JONNII KARYII KABI RASAM JUKAMATI 9 - KARANU KABI SAMTAM

Lungkaluto mik kachetmei hangniniigo Jisunii tii mbikapyii

¹ Jisunii aitiisii pwidi tat lei- bangpii, lung kaluto mik kachet sapfiimei hangniniigo ngou wotakle.

² Mpou boumeinii mpou dato n-nhiile, “Madhiikapyiipii, sapfii mpou ainii mik chetsii lung m-mang katu ai, tanii kem tii aipo? Ai ai mpounii manii mpou pwi mpou pfiiniipo?”

³ Jisunii khekalatle, “Sapfii mpou ainii kem katii jangpii makle, mpou pwi mpou pfiiniido makle, nlenii Saraa mah tha hangtei mpou dato ngou kabui jangpiiniile.

⁴ N-gu lang kamagong ahmah tha tei leimik kalei kak nyiinii tiitang karamle; mei kaniido tha tiikalak tinghum tinglang tei gonglei takle.

⁵ Inii sazyii pouryiito kaleita, Inii sazyii pouryii mah kavale.”

⁶ Mpounii aitiisii tam takpokii, sazyiikii poktai maswi kaisii makhang ryii wosii makhang teipii mpou mik kikii manuk kaipyiisanii

⁷ mpou dakii tamle, “Tat tulo, Silom mah dwikong kiteito goju kaphyii ailo.” (Silom ai kadat mpatkii lang ka-mpat teitiile) teipiinii mpounii mangsii, mpou ju kaphyii aitakle sa- teichii miktei ngou wosii nlaigongle.

⁸ Ki tiinaniipamei ninado mpougo kareiki mah khangkachii mei hang- ninii tiisii ngou kalei meihang tei- niido tamle, “Bamsii mah khangchii kaleipii tei aimakde?”

⁹ Mei kangkanii tamle, “Teipoule;” kakimei kangkanii tamle, “Teimakle, nlenii mpougo kareimei hangniniile.” Mpounii tamle, “I teisekle.”

¹⁰ Teijangpii ahnyiinii mpou dakii tamle, “Go mik kada takumpiinii rak wopo?”

¹¹ Mpounii khekalatle, “Jisu sii kalat mei teinii makhang ryiiwosii, gu mik kikii manuk kaipyiisii n-gu Silom mah dwikong kitei mangsii guju kaphyii ailosii tamle. Teijangpii Inii mangsii ju kaphyii sek-kii, Inii mik rak wotakle.”

¹² Teito ahnyiinii mpou dakii tamle, “Mpou ai kadaki leipo?” Mpounii khekalatle. “Inii timakle.”

Farasismeinii katiimeigo tii ka-mbi makumpii kaju

¹³ Ahnyiinii sung kareiki mik kachetpii gotei Farasismeida pang gong takle.

¹⁴ Jisunii makhang ryii- wosii mpou mik tii mbikapyii leimik tei bam ntak piinei leimikle.

¹⁵ Tei- jangpii Farasismei hangteiniido kada takumpii mik ngou woposii mpou dato n-nhiiloi takle, teito mpounii ahnyii dakii tamle, “Mpounii gu mik kikii makhang chengniikii kaipyiile, sateichii Inii ju kaphyii wosii mik ngou wole.”

¹⁶ Farasismei kangkanii tamle, “Mei aipou ai Saraa dato makle, kadapokii mpou ai bam ntak piinei leimik ryiimakle.” Nlenii kakimei kangkanii tamle, “Kem katiimeinii ai kakum tiikamangou siiti ai kada takumpiinii tiiwo tangpo?” Ahnyii kak kiteito njairiit riit pat takle.

¹⁷ Teijangpii ahnyiinii mik ka- chetpii dateikii nlailoisii tamle, “Go mik tii-mbikapyii jangpii, nangnii mpou mah kaang kito kadapeilesii tam tangpo?” Mpounii tamle, “Mpou ai Lungkakalingmei hang- niniile.”

¹⁸ Mik kachet kito mik ngoukalu sapfii mpou mah pwi pfii gotei ahnyiinii lat magong kasuta tei, mpou ai mik chetle ninado mik ngou wotakle katu Jehudimei hangnii malum makle,

¹⁹ sateichii ahnyiigo n-nhiile, “Mik chetsii lung m-mang- lesii gonyiinii tam kalei gonei nah sapfii mpou tei aipo? Teileponii mpounii aitoi kada takumpii mik ngou wopo?”

²⁰ Mpou pwi nei mpou pfiinii khe- kalatle, “Ai ai nei nah sapfii mpoule sateichii mpougo mik chetsii lung m-mangle katu neinii tile,

²¹ Nlenii mpounii aitoi kada takumpii ngou wopo sateichii tanii mpou mik tii mbipyiipo katu nyiinii timakle, mpougo n-nhiilo mpoudo nahmei sutakle, mpounii mpou mah kaang kito tam tutangle.”

²² Mpou pwi nei mpou pfiinii Jehudimeigo kahing jangpiinii ai ai tamle, kadapokii mei kata hangninanii mpougo Kristalesii tam mpat leponii, ahgo Jehudimei mah ndwi kiteito paktoi aitanglesii Jehudimei hangnii mazhiisii rashiibam takle.

²³ Teijangpii mpou pwi nei mpou Pfii teinii, “Mpoudo nahmei sutakle, mpougo n-nhiilo” sii tam takle.

²⁴ Teijangpii ahnyiinii kareiki mik chetsii kalei sapfii mpou gotei hangna kashang tiisii lat magongsii mpou dakii tamle, “Nang kasang tam tangle katupii Saraa doito riishii tiilo! N-go tii mbikapyii sapfii mpou ai kem katiimei hangniniile katu nyiinii tile.”

²⁵ Sapfii mpou teinii khekalatle, “Mpou ai kem katiimeile mak-kii kem katiimei makle katu Inii timakle, hangninanii Inii tile katunii, Inii mik chetsii leile sateichii aitoinii Inii mik ngou wotakle.”

²⁶ Ahnyiinii mpougo n-nhiile, “Mpounii n-go kadapei tiipyiipo? Kada takumpii mpounii n-go mik kachet tii mbipyiipo?”

²⁷ Mpounii ahnyiigo khekalatle, “Inii gonyiigo tam mangou takle sateichii gonyiinii shiipyii makle. Gonyiinii dajangpii nlailoisii shii- nyiipo? Gonyiido mpou mah boumei tiitunyiipo?”

²⁸ Teito ahnyiinii mpougo n-gisanii tamle, “Nang mpoumah boumeile, nlenii nyiinii Moses mah boumeile.

²⁹ Saraanii Moses go sam rashii takle katu nyiinii tile, nlenii sapfii mpou ainii kada kitopo nyiinii timakle.”

³⁰ Sapfii mpou teinii khekalatle, “Teinii kadaziikapii madatpo! Mpounii kada kito gongpo katu gonyiinii timakle, nlenii mpounii gu mik kachet kito n-gu tii mbipyii takle!

³¹ Saraanii kem katiimeigo shiipyii makle, nlenii mei kata hangninanii Saraago kamatamei tiisii Mpounii kamaning kamarei tei tiisii leile- ponii, Saraanii ahgo shiipyiile katu nyiinii tile.

³² Mei kaniido mik chetsii lung ka m-mang mei hangninii mah mik kiido tii mbipyiile katu ai sazyii pouryii saroisekto shiisang shii- makle.

³³ Ai sapfii mpou ai Saraa dato suleponii, mpounii samah kado tiiwo lakle.”

³⁴ “Nangnii kem kamapiinii kajyiineisii lungle ninado kem kito makot makhiile, sateichii nangnii nyiigo ralipyii leipo?” Teito ahnyiinii mpougo Jehudimei mah ndwibamni kiteito paktoi aitakle.

Rangii lamto mik kachet

³⁵ Ahnyiinii mpougo paktoi aitakle katu Jisunii shiitakle ninado mpougo dou wosii mpounii tamle, “Nangnii meinah sapfii mpou gotei malum makpo?”

³⁶ Mpounii khekalatle, “Madhii- kapyiipii, Inii mpougo malum kabui jangpiinii, mpou ai tapo katu n-gu tamseilo!”

³⁷ Jisunii mpou dakii tamle, “Nangnii mpougo ngoutakle, satei- chii nangnii aitoi rashii kalei ai mpou teile.”

³⁸ Teito “Bangpii, I-malumle”; sii mpounii tamle sateichii mpounii Jisu doito kok kum wotakle.

³⁹ Jisunii tamle, “Mik ngou kasumei teinii ngou matutang karam jangpii, sateichii mik kangoumei teinii mik chet matutang karam jangpii, Inii samtak tiitang karam jangpii sazyii pouryii gongle.”

⁴⁰ Mpou dato manangsii kalei Farasismei kangkanii ai shii wosii mpou dakii tamle, “Nyiido mik chetpo?”

⁴¹ Jisunii ahnyii dakii tamle, “Gonyii mik chetleponii, gonyii mah kem tei gatangle, nlenii gonyiinii aitoi nyiinii ngou leilesii tam kalei taiswisii, gonyii mah kem tei leijoule.