JEMS 3 - KARANU KABI SAMTAM

Mahlyiigo jum kamatwi

¹ Gu kangsanamei, madhiikapyii- mei nyiinii kisii kamaswi samtak katii tei doutangle katu tei tisii, gonyii mei hangkanii madhiikapyiimei tiilak tang karamle.

² Kadapokii nyiihang ai tiikama tei hangkii tiisii leile. Mei kata hangninanii ahmah tam kalei samtam kito tiisang tiima suleponii, ahnii ahmah pumpot hang godo jum majyii jum matuiwo buile, sateichii ahnii bikamatui meile.

³ Sateichii nyiinii katam tei takoi teinii swimatu tang karam jangpii, nyiinii ahnyiimah mwi kiteikii sagyii kanat tei kaileponii, ahnyiimah pumpot hang goteido nyiinii chyiitat kanyiini tat matuwo buile.

⁴ Malyii garyii hang gotei julo, ahnyii tei hangkapii dikado, sateichii tingkai katei teinii gwitatsii leikado, teizii- kapii chengkalei malyii kakaryii-nak teipiinii, kakaryiipiinii, gong matu kanyiini hangki teikii gong matu wobuile.

⁵ Tei takumpii malyii ai pumpotmah njai kacheng hangni- niile, ninado sam kadi kadi malhiile. Julo, daziikapii chengkalei mi teipii daziikapii dikalei zang gotei mi shongtoi woleipo!

⁶ Malyii ainii pum- pot hang go tiimahongsii, nyiimah karing tiilung pwidi hang go, mibam kito kagong mah mi teipiinii mi kaisii kalei, nyii pumpot hang kak kito kasang kamajyii kaga sazyii pouryii teile, sateichii malyii ainii mile.

⁷ Kadapokii kounah, ruinah, moipii chyiikarhiisii katat kounah, sateichii dwijai kito kalei dwikounah gonii meinahnii tiirazyii wobuile, sateichii hemdo hemwo takle,

⁸ nlenii malyii gonii mei kaniido tiirazyiipei womakle; ahnii ka-ntak kaga kashyii kahong teile, sateichii tai kabui hiikara teipiinii tokryiile.

⁹ Tei teipiinii nyii Bangpii, nyii Pfiigo nyiinii hakalang tamle, sateichii teiteipiinii Saraamah njoi kito tiikabam meinahgo nyiinii sheengle.

¹⁰ Hakalang katamdo, meigo kasheengdo njoi katu mwi hangninii kito patle. Gukang sana- mei, aihang ai tiilak tang karamle!

¹¹ Dwipok teinii dwipokbam njoi katu hangninii kito kakum dwi ninado kakhadwi pokpat leipo?

¹² Gukang sanamei, kadiitbang teinii sungchyiiti mak-kii darkha bang teinii kadiit-ti matiwo buipo? Zai dwi teinii dwi kabi ndat matupeiwo lakle.

Kasang swirek kabi

¹³ Gonyii kak kito kasakai satei- chii kati tei tapo? Swirek kabimah kamanoi teipii, ahmah kabi tiilung kalung teipii, ahmah thalyii hangtei ahnii mangou matulo.

¹⁴ Nlenii gonyii lung kito hangkapii kamaimhii ninado mpoujangpii roinii kamaning tei leileponii, gomah swirek kabi kito detdisii kasang dateito tiimatusulo.

¹⁵ Tei kakum swirek kabi tei sagoi gamto kahum tei makle, nlenii tei- teinii sazyii pouryiito, rangiimah kasu, sara kashyii mahle.

¹⁶ Kada- pokii kamaimhii ninado mpoujangpii roinii maningsii kalei nitei adok tiikasu ninado tha kashyii kahong hangtei leile.

¹⁷ Nlenii sagoi gamto kahum swirek kabi teinii karei rei- sang kito kamateile, teito kama- jungle, lung kamanoi, kariita kito kalei, lungsyii kati, ninado kabi hang- tei piinii katokryii, meigo maning mashyii kasu, kabijai tiinyii kasu teile.

¹⁸ Sateichii kasang kamajyii- mah rachet teinii tiikamajung meinii majungsii lwi ralikai kabam teile.