JEMS 2 - KARANU KABI SAMTAM

Kaghu kaphang gasii meihang go masamsii tiitang karam

¹ Gu kangsanamei, pumtei kavamah Bangpii, nyii Bangpii Jisu Kristago kamalum mei tiisii, meinah mah apouju taiswisii gonyiinii kaghu kaphang tei tiisang tiilak tang ka- ramle.

² Kadapokii sana raguibapii katii bah jungna rangkat kaikalei sateichii nat kabi kakaimei hangninanii gonyiimah ndwibamki gongleponii, sateichii nat kashyii kaikaleimei kagamei hangniniido gongleponii,

³ sateichii mah kagapii gotei “teiki satlo” mak-kii “gupibang bamlo” sii gonyiinii tamsanii, nat kabi kaikaleipii gotei gonyiinii sadzyii ngariit tiisii mpougo “bam kabi bisang ai poiseilo” sii gonyiinii tamleponii,

⁴ gonyii roinapii gonyiinii gonyii kak kito kasagoi kasana tiisii poitaam katu sateichii kashyii kahong swi teipii samtak katii tii aitak makpo?

⁵ Gulungkasyii kangsanamei, shiilo, kamalum kito mah nimatu tang karam jangpii, sateichii Saraago lungkasyiimei hang dakii pyii- tanglesii riishii tiikabam sating gam sazyiimah matou katoumei tiimatu tang karam jangpii, sazyii pouryiito mah kagameigo mpounii kalaipyii makpo?

⁶ Nlenii gonyiinii mah ka- gamei gotei sadzyii ngariit tiimakle, mah kanimei teinii gonyiigo satui sadzyii tiisii, ahnyiinii gonyiigo Sratki chyiimaa makpo?

⁷ Gonyii dakii pyiikabam zei kabi gotei ahnyiinii tam mashyii makpo?

⁸ Kabi rasam kito katam taiswisii, “Nangnii gopum sekgo lungkasyii takumpiinii goki tiinaniipameigo lungsyii tang karamle” katu sagong- mah ajaitingshang tei tiimatui tiima- sang woleponii, kasangpii nang tiimatou takle.

⁹ Nlenii gonyiinii meiju jusii kaghu kaphang tiileponii, gonyii kem tii aitakle sateichii ajaitingshang taiswisii gonyii ai ajaitingshang tiikapak meile.

¹⁰ Kadapokii kakhatsam hangninii tiipak kaleimei teinii matum madum tiipak aitakle.

¹¹ Kadapokii “mashung maha sulo” sii katam mpou teinii “meigo gi sulo” katu aido tamle. Nangnii mashung maha mak kado nangnii meigo gi aileponii, nangnii ajaitingshang tei tiikapakmei tii aitakle.

¹² Arangra tiimatu tang karam mah ajaitingshang teipii samtak tiitang karam mei takumpii, gonyiinii tamdo tamlo, tiido tiilo,

¹³ kadapokii lungsyii kapyii mangou kasu ah dakii samtak katii teinii lungsyii kapyii tei haimakle; nlenii lungsyii kapyii teinii samtak goteinii ngamle.

Kamalum ninado ngam

¹⁴ Gulungkasyii kangsanamei, mei kata hangninanii mpoumah kamalum leilesii tam takpokii, tha katii tei haisu leponii, teiteinii kadapei kabi leipo? Kamalum teinii mpougo kei- pyii wobuipo?

¹⁵ Sanapii hangninanii mak-kii taipwimei hangninanii pei- mani gasii sateichii tingnei tingneikii mah malot tangsu leponii,

¹⁶ sateichii ahnyii pum jangpii tangkasu mah pot hangtei ahnyiigo seisupii, gonyii kak kito mei hangninanii ahnyiigo “ma- jungsii tat tulo, lum wolo, sateichii moi maghii wolo,” sii tam leponii, gomah tam kalei teipiinii ahnyii jangpii kadapei kabi leipo?

¹⁷ Tei- takumpiinii kamalumdo, tha haisu leponii, mpou roinapiinii kataile.

¹⁸ Nlenii mei kangkanii tam tangle, “Nangnii kamalum leile satei- chii Inii tha leile,” tha kito gomah kamalum tei taamsii gudakii mangoulo, sateichii Inii gumah tha teipiinii gumah kamalum tei godakii mangoule.

¹⁹ Saraa hangniniile katupii nangnii malumle, nangnii kamalum tei kabile, sara kashyii hang katang piiniido malumle ninado hingsii nchyiile.

²⁰ Kapangmei gonyii, tha haisupii kamalum ai kataile katu gonyiigo tiimangou lopo?

²¹ Nyii Pfii Abrahamnii mpounah sapfii mpou Isakgo pyiitoi tang karam mpung phyiiryiikii pyiitoi kalei kito tha teipiinii mpougo tiimatui tiimajyii- pyii makpo?

²² Kamalum teinii mpoumah tha tei kaswisii tha tii njoile.

²³ Sateichii tha teinii ka- malum gotei tiimashang pyiile katu gonyiinii ngoule, “Abrahamnii Saraago malumle sateichii mpougo kasang kamajyiimeile katupii lukai- pyiile,” sateichii mpougo Saraamah kangmeisii latle, katu kabi rasam tei gong matwi takle.

²⁴ Tha teinii meigo tiimatui tiimajyiipyiile sateichii kamalum roinii piinii makle katu gonyiinii ngoule.

²⁵ Sateichii tei takumpiinii karalu pwi Rahabnii sampao kapungmei gotei lukaipyiisii ahnyii gotei pwidi kaki hangninii kikii langtoi kapyii kito, tha teipiinii mpoupei godo tiimajyii pyiimakpo?

²⁶ Rangii hai kasu pumrong teinii katai takumpii, tha haikasu kamalum teido tei takumpiinii kataile.