JONNII KARYII KABI RASAM JUKAMATI 21 - KARANU KABI SAMTAM

Jisunii boumei sana dakii mangou kapyii

¹ Aitaito Jisunii mpouroinapii mpougo boumei dakii Tiberiya mah dwijai kuto nlailoisii mangou- pyii takle, sateichii mpounii mpou roinapii mpougo aitiisii mangou- pyiile.

² Saimon Pitar, (mbiitnah sii kalat) Thomas, Galili kito kalei Kena mpfii Nathanel, Zebedinah sapfiimei hang, ninado mpou boumei kaki hangna, ahnyii ai kaswisii leile.

³ Saimon Pitarnii ahnyii dakii tamle, “I-kaa li male.” Ahnyiinii mpou dakii tamle, “Nyiido n-go kaswisii mangne.” Ahnyiinii tatpatsii malyii- lung tong wotakle; nlenii teipiinei tinghum tei ahnyiinii samah kado dousutakle.

⁴ Tingvaliit sek-kii, Jisunii dwijai lakuto sat takle; nlenii teitei Jisule katu ahnyiinii timakle.

⁵ Jisunii ahnyii dakii tamle, “Nahmei, gonyii samah kado num womakde?” Ahnyiinii mpougo khe- kalatle, “Samah kado num womakle.”

⁶ Mpounii ahnyii dakii tamle, “Ralang tei malyii mah ajiilam pang teikii rotkailo, gonyiinii chengniikii doutangle.” Teipiinii ahnyiinii rotkai takle sateichii kaa tei moijusii ahnyiinii ralang tei jumpei wolak takle.

⁷ Jisunii lungkasyii boumei teinii Pitar dakii tamle, “Ai ai Bangpiile!” Ai ai Bangpiile katu tei Saimon Pitar nii shii wosek-kii, mpounii peimani tei kai wotakle (kadapokii mpou tei tha tiitang karam jangpii nat loktoi aitakle) ninado dwilung sokliit takle.

⁸ Nlenii boumei kakimei hangteinii kaapiinii tokryii kalei ralang tei chyiisii malyii kacheng gam tongsii gongtakle, kadapokii ahnyii tei sazyii kathang dateito kak dhiimakle, kat haikii kakum roinale.

⁹ Ahnyiinii sazyii kathang gamtei pat tosek-kii, teikikii pazyiimi hangninii sateichii teiphyiiryii teikii kaa ninado tiirok kai kabam tei ngoutakle.

¹⁰ Jisu- nii-ahnyii dakii tamle, “Gonyiinii aitoi doukalu kaa kiteito chengniikii poigonglo.”

¹¹ Teipiinii Saimon Pitarnii malyii gam tong wosii kaa kadi, kaa pak haisii rekngiisii tumkhii piinii katokryii ralang tei sazyii kathang gamkii chyii mpat takle; sateichii kaa tei teiziikii moi kado ralang tei hak makle.

¹² Jisunii ahnyii dakii tamle, “Patlo chiitulo.” Ai ai Bang- piile katu tei ahnyiinii tiwosanii, boumei mei kaniido “Nang taposii” mpougo n-nhii hing takle.

¹³ Jisunii patsii tiirok pangtei poi wosii ahnyii dakii pyiitakle, teitakumpiinii kaado pyii takle.

¹⁴ Jisunii kataimei kak kito ringkakhii tai boumei dakii mangou kapyii tei aipiinii hangtum kashangle.

Jisu ninado Pitar

¹⁵ Ahnyiinii chiisang kaleitai, Jisunii Saimon Pitar dakii tamle, “Jon nah sapfii mpou Saimon, Nangnii aihangdoi aito kisii n-gu lungsyii makpo?” Mpounii Jisu dakii tamle, “Nle, Bangpii, Inii Bangpiigo lungsyiile katu nangnii tile.” Jisunii mpou dakii tamle, “Gu mah Jaonah meigo koichyii pyiilo.”

¹⁶ Jisunii mpougo hangna kashang tiisii tam- loile, “Jon nah sapfii mpou Saimon, Nang n-gu lungsyii makpo?” Mpounii Jisu dakii tamle, “Nle, Bangpii, Inii n-go lungsyiile katu nangnii tile.” Jisunii mpou dakii tamle, “Gu mah Jaonah meigo koichyii pyiilo.”

¹⁷ Jisunii mpougo hangtum kashang tiisii tamle, “Jon nah sapfii mpou Saimon, nang n-gu lungsyii makpo?” sii Jisunii mpougo hangtum kashang tiisii katam jangpiinii Pitar swi mage takle. Teito mpounii Jisu dakii tamle, “Bangpii nangnii matum madum tile, Inii n-go lungsyiile katu nangnii tile.” Jisunii mpou dakii tamle, “gumah Jaonah mei go koichyii pyiilo.

¹⁸ Kasang kasangpii Inii godakii tam leile, Nangnii tiina kaleidou, goroi- napii nangnii kakee haikang wosii, nangnii tat kanyii bam hangki tatsii leile; nlenii nangnii ting wosekchii, nangnii gobah ntaapat tangle sateichii mei kaki hangninanii n-go kakee kakpyii sanii, nangnii mang karou bamni teikii n-go pang mang tangle.”

¹⁹ Mpounii kadapei tiit piinii Saraago pumtei kava tei pyiitangpo katu tei mati tang karam jangpii, ai ai mpounii tamle, sateichii ai ai tam kalaitai Jisunii Mpou dakii tamle, “Gutai swi wolo.”

Jisu ninado boumei kakimei

²⁰ Pitarnii nryiigong katu kak, Jisunii lungkasyii boumei teinii ahnyiigo taiswikalei tei ngoutakle, ah teinii tingkhii malot chii katu tinglang kak mpou mah takhou gamto bhangsii, “Bangpii, n-go schoi choikai tang karam tei tapo” sii katampii teile.

²¹ Teijangpii Pitarnii mpougo ngou wosanii mpou dakii tamle, “Bangpii, mei aipou mah kaang kitonii kada takum tangpo?”

²² Jisunii mpou dakii tamle, “Inii gong kasuta mpounii leikatu ai Inii kamaning kamazhii leponii, teiteinii godato kadatakum tangpo? Gutai swi wolo!”

²³ Teijangpiinii boumei aipou ai tailakle katu sam ai kangsanamei kak kito tam kahitu takle; nlenii mpou ai tailakle katu Jisunii mpou dakii tam makle, nlenii “Inii gong kasuta mpounii leikatu ai Inii kamaning kamazhii leponii, teiteinii n-go kadapei tiipo?” siile.

Kalui sam

²⁴ Aihang mah sakchyii kapyii ninado aihang ai ryii katu boumei tei aile; sateichii mpoumah sakchyii ai kasangle katu nyiinii tile.

²⁵ Sateichii Jisunii tiikabam tha kakido hangkii leile; teihang tei nsang nsang tiisii ryii leponii, ryiikabam larek hangtei sazyii pouryii katangpiinado liitpei wolaklesii Inii maningle.