JONNII KARYII KABI RASAM JUKAMATI 19 - KARANU KABI SAMTAM

¹ Teito Pailatnii Jisugo poisii tiigatpii dat malei takle,

² sa- teichii saryiimei teinii tu phyiihung hangninii tiiwosii, mpou phyiigamkii choikai pyiisanii kaghang nei mongzaisa kapung peijou mani karei pei tei bakai pyiitakle;

³ sateichii ahnyiinii mpouda patsii “Jehudimei mah sagong go mata leile!” Sii tamsii mpougo ahnyii bahpiinii dat takle.

⁴ Pailatnii saba tatpat loisanii ahnyii dakii tamle, “Julo, Inii mpou dato kama samah kado doumakle katu gonyiinii timatutang karam jangpii Inii mpougo gonyii dakii pangpat leile.”

⁵ Teipiinii Jisunii tu phyiihung tei choisii ninado kaghangnei mongzaisa kapung pi rot katang pei tei basanii saba tei tatpat takle. Pailatnii ahnyii dakii tamle, “Julo, sapfii mpou tei aiki leitakle!”

⁶ Kanat kajum tingdimei ninado kadimei hangteinii mpougo ngou wosek-kii, ahnyiinii saa mpatle, “Mpougo krosh gamkii gi ailo, mpougo krosh gamkii gi ailo!” Pai- latnii ahnyii dakii tamle, “Teileponii gonyiinii mpougo poisii krosh gamkii gitulo, kadapokii Inii mpou gamto kama doumakle.”

⁷ Jehudimeinii mpougo khekalatle, “Nyiimah ajaitingshang leile sa- teichii teimah ajaitingshang taiswisii mpounii taitang karamle. Dapochii- nii mpou roinapii mpougo Saraa nah sapfii mpou tiitakle.”

⁸ Pailatnii samhang ai shii wosek-kii, mpounii kisii hingtakle;

⁹ Mpounii Praetorium ki kalung tei liitsanii Jisu dakii tamle, “Nang kada kitopo?” Nlenii Jisunii mpougo khepyii sutakle.

¹⁰ Pailatnii mpou dakii tamle, “Nang n-gu rashiilakpo? N-go mpat matutang karam ninado n-go krosh gamkii gimatutang karam mah teimaham tei guda leile katu nang timakpo?”

¹¹ Jisunii mpougo khekalatle, “Sagoi gamto godakii pyii suleponii, gu phyiiryiikii gomah teimaham samah kado gatangle. Teijangpii godakii n-gu kapyii ahmah kem tei kisii dile.”

¹² Pailatnii ai shii wosek-kii, mpougo mpat aitang karam jangpii tiile, Nlenii Jehudimeinii saasii tamle, “Nang Kaisar kangpii makle; mpouroinapii mpougo sagong tiimatu katu mei hangteinii Kaisargo rangkapa meile.”

¹³ Pailatnii samhang ai shii wosek-kii, mpounii Jisugo saba pangpatsii, Hebru latpii Gabbatha katu kuitupii kakoi sii kalat bam nito kalei samtak katiibam gamtei bam wotakle.

¹⁴ Sateichii teitei kaaka- maju takbai mah tiikakada piinei leimikle, ninado teitei pung saruk tinglangdoule, Mpounii Jehudimei dakii tamle, “Julo, gonyii mah sagong!”

¹⁵ Ahnyiinii rok sagoisii saale, “Mpougo gi ailo, mpougo gi ailo, mpougo krosh gamkii gi ailo!” “Gonyii mah sagong go Inii krosh gamkii gitangpo?” Kanat kajum tingdimei hangteinii tamle, “Kaisar supii nyiimah sagong kaki gale.”

¹⁶ Mpounii teitinglang kak mpougo krosh gamkii gimatutang karam jangpiinii ahnyii dakii pyii aitakle.

Jisugo krosh gamkii gikatu

¹⁷ Teipiinii ahnyiinii Jisugo pang wotakle ninado mpounii mpou roi- napii mpou mah krosh tei pungsanii, Hebru latpii “Golgotha” sii lat katu Phyiibungrou mah bamsii kalat bam kitei tatpat takle.

¹⁸ Teikito ahnyiinii mpougo ninado mpougo kaswisii kakimei hangnago abi ajiikii ninado Jisugo asumkii kaisii krosh gamkii jotpyii geesii gi aitakle.

¹⁹ Sateichii Pailatnii azei hangninii ryii wosanii krosh gamkii kaipyii takle, ryii kabam teinii: “Nazaret ki Jisu, Jehudimei mah sagong,” katu aile.

²⁰ Jehudimei hangkanii azei ai fiile, kadapokii Jisugo krosh gamkii dhangsii jotpyii gee kabam tei namdi kukile ninado teitei Hebru latpii, Latin latpii sa- teichii Grik latpii ryiibamle.

²¹ Teito Jehudimeiki ka- nat kajum tingdimei hangnii Pailat dakii tamle, “Jehudimei mah sagong sii ryiiseisulo, nlenii ‘I Jehudimei mah sagonglesii mpounii tamle,’” sii ryiiseilo.

²² Pailatnii khekalatle, “Inii ryii kalei tei ryii aitakle.”

²³ Saryiimeinii Jisugo krosh gamkii dhangsii jotpyii kagee tinglang kak, mpoumah peimani tei ahnyiinii poi wosii,

²⁴ Teipiinii ahnyiinii hangninanii hangninii dakii tamle, “Ai ai nyiinii het sude, nlenii ai ai tamah tangpo katu doikabi ju kamagale.” Ai ai kabi rasam kito tam kabam: “Ahnyiinii ahnyii kak kito gu peimani tei njai wotakle, sateichii gu peijou jangpii ahnyiinii doikabi jukamaga takle,” katu tei gong matwi matutang karam jangpiiniile.

²⁵ Teijangpii saryiimei hangteinii tha hang ai tiitakle. Nlenii Jisumah krosh kuteito, mpou pwi ninado mpou pwi sanapei Klopas nou Meri ninado Meri Mekdolen tei satsii leile.

²⁶ Jisunii lungkasyii mpou pwi ninado boumei teinii kuto sat kalei tei Jisunii ngou wosek-kii, mpou pwi dakii tamle, “He sapwi mpei, Julo, gonah sapfii mpougo!”

²⁷ Teito mpounii mpou boumei dateikii tamle, “Julo, gopwi go!” sateichii teitinglang sekpii boumei teinii mpoupeigo mpou kikii pang gongkai wotakle.

Jisunii katai

²⁸ Aitaito Jisunii tha hangtei aitoinii tiimashang takle katu tei tiwosii, kabi rasam tei kasangpii gong matwi matutang karam jangpii mpounii tamle, “I saryiile.”

²⁹ Kahengdwi piinii tokryii kalei li hangninii leile; teipiinii kahengdwi kiteikii Sponze hangninii mpong matwum wosii hyssop tingrang hangninii kikii kai wotakle, sateichii mpoumah mwijong toikii poi matu- pyii takle.

³⁰ Mpounii kahengdwi tei sak wosek-kii mpounii tamle, “Sangtakle” teito mpounii mpouphyii nkuimangsii taitakle.

Jisugo ngiipii kalaat kahui

³¹ Teito Jehudimei mah teimaham kajum meihang teinii ting gamkii dhangsii gikaleimei hangmah pi hangtei ahnyiigo laktui maleisii ahnyii mah pumrong hangtei krosh gamto poi m-mang maleilosii ahnyiinii Pailat dato khangle, dapodinchii ai ai jangmangii piineile sateichii gong kalei bam ntak piinei leimik ai arou tiisii kamatei piinei leimik katu taiswisii, pumrong hangtei bam ntak piinei leimik krosh gamkii mbam tang karam tei ahnyiinii marai makle.

³² Teipiinii saryiimei teinii gongsii mpougo kaswisii ting gamkii dhangsii gikalei kareipii ninado kanapii mah pi hangtei laktui aitakle;

³³ nlenii ahnyiinii Jisuda patsii mpounii tai katu tei ngou wosek-kii, ahnyiinii mpou pi tei laktui sutakle.

³⁴ Nlenii saryiimei hangninanii mpoumah katu kalaat kikii angiipiinii hui takle, sateichii binasek-kii zai ninado dwi tei pat takle.

³⁵ Sateichii gonyiiniido malum matutang karam jangpii mikpiinii ngou kalu ah teinii sakchyii tei pyiitakle, sateichii ah mah sakchyii tei kasangle ninado ahnii kasang tam leile katu Mpounii tile.

³⁶ Kadapokii mpoumah rou hangninii kado tuilakle sii katam kabi rasam tei gong matwi matutang karam jangpii aihang ai aitiisii pat takle.

³⁷ Kabi rasam kaki hangninii kito tamloile, “Ahnyiinii ngiipii huikalei mpou gotei ahnyiinii jutangle.”

Jisugo poigoi katu

³⁸ Aitaito Jehudimeigo kahing jangpiinii makumpii, Jisu mah boumei hangninii tiisii kalei Ari- matiya ki Josephnii Jisu mah katai pumrong tei mpounii poitu tang karam jangpii Pailat dato khang takle, sateichii Pailatnii mpougo mazhiipyii takle. Teipiinii mpounii gongsii mpou mah pumrong tei poitu takle.

³⁹ Sateichii tingneikii tinghum mpouda kareiki gong katupii Nikodimas niido Myrrh ninado aloes ryii nja katu kg. tamrhiikii masui katu tei poigongsii Joseph go kaswisii tat tutakle.

⁴⁰ Ahnyiinii Jisu mah pumgrong tei poiwosii, Jehudimei mah ajaitaiswisii poigoi tang karam jangpii manam kabi pot hangtei kaswisii kamajyii kamanoi peirapii kajyii aitakle.

⁴¹ Mpougo kagi nitei toipyiilu hangninii leile, sateichii toipyiilu lungtei meigo kado goisang goikasu roubam kasatai hangninii leile.

⁴² Teipiinii Jehudimei mah tiikakada piinei leimik katu taiswisii ahnyiinii Jisugo tei kikii kai aitakle, dapodinchii roubam tei da-manangsii leile.