyii Saraa teinii Jumage kati sateichii manoi kabi teile, Mpounii nyii phyiiryiikii Keikapyii mah tingchoi kava tei sagoi gamto vapyii tangle.

⁷⁹ Sateichii katai mah kamyii khii kito lung kalei meihang go Sating gamto vapyii tangle, nyii pikang ai kamajung pwidi kikii chyiitat pyiitang karam jangpii.”

⁸⁰ Nah tei pumpot sateichii rangii dipat takle sateichii mpounii Isrel- mei machii doikii mangou kasuta tei mapwizyii kito lungle.