JUD DATO KAGONG CHITI JUKAMATI 1 - KARANU KABI SAMTAM

¹ Jisu Krista kikalei ninado Jems sanapii Judnii, Pfii Saraamah lungkasyii ninado Jisu Kristamah koikapyii jukapyii kito lungsii kalei, Saraanii lat kalumei dakii:

² Lungset kati, kamajung ninado lungkasyii tei gonyii dato moibui matulo.

Kasang kasu ralikapyiimei mah sadoi kashyii

³ Lungkasyiimei, kamalum mei- hangnii dousii kalei Kristenmei mah kamalum, keikapyii karingmah kaang kito gonyii dakii Inii chiti ryiinesii tiidasii leile. Nlenii Saraanii mpoumah meihang dakii pyii kabam gakalak kamalum jangpii saryii tiimatu tang karam jangpii gonyiigo lung tiimadi tang karam jangpii ryiisu kashyii ai aitoisekkii Inii kadou takle.

⁴ Ka- dapokii Saraa haikasu mei kangkii makumpii gonyii kak ki liitto takle, mei aimeinii doutang karam kaset kalak teinii kabi rasam kikii ndouto reipii tambam takle. Ahnyiimah tingshangrali kashyii gotei gomnei tang karam jangpii mei aimeinii Sa- raamah jumage kapyiimah samtam gotei jumle, sateichii Jisu Krista ai nyiimah pumpiile ninado Bangpiile katu tei ahnyiinii mazhii makle.

⁵ Aitoinii gonyiinii aihang ai tikado, Saraanii Isrelmeinah go Izip sazyii kito keipyii takpokii, tei taito malum kasumei hang go kada takumpii tiimaga aipo katu Inii gonyiigo maningloi matunyiile.

⁶ Sa- teichii ahnyiigo pyiikabam teimaham mah bam kiteito bam supiinii, ahnyiimah lungkalei bam toikalei sating gamlui hang gotei mpounii samtak tiitang karam leimik kadi jangpii tuk kaki kamyii kiteikii kalui gasii sagyiirengpii peisii kaibam takle.

⁷ Tei takumpii Sodom ninado Gomara sateichii teiki kuto kalei namdi hangtei sating gamluigo jairali njoisii Sapwimei sapfiimei kashyii kahong tha katii, sateichii mei tiikasu pumzaimah kamarei ka-ntha tha taiswisii kalung teipiinii kalui kaga mibam mah kaset kalak tei pungsii, meihang dakii tiikama- ngou nda tiisii mangou leile.

⁸ Tei takumpiiniido ahnyii roinapii ahnyii pumpotgo tiimahong matu katu mah madhang kapyii hangtei ahnyiinii doule; Saraamah teimaham gotei ahnyiinii lukai makle, sateichii sagoi gamto kalei sating gamlui hangmah pumtei kava gotei ah- nyiinii tam mashyiile.

⁹ Nlenii sating gamluimah aphyii kasat Maikelnii seitan go ka n-gisii, Mosesmah pumpotmah kaang kito kasou katu tinglang kak, ah phyiiryiikii kalet kalou katiisam tam tang karam lung kadi tei gale, nlenii “Bangpiinii n-go tiikamage matulo” sii ahnii tamle.

¹⁰ Nlenii aimei ainii ahnyiinii tikasu mahlyii hang phyiiryii teikii kalet kalou katiisam tamle, sateichii swikaga saram kounah takumpii, maningsupii tibak kalu aihang aipiinii ahnyiigo tiimagale.

¹¹ Ahnyii jangpiinii kadaziikapii kamagepo! Kadapokii Ken mah pwidi tei ahnyiinii swiwo takle, sana jangpii Balam mah kama kiteikii ahnyii roinapii ahnyiigo pyii aitakle, Koranii rangkapa takumpii ahnyiinii rangpale sateichii Kora takumpii ahnyiigo tiimaga aitakle.

¹² Aihang ainii gonyiimah lungkasyii takbai hang kito gonyiigo kaswisii chii njoi sak njoi kalei kamakum kuitu kadile, kahing gasii ahnyii roinapii ahnyiigo makot kalei meile, tingkainii gwi- pungsii katat dwi haikasu mongram takumle, ti mati kasu ruibang, tainakii taikalei, maa pai mpat kalei, sateidou mah ruibang takumle.

¹³ Ahnyiimah ka-nrou tha hang gotei dwi kito maribok boksii kalei dwi mahom takumpii mangou kalei, dwi- jaimah ngoukahing dwi n-noukalei takumle, jungpi jungpatsii kalei sageiti takumle, ahnyii jangpiinii tuk kaki kamyii kalui kaga bamtei Bangpiinii tiidabam takle.

¹⁴ Sateichii aimei hang dakiido Adam sekto ha sana kashang Inoknii doireisii Saraa sam saa mpatsii tamle, “Julo, Bangpiinii mpoumah kamatei sating gamlui tang tang go kaswisii gong tangle.

¹⁵ Ai hang phyiiryiikii samtak tiitang karam jangpii sateichii Saraa haikasumei hang go Saraa haisupii tiikalei Saraa haikasu tha hanglyiimah kaang kito sateichii Saraa haikasu kem kama- meinii mpou phyiiryiikii tam kalei sam hangmah kaang kito tiikamage tang karam jangpii mpounii gong tangle.”

¹⁶ Aimei ainii manam maraangsii meigo tam kamashyii, lung kashaat kagameile. Ahnyiinii ahnyiimah pumzainii kamarei ka-ntha hangtai tei swile, ahnyii roinapii ahnyii sam tam mbile sateichii ahnyii bak kabi doukabui tiisii ahnyiinii meisam tam ka-mbijai tiisii tam leile.

Tiilo, tiisulo katu sam ralikapyii

¹⁷ Nlenii lungkasyiimei, nyii Bangpii Jisu Kristamah tiilamlwi kapyiimeinii ndou karei kito tam kabam sam hang tei gonyiinii ma- ninglo;

¹⁸ katunii, “Kana tinglangki ahnyiimah Saraa haikasu pumzainii kamarei ka-ntha-tai tei swisii kalei hoksii kanuimei leitang lesii.” Ahnyiinii gonyii dakii tambamle.

¹⁹ Aimei ainii meigo tiikapak, saram koumah tingshangrali katat, rangii doukasumei teile.

²⁰ Nlenii lungkasyiimei, gonyiinii kamatei kamalum kiteikii gonyii roinapii gonyiigo makot makhiijousii leilo, rangii kamateimah teimaham haisii riitalo.

²¹ Sateichii Bangpii Jisu Kristanii mpoumah lungset kati kito gonyiigo kalui kaga karing pyiimatu tang karam jangpii gonyiinii koisii koisii, gonyii roinapii gonyiigo Saraamah lungkasyii kito mbamlo.

²² Sateichii maning kariirhiisii kaleimei kangkii pyiiryiikii lungka- syii tei mangoulo;

²³ Ahnyiigo mi kiteito majat mpat seisii keipyiilo; nlenii ahnyii pumzaimah kamarei ka-ntha teipiinii rum kabam peimani katangdo nraangsii, mei kangkii phyiiryiikii kahing tei njasii lungset kati tei mangoupyiilo.

Tam kamatoi mah kariita

²⁴ Aitoinii koutang karam kito gonyiigo masat kabui ninado sajek gasii rangasii mpoumah pumtei kava doikii gonyiigo masatto kabui kangam–

²⁵ Nyii Bangpii Jisu Krista zei kito hangniniisang hangninii roinii kalei Saraa, nyiigo keikapyiipii dakii pumtei kava, magong kalei kadi kathang, apum katii, ninado teimaham kajum tei ndou karei tinglang hang kito, aitoi ninado kalui kaga tei matulo, Amen.