JONNII KARYII KABI RASAM JUKAMATI 16 - KARANU KABI SAMTAM

¹ “Gonyii mah kamalum tei gonyiinii matou matulak tang karam jangpii, aihang ai Inii gonyii dakii tam takle.

² Ahnyiinii Jehudimei mah ndwini teito gonyiigo paktoi tangle, sateichii gonyiigo kagimei kata hangninanii tiikalei aipii mpounii Saraago nga ngalei lesii maning tang karam tinglang tei gong leitakle.

³ Sateichii ahnyiinii aihang ai tiitangle, dapodinchii ahnyiinii Pfii godo n-gudo timakle.

⁴ Nlenii ahnyiinii aihang ai tiikatu tinglang tei gongsekchii, Inii gonyii dakii reipii tam takle katu gonyiinii maning gong matu tang karam jangpii, ai ai Inii gonyii dakii tam takle. “Aihang ai Inii gonyiigo saroisekto tam makle, kadapokii Inii gonyiigo kaswisii leile.

Rangii kamatei mah tha

⁵ Nlenii aitoinii n-gu lang kamagong ahda I-tat tutang takle, sateichii gonyii kak kito mei kado n-gu Nang kadaki tat tuleziipo? katu n-nhiimakle.

⁶ Nlenii Inii gonyii dakii sam hang ai katam jangpii gonyii lung kamage katu teipiinii tokryii takle.

⁷ Nlenii Inii gonyii dakii kasangpii tam leile, Inii tat katu ai gonyii jangpii bibwile, kadapokii Inii tat tusuleponii; tiikahapii tei gonyiida gongsang gonglakle, nlenii Inii tat tuleponii, Inii ahgo gonyii dakii lang magong tangle.

⁸ Sateichii ahnii gongsekchii, kem ninado kasang, kamajyii ninado samtak katii mah kaang kito sazyii pouryiigo tam matipyii tangle.

⁹ Kem mah kaang kito, ahnyiinii n-gu malum makle;

¹⁰ kasang kamajyii mah kaang kito, dapodinchii Inii Pfiida tat tutang takle sateichii gonyiinii n-gu ngoukai lak takle;

¹¹ sateichii samtak katii mah kaang kito, sazyii pouryii aimah apum katiipii gotei samtak tii aitakle.

¹² “Inii gonyii dakii tam tang karam hangniikii leile, nlenii gon- yiinii teihang gotei pungpei wolakle.

¹³ Nlenii kasang mah rangii teinii gongsekchii, ahnyiinii gonyiigo kasang hang kiteikii chyiitatpyii tangle; kadapokii ahnii mpou teimaham kito roinii kito tam lakle, nlenii ahnii shiikalu hangtei ahnii tam tangle sateichii gongtang karam hangtei ahnii gonyii dakii tam matipyii tangle.

¹⁴ Ahnii n-go tam matoi tangle, kadapokii ahnii gudato gumah tei poiwosii gonyii dakii teitei matipyii tangle.

¹⁵ Pfii mah kalei hangtei gumahle; teijangpii ahnii gudato gumah tei poisanii gonyii dakii teitei matipyii tanglesii Inii tamle.

Swi kashyii ninado ka-nta

¹⁶ “Tinglang shangniikii sousekchii gonyiinii n-gu ngoukailak takle; sateichii nlailoisii tinglang shang- niikii sousekchii gonyiinii n-gu ngoutangle.”

¹⁷ Mpoumah boumei kangkanii hangninanii hangninii dakii tamle, tinglang shangniikii sousekchii go- nyiinii n-gu ngoukailak takle, sateichii tinglang shangniikii sousekchii gonyiinii n-gu ngoutangle, kadapo- dinchii Inii Pfiida tat tutang taklesii mpounii nyii dakii katam ai kada- peipo?

¹⁸ Ahnyiinii tamle, “Tinglang shangniikii sousekchii sii mpounii katam ai kadapeipo? Mpounii kadapei tam leipo nyiinii timakle.”

¹⁹ Ahnyiinii n-nhiikanyii tei Jisunii tiwosii, ahnyii dakii tamle, “Tinglang shangniikii sousekchii gonyiinii n-gu ngoukailak takle, sateichii nlailoisii tinglang shang- niikii sousekchii gonyiinii n-gu ngou tanglesii Inii tam kabam aikaang kito gonyii kak kito gonyiinii n-nhii leipo?

²⁰ Kasang kasangpii Inii gonyii dakii tam leile, gonyiinii hatdo hat tangle, mageedo magee tangle, nlenii sazyii pouryiinanii nta tangle; gonyiinii lung kamage tangle, nlenii gonyii mah lung kamage tei ka-nta kikii ndatkai pyiitangle.

²¹ Sapwi meinii nah lungtuna swi kamagele, kadapokii mpoupei mah kamage tang karam tinglang tei gongtakle, nlenii mpoupeinii nah tei manaa m-mang sek-kii, mpoupei mah kamage hangtei mangai aile, dapo- dinchii sazyii pouryiikii nah hang- ninii manaa m-mang kabam jangpiinii ntale.

²² Tei takumpiinii aitoi gonyiido lung kamage leile; nlenii Inii gonyiigo ngouloi tangle sateichii gonyii lung nta tangle, ninado gonyii mah ka-nta tei mei kaniido gonyii dato poitoi lakle.

²³ “Sateichii teipiinei tei samah hangninii kado gonyiinii gudato n-nhiilakle. Kasang kasangpii Inii gonyii dakii tam leile, gonyiinii Pfii dato mah katalyii khang leponii, mpounii gu zei kito teitei gonyii dakii pyiitangle.

²⁴ Aitoi katang gonyiinii gu zei kito mah kado khang makle; Khanglo, katunii gonyii mah ka-nta tei matwi mashang matu tang karam jangpii gonyiinii doutangle.

Sazyii pouryiigo ngam kalu

²⁵ “Aihang ai nda tiisii Inii gonyii dakii tam takle; gonyii dakii nda tiisii tamloi supiinii Pfii mah kaang kito madupii Inii gonyii dakii tam tang karam tinglang tei gonglei takle.

²⁶ Teipiinei leimik gonyiinii gu zei kito khang tangle sateichii Inii gonyii jangpii Pfii dakii riitapyii tangle katu Inii gonyii dakii tam makle;

²⁷ kadapokii Pfii sekpiinii gonyiigo lungsyiile; dapodinchii gonyiinii n-gu lungsyiile, sateichii Inii Pfii dato gongle katu gonyiinii malum wotakle.

²⁸ Inii Pfii dato gongle sateichii Inii sazyii pouryii aiki gong takle, nlailoisii Inii sazyii pouryii ai toi aisii Pfiida tat tutang takle.”

²⁹ Mpou boumeinii tamle, “Oh, aitoinii nda katiisam teisupii, madurahapii nangnii tamlei takle.

³⁰ Nangnii mahlyii hang tile, sateichii meikado n-go kachyiinhii tang karam gale katu aitoinii nyiinii titakle; aipiinii Saraa dato nang gongle katu nyiinii malumle.”

³¹ Jisunii ahnyiigo khekalatle, “Aitoinii gonyii malum takpo?

³² Julo, gonyii meihang mpou mpou kito marou maruksii, n-gu roinii toimareidek tang karam tinglang tei gonglei takle, nle, kasangpii teitei gong takle. Teitii kido Inii I-roinii makle, Kadapokii Pfiinii n-gu kaswi leile.

³³ Gonyiinii gudato kamajung tei doumatu tang karam jangpii samhang ai Inii gonyii dakii tam takle. Sazyii pouryiito gonyiinii kamage kalak doule, nlenii ntatulo, sazyii pouryiigo Inii ngamwo takle.”