JONNII KARYII KABI RASAM JUKAMATI 5 - KARANU KABI SAMTAM

Dwikongto ra tii mbikapyii

¹ Aitaito Jehudimei mah takbai hangniniiki Jisunii Jerosalemki tatpile.

² Jerosalemki Jao takam kamjouku, Hebru latpii “Bethzatha” sii kalat nsungbam kamwi mangii kalei dwikong hangninii leile.

³ Kamwi mangii aikito, rakanimei, mik kachetmei, pi katwimei, pum pei kataimei hang zyiile. (ahnyiinii dwi ka-nlai koisii leile.

⁴ Daponii akak-kakto tei dwikong kitei sating gamlui hangninanii humsii dwitei tii tii nlaile; dwi tii nlai kalei tai mei kata hangninanii dwi kitei liitrei woleponii ahmah rakashyii hang kito tii mbiwo leile.)

⁵ Sateichii tingkum tamriisii siisat nkhii ranisii kaleimei hangninii tei kitei leile.

⁶ Mei aipou- nii zyiikalei tei Jisunii ngou wosii ninado rakani tei tinglang thaang- takle katu tiwosii mpou dakii tamle, “Nang ra biwo nyiimakpo?”

⁷ Rakanipii teinii mpougo kheka- latle, “Oja, dwi tii ka-nlai tinglang kak n-gu dwikong kikii poikaipyii tang karam mei gale, sateichii Inii liitnesii tiileibangpiinii mei kaki- meinii gudoi liitrei wole.”

⁸ Jisunii mpou dakii tamle, “Gungtu wolo, gozyii poimakhiisii tat tulo.”

⁹ Teitinglang sek-kii mei teinii ra gawosii mpou zyii poimakhii wosii tat tutakle, teipiinei leimik tei bam ntak piinei leimikle.

¹⁰ Teipiinii ara gakalu sapfii mpou dateikii Jehudimeinii tamle, “Ai ai bam ntak piinei leimikle sateichii nangnii gomah azyii poitat katu ai ajaitingshang tiipakle.”

¹¹ Nlenii mpounii ahnyiigo khekalatle, “N-gu ra tii mbikapyii ahteinii ‘go zyii poimakhiisii tat tulosii gudakii tamle.’ ”

¹² Ahnyiinii mpou dato n-nhiile, “Gozyii poimakhiisii tat tulosii godakii katam mei tei tapo?”

¹³ Nlenii ara gakalu sapfii mpou teinii Jisu tapo katu timakle, kadapokii bam teikitei meimoi kalei taiswisii Jisunii joupat totakle.

¹⁴ Teitaito Jisunii mpougo Saraa kamaning kilungto dou wosii mpougo tamle, “Julo, Nang gora biwotakle! Kisii kashyii tei go phyiiryii takliit kasu tiisii kem tiiloi sulo.”

¹⁵ Sapfii mpou teinii tat tutakle, sateichii mpougo tii mbikapyii tei Jisule katupii Jehudimei dakii tamtakle.

¹⁶ Teijangpii Jehudimeinii Jisugo tiimaset tiimalakhou tutakle, dajangpiiponii mpounii tha ai bam ntak piinei leimik tiitakle.

¹⁷ Nlenii Jisunii ahnyii dakii khekalatle, “Gu pfiinii aitoi katangdo tha tiileile, Iniido tiileile.”

¹⁸ Tam kalei sam aijangpii Jehudimeinii mpougo gitang karam jangpii kisii fiile, dapokii mpounii bam ntak piinei leimikgo tiikapak roimakle, nlenii Saraago mpou Pfiisek latsanii mpougo mpou roinapii Saraago poimasam wotakle.

Meinah sapfii mpoumah teimaham

¹⁹ Teipiinii Jisunii ahnyiigo khe- kalatle, “Inii gonyii dakii kasangpii tam leile, Pfiinii katiihang tei ngou- supiinanii nah sapfii mpou teinii mpou roinapii samah kado tiipei wolakle; kadapokii mpounii katii katiihangtei nah sapfii mpou teiniido teigotei njoisii tiileile.

²⁰ Kadapokii Pfiinii nah sapfii mpou gotei lung- syiile ninado mpou pum sekpiinii katii tha hangtei mpou dakii mangoule; sateichii gonyiinanii sung gamatu tang karam jangpii, aidoito kisii tha kadi mpounii ah dakii mangou tangle.

²¹ Kadapokii Pfiinii kataimeigo tiimaring pyiisii ring- matu katu takumpii nah sapfii mpou teiniido mpounii ringmatu kanyii ahnyii gotei ringmatule.

²² Kadapokii Pfiinii meigo kado samtak tiimakle, nlenii mei hangnii Pfiigo sadzyii ngariit katii takumpiinii, nah sapfii mpou gotei sadzyii ngariit tiimatu tang karam jangpii, mpounii samtak katiihang tei nah sapfii mpou dakii pyii aitakle.

²³ Nah sapfii mpougo sadzyii ngariit tiikasu ahteinii nah sapfii mpougo lang ka m-mang Pfiigo teido sadzyii ngariit tiimakle.

²⁴ “Inii gonyii dakii kasangpii tam leile, gusam shiisii ninado n-gu lang kamagong ahgo malumsii kalei ahteinii kalui kaga karing tei doutakle; sateichii samtak katii kitei ahnii hailakle, nlenii ahnii katai kito karingki kaamajupat wotakle.

²⁵ Inii gonyii dakii kasangpiinii tam leile, kataimeinii Saraa nah sapfii mpou mah rok shiitang karam tinglang tei gonglei takle–tinglangtei gongtakle, sateichii roktei shiikalu meihangnii ringtangle.

²⁶ Kadapokii Pfii dateito roinii karing tei kalei takumpiinii mpounii nah sapfii mpou datei kado mpou dato roinii karing tei leimatu tang karam pyiitakle.

²⁷ Sateichii nah sapfii mpou tei meinah sapfii mpou katu taiswisii samtak katii tei mpounii mpou dakii teimaham pyiitakle.

²⁸ Aito sung kaga tiisulo; daponii tinglang tei gonglei takle, tei tinglang kak roubam kang kabam hangnii mpoulat tei shii wosii

²⁹ Kabi katiimei hangnii ringtang karam mah ringkakhii kitei sateichii kashyii ka- tiimei hangnii samtak tiitang karam mah ringkakhii kitei tatpat tangle.

Jisu mah kaang kito sakchyii kapyii

³⁰ “Inii gumah teimaham roina- piinii samah kado tiipei wolakle; Inii kashii takumpii, Inii samtak tiile; sateichii gumah samtaknii kasangle, dapochiinii n-gu lang kamagong mpoumah kamaning kamazhii tei supiinii gumah kamaning kamazhii tei Inii fiimakle.

³¹ “I-roinapiinii gumah kaang kito sakchyii tiileponii, gumah sakchyii tei kasang makle.

³² Gumah kaang kito sakchyii pyiikalei kaki hangninii leile; sateichii mpounii gumah kaang kito pyiikalei sakchyii tei kasangle katu Inii tile.

³³ Gonyiinii Jon dakii lang magongle sateichii mpounii kasang mah kaang kito sakchyii pyiitakle.

³⁴ Nlenii Inanii meinah dato sakchyii poimakle; nlenii gonyiigo keipyii tang karam jangpii Inii sam ai tamle.

³⁵ Mpou teinii shong kalei ninado vakalei thaomi teile; sateichii gonyiinii tinglang shangniikii jangpii mpoumah kava kito nta ranga kaikanyii mei teile.

³⁶ Nlenii Jon mah sung kisii kadi sakchyii tei gumah leile; kadapokii tiimashang matutang karam jangpii gudakii pfiinii pyiikabam tha, Inii tiikalei tha teipiinii, Pfiinii n-gu lang magongle katu gumah kaang kito sakchyii pyiile.

³⁷ N-gu lang kama- gong Pfiinii gumah kaang kito sakchyii pyiitakle, gonyiinii mahdou kado mpou roktei shiimakle, mpoumah jaitaluido ngoumakle,

³⁸ sateichii mpou samtei gonyii lung kito taksupiinii kalei gale, dapokii mpounii lang kamagong mpougo gonyiinii malum makle.

³⁹ Gonyiinii kabi rasam hangtei fiile, dapochiinii teihang lung kiteito gonyiinii kalui kaga karing doulesii maningle sateichii gumah kaang kito sakchyii pyiikalei tei teihang teile.

⁴⁰ Teitii- kido gonyiinii karing doutang karam jangpii guda gongnyii makle.

⁴¹ “Inii meinah dato tam kamatoi poimakle.

⁴² Nlenii gonyii lung kito Saraago lungkasyii tei gale katu Inii tile.

⁴³ Inii Gu Pfii zei kito gongle sateichii gonyiinii n-gu lukai makle; kaki hangninanii ah zei kito gong- leponii, gonyiinii ahgo lukai tangle.

⁴⁴ Saraa dato kagong tam kamatoi gotei gonyiinii fiisupii hangninanii hangninii dato tam kamatoi tei poisii, gonyiinii kada takumpii n-gu malum wotangpo?

⁴⁵ Inii gonyiigo gu pfii doito malesii tam mashyii tanglesii maning sulo, gonyiinii maning malumsii kalei Moses teinii gonyiigo malesii tam mashyii tangle.

⁴⁶ Gonyiinii Moses go malum wole- ponii, gonyiinii n-gu malum tangle; kadapokii mpounii gumah kaang kito ryiile.

⁴⁷ Nlenii gonyiinii mpoumah karyii hang gotei malum suleponii, gumah samkang hangtei gonyiinii kada takumpii malum wotangpo?”