KOLOSIMEI 4 - KARANU KABI SAMTAM

¹ Apum mei sating gamto gonyiimahdo apumpii leile katu tei tisii, Gonyii kikaleimei dakii majyiisii sateichii bisii tiiseilo.

Tam rali kapyii

² Kariita kito nlaisulo, sateichii Saraago hakalang tamsii gonyiinii riitasii kalei kito machyiigatlo;

³ sa- teichii Kristamah kamakum samtei nyiinii tampyii ralipyii tang karam jangpii Saraanii tinglang kabi tei nyiigo pyii kabui tiisii nyii jangpii- niido riitapyiilo. Kadapokii teijangpii aitoi Inii kabang kito bamle.

⁴ Teijangpii Inii tam kapyii kito Inii teitei mateisii tam mpat tang karam jangpii riitapyiilo.

⁵ Gonyiinii tinglang kabi kadouta tei jum matousii, sabato kaleimei dateito gonyiinii sakaisii tatlo.

⁶ Gonyiimah samtam tei tinglang kaleita thai takumpii kumbitang karamle, ninado shiibi tang karamle, sateichii mei nsang nsang dakii kekhalat tang karam kasang samtei gonyii titang karamle.

Kaluimah salam

⁷ Abangpiimah tha kito malum kabui tha tiisii kalei sateichii kaswisii kikaleimei hangninii tiisii kalei, lungkasyii nyii sanapii Taichi- kasnii gumah nha hangtei gonyii dakii tam mangou tangle.

⁸ Nyiinii kadakumsii leipo katu tei tam mangousii gonyiigo lung tii-ntapyii tang karam jangpii, Inii mpougo gonyii dakii lang magong leile.

⁹ Gonyii kak kito mei hangninii tiisii kalei, malum kabui ninado lungkasyii sanapii Onesimas go kaswisii mpougo lang magong leile. Ai kito pat kalei mahlyiihang mah nha hangtei ahnyiinii gonyii dakii tampyii tangle.

¹⁰ Kabang kito n-gu kaswisii kabampii Aristarkasnii gonyii go salam pyii leile, sateichii Barnabas sanapii Markniido salam pyii leile. Marknii gonyiida gongleponii mpougo lukaipyii losii tam kapyii tei gonyiinii doutangle.

¹¹ Justas siido lat kalei Joshuwaniido gonyiigo salam pyii leile. Jehudimei kamalum mei kak kito Saraamah sating sazyii jangpii n-gu kaswisii tha katii tei aimai hangtum ai roile, ahnyiinii n-gu hangkapii tiihale.

¹² Gonyiimei tiisii kalei, Krista Jisu kikalei Ipapronii gonyiigo salam pyii leile; Gonyiinii Saraamah kama- ning kamarei tiitang karam jangpii katam kaswi kito mishang kaleimei ninado tiigatpii malum kalu kris- tenmei tiisii, gonyiinii sangtingsii sat matutang karam jangpii Saraa dato khangsii mpounii gonyii jangpii tinglang kaleita riitasii bamle.

¹³ Mpounii gonyii jangpii, Laodisiya kito sateichii Hirapolis kito kaleimei jangpii hungsii tha tiitakle katu tei Inii mpoumah sakchyii tiileile.

¹⁴ Nyiimah lungkasyii Luk ninado Demasnii ahnyiimah salam tei pyiileile.

¹⁵ Laodisiya kito kalei nyii kangsanamei ninado Nimpa dakii sateichii mpoupei kito gong kadousii kalei charsh hang go nyiimah salam tei pyiilo.

¹⁶ Sateichii larek ai gonyii kak kito fiiluitakle sekchii Laodisiya charsh kitodo teitei soisupii fiimatu tang karam jangpii tiipyiilo, sateichii Laodisiya kito kalei kangsanameinii magong tang karam larek tei gonyiiniido fiitang karamle.

¹⁷ Sateichii “Abangpiimah tha kito nangnii doukalu tei tiimashang ailo” sii Arkipasgo tampyiilo.

¹⁸ Pol, Inii salam ai gubah sekpiinii ryiileile, maning seilo n-gu peinai kabam! Saraamah jumage kapyii tei gonyiigo kaswi pyii matulo.