JONNII KARYII KABI RASAM JUKAMATI 10 - KARANU KABI SAMTAM

Jaokakoipii mah ndasam

¹ “Kasang kasangpii Inii gonyii dakii tam leile, ki takam kito liit supiinii, pwidi kaki kito marakhiisii jaokoi kak ki tat kaliit ah teinii karagameile ninado mah kasoumeile.

² Nlenii ki takam kito tat kaliit ah teinii Jao mah Jaokakoipii teile.

³ Ki takam kakoipii teinii mpou jangpii ki takam tei laatpyiile sateichii mpou mah jaohang teinii mpourok tei shiile, sateichii mpounii mpoumah jao hang gotei mpou mpou zei tei latsii saba pangpatpyiile.

⁴ Mpounii mpoumah hangtei saba pangpat sek-kii, mpounii ahnyii doi reisii tatleile sateichii jaohang teinii mpoutai swi leile, kadapokii ahnyii- nii mpoumah roktei tile.

⁵ Ahnyiinii mei kakimei taitei swisang swilakle, nlenii ahnyiinii ah dato pakga tangle, dapodinchii ahnyiinii mei kakimei mah roktei timakle.”

⁶ Ndasam ai Jisunii ahnyii dakii tamle, nlenii mpounii ahnyii dakii tam kalei tei kadapeipo katu ahnyiinii timakle.

Jisu kabi Jaokakoipii

⁷ Teipiinii Jisunii ahnyii dakii nlailoisii tamle, “Kasang kasangpii Inii gonyii dakii tam leile, Inii Jaomah takam teile.

⁸ Gudoi reisii kagongmei hangteinii karagamei ninado meimah kasoumei hangle, nlenii Jaohang teinii ahnyiigo shii- pyii makle.

⁹ Inii takam teile, mei kata hangninanii gudato liit leponii, ahgo keipyii tangle sateichii ahnii tatpat tatliitsii hiiboi kabi tei doutangle.

¹⁰ Karagamei teinii raga tang karam jangpii ninado gitang karam jangpii sateichii tiimaga tang karam jangpii roinii gongle. Inii gonyiinii karing tei doumatu tang karam jangpii sateichii teitei moisii doumatu tang karam jangpii gongle.

¹¹ “Inii kabi Jaokakoipii teile. Kabi Jaokakoipii teinii mpou mah Jaonah hang jangpii mpou mah karing tei pyiile.

¹² Jaohang gotei mpoumah sek tiikasu, Jao kakoipii kasu ninado janglai kalu ahteinii sangyii gong kalei tinglang kak, jao hang gotei rat toi aisii pak tule; ninado sangyii teinii ahnyiigo num wole ninado baamarou maruk toile.

¹³ Mpounii pak tule dapodinchii mpounii Jao hang jangpii samah kado maningsei makle ninado janglai kalumei hangniniile.

¹⁴ Inii kabi Jaokakoipii teile.

¹⁵ Pfiinii n-gu tisii kalei takumpii sateichii Inii Pfiigo kati takumpii, Inii gumah hang gotei tile, sateichii gumah hang teinii n-gu tile ninado Inii Jao hang jangpii gumah karing tei matou pyiile.

¹⁶ Sateichii jaokoi aiki haikasu gumah jao kakido leile; ahnyii goteido Inii pang gong tang karamle, ninado ahnyiinii gumah roktei shii tangle; sateichii ahnyiinii Jaoka- koipii hangniniigo kaswisii jaokoi hangninii tiitangle.

¹⁷ “Kaang aijangpii Pfiinii n-gu lungsyiile, dapodinchii Inii gumah karing ai nlailoisii dou kabui tiisii Inii gumah karing ai matou pyiile.

¹⁸ Mei kaniido gumah karing poitoi makle, nlenii Inii guroinapii mazhiisii matou pyiile; Inii teitei matou tang karam gumah teimaham leile, sateichii Inii teitei nlailoisii poiloi tang karam Gumah teimaham leile; kakhatsam ai Inii Pfii dato doutakle.”

¹⁹ Sam aihang jangpiinii Jehudi- mei kak kiteito njairiit riit pat takle.

²⁰ Ahnyii mei hangkanii tamle, “Mpounii sara kashyii hangninii kaswi leile ninado n-gok leile, gonyiinii dajangpii mpou sam shii leipo?”

²¹ Kakimei hangteinii tamle, “Ai sara kashyii kaswi kaleimei mah samtam makle, sara kashyiinii mik kachetmei mah tii-mbipyii wobuipo?”

Jisugo mazhii kasu

²² Teitaito Saraa kamaningki tiikamatei mah takbai tei Jerosalem kito pat takle;

²³ tei tei sateidoule, sateichii Jisunii Solomon mah nsung- bam kamwi ki, Saraa kamaning kilung teito tatsii leile.

²⁴ Teipiinii Jehudimei hangteinii mpougo gong bangmagwisii tamle, “Nangnii nyiigo tinglang kada takii maning rarhiisii mbam tangpo? Nang Krista teile- ponii nyiigo madurahapii tampyiilo.”

²⁵ Jisunii khekalatle, “Inii gonyii dakii tam takle ninado gonyiinii malum makle, Inii gu Pfii zei kito katiihang teinii gumah sakchyiile;

²⁶ nlenii gonyiinii malum makle, dapodinchii gonyiinii gumah jao hang kak kitei haimakle.

²⁷ Gumah jaohangnii gumah roktei shiile sateichii Inii ahnyiigo tile ninado ahnyiinii gutai swile.

²⁸ Inii ahnyii dakii kalui kaga karing tei pyiile, ahnyiinii madou kado gasang gatu- lakle sateichii mei kaniido ahnyiigo gubah kito numpoitu wolakle.

²⁹ Gudakii kapyii gu Pfii teinii hang doito dikile sateichii mei kaniido Pfii mah bah kiteito poitoipei wolakle.

³⁰ I ninado Pfii teinii hangniniile.”

³¹ Jehudimei hangteinii mpougo kuitupii rot tang karam jangpii kuitu nlailoisii poi wotakle.

³² Jisunii ahnyii dakii khekalatle, “Aikak kito kadapii jangpii gonyiinii n-gu kuitu rotnesiipo?”

³³ Jehudimei hangteinii mpougo khekalatle, “Tha kabi jangpii nyiinii n-go kuitu rotleziimakle, nlenii Saraago tam kamashyii jangpiiniile, sateichii nangnii mei hangninii tiisanii n-go roinapii n-go Saraa tiikatu jangpiiniile.”

³⁴ Jisunii ahnyiigo khekalatle, “Gonyiimah ajaitingshang kiteikii, Inii tam takle, ‘Gonyii sara hangle,’ sii ryiibam makpo?

³⁵ Saraa mah samkang gong tang kalu ahnyii gotei mpounii sarahang sii latleponii (Sateichii kabi rasam teinii tiipakpei wolakle.)

³⁶ Inii Saraa nah sapfii mpoulesii Inii tam katu jangpii, Pfiinii kalai wosii sazyii pouryiikii lang m-mang kapyii ah gotei, nang Saraago tam mashyiilesii mpoumah kaang kito gonyiinii tam leipo?

³⁷ Inii Pfii mah kamaning kamazhii tei tiiziimak leponii n-gu malum sulo,

³⁸ nlenii Inii tiiziileponii, gonyiinii n-gu malum mak kido, Pfii teinii gudato leile sateichii Inii Pfii dato leile katu gonyiinii tigong tang karam jangpii tha hangtei malumlo.”

³⁹ Nlailoisii ahnyiinii mpougo jumtang karam jangpii tiitakle, nlenii mpounii ahnyii bah kiteito nlek wotakle.

⁴⁰ Teito Jon-nii dwi mpum pyiisii kalei Jordan karyii lugang tei Jisunii nlaipatle sateichii mpounii teikito ntak takle.

⁴¹ Sateichii mei hang- kanii mpouda gongsii tamle, “Jon-nii siiti tiikamangou mah kado tiimakle, nlenii Jonnii sapfii mpou aipou mah kaang kito katam hangtei kasang takle.”

⁴² Sateichii mei hangkanii bam teikito mpougo malum wotakle.