JONNII KARYII KABI RASAM JUKAMATI 11 - KARANU KABI SAMTAM

Lazarusnii katai

¹ Meri ninado mpoupei sung katingpei Martha mah nam Betani kito Lazarus sii kalat sapfii- mei hangninii ranisii bamle.

² Meri katupei ai Bangpii mah pi pazhii kikii kairum kabi thao ruikaipyiisii mpoupei mah aphyiitaampii piit mathang kapyiipei teile, ranisii kabam tei mpoupei hiipii Lazarus teile.

³ Teipiinii mpou taipwi kana teinii Jisu dakii sam tam magongsii tamle, “Bangpii nangnii lungkasyii go kangpii tei ranisii bam takle.”

⁴ Nlenii Jisunii tei shii wosek-kii tamle, “Rakani ai katai rani makle, ainii Saraago tam matoitang karam sateichii ai paikito Saraa nah sapfii mpou gotei tam matoitang karam jangpiiniile.”

⁵ Jisunii Marthago, mpoupei taikarhiipei ninado Lazarus go lungsyiile.

⁶ Teipiinii Lazarus rani- ziile katu sampao tei mpounii shii wosek-kii, mpounii kalei bamni teito mpounii leimik hangna kisii bamtakle,

⁷ Sateichii tei taito bou- meihang dateikii tamle, “Nje nyiinii Judiya ki nlailoisii maale.”

⁸ Boumei teinii mpou dakii tamle, “Rabbi, (Katunii madhiikapyiipii) nlenii Jehudimeinii n-go kuitupii rotlesii aitoinii fiilei takle, nang teiki gongloi leziipo?”

⁹ Jisunii khekalatle, “Tingna mah kavaki tei pung keariisiinakhii leimakpo? Mei kata hangninanii tingna kavaki tatleponii, ahnii pi pasui leimakle, dapodinchii sazyii pouryii mah kava gotei ahnii ngou leile.

¹⁰ Nlenii mei kata hangninanii tinghum tatleponii, ahnii pi pasuile, dapodinchii kava tei ahdato gale.”

¹¹ Tei tiisii mpounii tam takle ninado mpounii ahnyii dakii tamle, “Nyii kangpii Lazarus nii zyiitu takle, nlenii Inii mangsii mpougo makeng matu tangle.”

¹² Boumei teinii khekalatle, “Bangpii, mpounii zyiitu takleponii, mpounii ra gatu tang takle,”

¹³ Jisunii mpou mah katai mah kaang kito tam takle, nlenii zyiisii ntak leile katu mah kaang kito mpounii tam leilesii ahnyiinii maningtakle.

¹⁴ Teito Jisunii ahnyii dakii madurahapii tam takle, “Lazarus nii taitakle.

¹⁵ Gonyiinii malum kabui tiisii, gonyii jangpii Inii mpougo kaswisii teiki bam kasu ai I-ntale. Nlenii nje nyii mpouda maale.”

¹⁶ Thomas (mbiitnah sii kalatpii) teinii mpoubemei hang dateikii tamle, “Nyiinii mpougo kaswisii tai kabui jangpii, nje nyiido tatde!”

Jisu ai ringkakhii ninado karing teile

¹⁷ Aitiisii Jisunii kagong tinglang kak, mpougo roubam kikii goikalei aitoinii leimik madai pat takle katu doutakle.

¹⁸ Betani ai Jerosalem kuto mail hangnakii dhiisii leile;

¹⁹ Sa- teichii mpoupeina hiipii Lazarus mah kaang kito mpoupeinago twumtang karam jangpii Jehudimei hangkanii Martha nei Meri datei gongtakle.

²⁰ Jisunii gong leile katu tei Marthanii shii wosek-kii, mpoupeinii mangsii mpougo kadou wotakle, nlenii Merinii kilungto bamle.

²¹ Marthanii Jisu dakii tamle, “Bangpii, nang aiki leileponii, gu hiipii tei tailak takle.

²² Nlenii aitoi katangdo nangnii Saraa dato kakhang hangtei, Saraanii n-go pyiitangle katu Inii tile.”

²³ Jisunii mpoupei dakii tamle, “Gohiipii ringkhii loitangle.”

²⁴ Marthanii mpou dakii tamle, “Kalui piinei leimik ringkakhii kiteito mpounii ringkhii tangle katu Inii tile.”

²⁵ Jisunii mpoupei dakii tamle, “Ringkakhii ninado karing tei I-le, n-gu kamalum mei hangteinii tai ai kido ringtangle;

²⁶ sateichii ringsii kaleimei hangtei ninado n-gu malumsii kaleimei hang teinii taisang tailakle, nang ai malum makpo?”

²⁷ Mpoupeinii mpou dakii tamle, “Nle malumle Bangpii, Nangnii Saraa nah sapfii mpou Krista, sazyii pouryii gongtang karampii teile katu Inii malumle.”

Jisunii kahat

²⁸ Mpoupeinii ai tam aisek-kii, mpoupeinii mangsanii Merigo ma- kumpii lat tosii, “Madhiikapyiipii tei aiki leile, ninado n-go lat leile,” sii tam takle.

²⁹ Mpoupeinii tei tei shii- wosek-kii, kalangsii gungtusii mpou datei tat tutakle.

³⁰ Jisunii nam kitei gongmaklerei, nlenii Marthanii mpougo kadou katu bam kiteito leile.

³¹ Teipiinii mpoupeigo kaswisii ki- lungto bam kalei, mpoupeigo twum kalei Jehudimei hangteinii, Merinii kalangsii gungtusanii pak kapat tei ngou wosek-kii, mpoupeinii roubam kiteito hat tang karam jangpii pak lei taklesii maningsanii, ahnyiinii mpoupeitai tei swiwo takle.

³² Jisunii kalei nitei Merinii gongsanii mpougo ngou wosek-kii, mpou doitei koumang sanii tamle, “Bangpii nang aiki leileponii, gu hiipii tei tailak takle.

³³ “Mpoupeinii ninado mpoupeigo kaswisii kagong Jehudimei hang teinii hat kalei tei Jisunii ngou wosek-kii, mpou tei rangiilamto hungsii nlaitakle ninado samousu takle!”

³⁴ Mpounii n-nhiile, “Gonyii- nii mpougo kada kikii poigoi aipo?” ahnyiinii mpou dakii tamle, “Bangpii patsii juseilo.”

³⁵ Jisu hatle.

³⁶ Teipiinii Jehu- dimei hangnii tamle, “Julo, mpounii ahgo kadaziikapii lungsyiipo!”

³⁷ Nlenii ahnyii mei kangkanii tamle, “Mik kachetpii mik tii mbikapyii mei ainii mei aipou aigodo tai matu kasu tiipei wolak takpo?”

Lazarusgo tiimaring pyiiloi takle

³⁸ Teito Jisunii lung hungsii dengloisii, roubam kitei tatkhii takle sateichii roubam tei kuitu ki karung hangniniile sateichii mwikum phyii- ryii teikii kuitu hangninii kaibamle.

³⁹ Jisunii tamle, “Kuitu tei poitoilo,” kataipii taipwi Martha teinii mpou dakii tamle, “Bangpii aitoinii pum- rong tei manam tang takle, daponii mpou ai tai kalei tingnei leimik madai pat takle.”

⁴⁰ Jisunii mpoupei dakii tamle, “Nangnii malum leponii, Saraa mah pumtei kava ngoutangle sii Inii godakii tamtak makpo?”

⁴¹ Teipiinii ahnyiinii kuitu tei poitoi aitakle ninado Jisunii rajang matusanii tamle, “Pfii-o, nangnii n-gu shii kapyii jangpii Inii n-go halangle.

⁴² Sateichii tinglang kaleita nangnii gumah kariita shiipyiile katu Inii tile. Nlenii nangnii n-gu lang magong pyiile katu ai dato sat kaleimei hang ainii malum matutang karam jangpii, Inii ahnyii jangpii ai ai tam takle.”

⁴³ Mpounii sam ai tamsanii rok sagoisii saale, “Lazarus patlo.”

⁴⁴ Kataipii teinii pi bah peipii peibamsanii pat takle, ninado mpou jutei peipiinii kajyii bamle. Jisunii ahnyii dakii tamle, “Mpougo ra mpatsii tat matulo.”

Jisugo gilesii tiikatu

⁴⁵ Teijangpii Merigo kaswisii gong katu Jehudimei hangkanii mpounii katii tei ngou wosii mpougo malum wotakle;

⁴⁶ Nlenii ahnyii mei kangkanii Farasismei datei mangsii Jisunii katii hangtei tam mangou- takle.

⁴⁷ Teipiinii kanat kajum ting- dimei ninado Farasismei hangteinii katingmei hang gotei pang nkom wosii tamle, “Nyiinii kadapei tii- tangpo? Kadapokii sapfii mpou ainii tiikamangou siiti hangka tiitakle.

⁴⁸ Nyiinii mpougo aitiisii tiijousii malei leponii, meihangnii mpougo malum tang takle, sateichii Rom meinii gongsii nyiimah kamatei bam hangdo sateichii nyii luihang godo tiimaga aitang takle.”

⁴⁹ Nlenii ahnyii kak kito mei hangninii Kaifas, sii kalat teipiikum kanat kajum Tingditupii bam poika- leipii teinii ahnyii dakii tamle, “Gonyiinii samah kado timakle;

⁵⁰ Mei hangninanii meihang tungtiisii tai- pyiisanii luihang maga kasu teinii gonyii jangpii bibwile katu gonyiinii swi mashak makle.”

⁵¹ Nlenii sam ai mpounii mpou dato kapatpii tam makle, nlenii Jisunii luihang jangpii taitang karamle,

⁵² Sateichii lui hang jangpii roinii supiinii, marou maruksii kalei Saraa mah nahmei hang go mpounii hangninii tiisii poido poi nkom tang karam jangpii- niile katupii mpounii teipiikum tei kanat kajum Tingditupii tiisii, mpounii Saraa sam saa mpatle.

⁵³ Teijangpiinii teipiinei leimik sekpii ahnyiinii mpougo gitang karam jangpii sam rashii wotakle.

⁵⁴ Teijangpii Jisunii Jehudimei kak kito nlailoisii madupii roitat sutakle, nlenii sazyii kamarong kuto kalei, Ipraim sii kalat namdi nitei tat tutakle, ninado teikito mpounii mpou boumei hang go kaswisii bamle.

⁵⁵ Jehudimei mah kaakamaju takbai tei nagong leitakle, sateichii meihang kanii kaakamaju mah takbai doikii tiikamatei mah kanat tei tiitang karam jangpii namdi kito Jerosalemki tatpi takle.

⁵⁶ Ahnyiinii Jisugo fiisanii Saraa kamaning kilung teito ndwisanii hangninanii hangniniigo tamle, “Gonyii kadapei maningpo? Mpou takbaiki gong lakpo?”

⁵⁷ Sungto reipiinii kanat kajum Tingdimei ninado Farasismei hangnii mwija pyii aitakle, katunii mpou kadaki leipo katu mei kata hangninanii tileponii ahnyiinii mpougo jumtang karam jangpii mei teinii ahnyiigo tam mangou tang karamle.