KOLOSIMEI 2 - KARANU KABI SAMTAM

¹ Gonyii jangpii Laodisiya kito kaleimei jangpii, sateichii n-gu juti kasumei hang jangpii Inii dakumpiinii teisii tha tiiziipo katu tei Inii gonyii dakii tam mangoule.

² Dapokii ahnyiinii lung taisupii lungkadi teipii tokryii kabui tiisii sateichii lungkasyii kiteikii jum nja kabui tiisii, teito kasang kati teinii pung kagong madousupii doutang karam katokryii kani kahii tei doumatu tang karam jangpii, Inii ai tiileile. Aitiisii ahnyiinii Saraamah kamakum, katunii Kristago titangle.

³ Mpounii Saraamah kabai kabam kani kahiimah swirek kabi ninado swirek katimah kabi kani kahii hang go laat mpatsii kalei chabyii teile.

⁴ Mei kaniido gonyiigo kasang kasu sam hang teipii choisii hem matu lak tang karam jangpii Inii ai ai tam leile.

⁵ Kadapokii pumzai lamto Inii gonyii kak haimak kado gonyiimah ache katii ninado Krista dakii gonyiimah kamalum mah kasangting tei ngousii Inii ntale ninado Inii rangii kito gonyii go kaswisii leile.

Krista dato kamashang tiilung

⁶ Gonyiinii Krista Jisugo Bangpii tiisii lukai kalu taiswisii gonyiigo ralikapyii takumpii mpougo kaswisii hangninii tiisii lunglo.

⁷ Gonyiimah maa tei mpoudato tuksii bamlo, mpou gamkii gonyiimah tiilung tei tiimakhiilo sateichii gonyiimah kamalum kito teibui builo sateichii hakalang katam teipiinii tokryiilo.

⁸ Krista dato supiinii meinahnii adoidoi tiisii ralikapyii kito kagong sateichii sating sazyiigo apum tiisii kalei rangii hang dato kagong meinah mah kakadak kasang kasu swirek teipii meikaniido gonyiigo apum tiimatu kasu tiisii gonyii juwolo.

⁹ Kadaponii mpoudato Saraa- mah kamateimah katokryii hangtei pumrong tiisii lungleile.

¹⁰ Sateichii apum katii ninado teimaham kajum hang pyiiryiito satsii kalei mpouzei kito katokryiimah karing kitei gonyiinii gong wotakle.

¹¹ Meinahnii katii tiigyii kamalem teipii supii kem kama pumtei kito laat mpat kapyii haisii katei, kristanii katii tiigyii kamalem teipii Kristago njasii hangninii tiikalu kito gonyii go tiigyii malem aitakle.

¹² Dwi ka-mpum kito mpougo kaswisii gonyiigo poigoi aitakle, sateichii mpougo katai meikak kito tiimaring kapyii Saraa teinii tiikalei tha kiteikii gonyiinii kamalum paikito mpougo kaswisii gonyiigo tiimaring- pyii takle.

¹³ Sateichii kama ninado gonyiimah pumzai kito tiigyii malem kasu hang kito tai kaleimei gonyiigo nyiimah kakui kama hangtei magapyiisii mpougo kaswisii, Saraanii tiimaring pyiile.

¹⁴ Nyiidato ti katheisii kalei nyiigo mazhii supii ngourousii kalei ajaitingshang teimah abah zaimah samret tei piit toipyiisii, teitei krosh gamkii jotpyii geekai pyiisii, nyiikak kito teitei mpounii poitoi pyiitakle.

¹⁵ Apum katii ninado teimaham hang krosh gamto ahnyii phyiiryiito Judiwosii mpounii madulapii ahnyiigo mangou pyiitakle.

¹⁶ Teijangpii kachii kito, kasak kito, mak-kii kung sang ngi katii, mak-kii sakhii kasatai, mak-kii ntak piinei leimikmah kaang kito mei hangninii kaniido gonyiigo samtak tiimatu sulo.

¹⁷ Aihang ai pat tang karam tha hang mah khiina teiroile; kasang teinii Kristale.

¹⁸ Mikpii meinii ngou kasu kangou hang jangpii sagoiki lesii tamsii kaleimei sateichii kasang kasu meinah mah jairali ninado sating gam rakot hang go matalosii tamsii kaleimei kata hangninii kaniido gonyiigo tiimaga malei sulo; tei kakum mei teinii meinahnii swi maning kalei mpoumah kamaning hangteipii magat totakle.

¹⁹ sateichii apum mah aphyii kasat tiisii kalei Krista gamkii jum kabam tei matou aitakle, pum hang ai Krista kangto chiitak doule sateichii mpoumah ashaang shaang ninado abiit-biit hangteipii jum njabamle, sateichii teitei Saraanii mimatu kanyii taiswisii dileile.

Kristago kaswisii karing ninado katai

²⁰ Gonyiinii Kristago kaswisii taitakle sateichii sazyii pouryiigo apum katii rangii hang kito laat mpatpyii aitakle; tei tiileponii, Gonyiinii sazyii pouryii kangto kalei takumpii dajangpiinii lungleipo?

²¹ “Jum sulo, masai sulo, deng sulo, katu aikakum jaihang kangtei nkang leipo?”

²² Aihang ainii binii poisii jum kaleitai maiga katu mah pot hang go tamsii leile, teihang teinii meinahnii tiikalu jai ninado ralikapyii teiroile.

²³ Teikakum ajai hangteinii rakotgo atei tiisii kamata kito sateichii kasang kasu meinah jairali kito, sateichii pumrongmah, ngou kahing sadoi kashyii kito swirek kabigo ka-njasii kaleigo reile, Nlenii ahnyii teinii pumzaimah marai majang go namsii pungmatui wotang karam kasang maikateeng tei gale.