JEMS 1 - KARANU KABI SAMTAM

¹ Saraamah ninado Bangpii Jisu Kristamah kikaleimei hangninii tiisii kalei Jemsnii marou maruksii kalei lui keariisiinakhii dakii salam pyii leile.

Kamalum ninado swirek kabi

² Gu kangsanamei, gonyiida jai- kaju kataam kataam kagong tinglang kak gonyii ai doibilesii gonyii roinapii poi wolo.

³ Kadapokii gonyiimah kamalum mah jaikaju teipii kasangting tei pung gongle katu gonyiinii tile.

⁴ Sateichii gonyiinii samah kado tang kalak tei tiisupii matwi mashangsii sateichii bimatwi tang karam jangpii, gon- yiimah lung leh kati teinii gonyiigo pwidi hangki tiikama gasii soisupii pangtat kabui tiilo.

⁵ Nlenii mei kata hangninanii swirek kabi tei tang suleponii, meihang go pyiisei kapyii ninado jumage kati Saraa dato ahnii khang matulo, sateichii mpounii ah dakii pyii tangle.

⁶ Nlenii ahnii maning kariirhii tei gasii kamalum kito khang matulo. Dapokii maning kariirhiimei hangteinii tingkainii gwipungsii katat ninado gwipat gwiliitsii kalei dwijaimah nloi kalei dwi n-now tei takumle.

⁷ Kadapokii mpounii katiihang kito mpou swi tiidou kalak ninado lungsat kalu kaga sapfiimeile,

⁸ tei kakum mei teinii Bangpii dato samah kado doutangle katu maninglak tang karamle.

Mah kaga ninado kani kahii

⁹ Nlenii mah kaga kangsanapii gotei Saraanii poikasagoi tinglang kak, mpounii nta tang karamle,

¹⁰ sateichii mah kani kangsanapii gotei Saraanii poikasana tinglang kak, mpounii nta tang karamle, kadapokii tinghiinhii mah hiipa takumpii kani tei gatu tangle.

¹¹ Kadapokii leimiknii mpoumah mishong kamaga tei njasii teipii hiinhii gotei ragui matule, mpoumah hiipa tei nrai mang tule, ninado mpoumah ngoukabi tei gatule. Tei takumpiinii mah kanimei teido mpounii mpoumah lu tha kito pusii nangleibang piinii huiga tangle.

Jaikaju ninado kahem

¹² Jaikaju lehsii kaleimei sadoi bile, kadapokii jaikaju kiteito mpounii satto sekchii, mpougo lungkasyii meigo Saraanii pyiitanglesii riishii tiikabam karingmah phyiihung tei mpounii doutangle

¹³ Mpougo hem kalu tinglang kak, “N-gu Saraanii hemwo takle” sii mei kaniido tamlak tang karamle. Kadapokii kashyii teinii Saraago hempeiwo lakle, sateichii mpou sekpiinii meigo kado hemlei makle.

¹⁴ Nlenii mpou mpou- mah kashyii kamaning kamarei teinii chyiikatat teipii sateichii mai kalu teipii meihang go hemwole.

¹⁵ Teito kashyii kamaning kamarei teinii moi mpung wosek-kii kem kama tei manaale; sateichii kem kama teinii disang sek-kii, katai tei manaale.

¹⁶ Gulungkasyii kangsanamei, go- nyiigo kasang kasu tei piinii chuisii hem malu sulo.

¹⁷ Kabi ninado sajek kaga luha hang ai sating gamtole, sakhii leimik nryiisii kalei teipiinii myiimatu kasu mak-kii, kali kasu sating gam mah kava hang go tiika- pyiipii Saraa dato gongle.

¹⁸ Mpoumah karing kounah hang kak kito nyiinii riiti karei hangninii tiimatu tang karam jangpii mpoumah kamaning kamarei kito kasang mah samkang teipii mpounii nyiigo manaapyiile.

Kashii ninado katii

¹⁹ Gulungkasyii kangsanamei, ai ai maning wolo, meihangnii kashii kito kamaring, katam kito kamanyii, sateichii rakarhii kito manyii matulo,

²⁰ kadapokii meinah mah rakarhii teipii Saraamah kasang kamajyii tha tei tiimakle.

²¹ Teijang- piinii katham karaam ninado kaikashyii jairali hangtei rat toi aisii, gonyii rangiigo keipyii kabui lingkai kabam samkang tei lung kamanoi tei njasii lukai wolo.

²² Nlenii samtei kashiimei roinii tiisii, gonyii roinapii gonyiigo kasang kasu teipii chuisii hemwo kasu tiisii, gonyiinii samtei shii wosii tiikatu tiilo.

²³ Kadapokii mei kata hang- ninanii samtei kashiimei tiisanii katiimei tiisuleponii, mpounii sakhii- bung kikii nunuto mpou jugo ngoukalumei takumle;

²⁴ Kadapokii mpounii mpou roinapii mpougo ngouwosii tat tule, sateichii mpou ai kadago reipo katu binasek-kii mangai aile.

²⁵ Nlenii meinahgo laat mpat kapyii, sajek kaga ajaiting- shang kiteikii jusii kalei, teikikii lung pyiisii kalei sateichii mahkupii shiikasu ninado teigo tei mangai kasu, nlenii poisii tha katii, teimei gotei mpounii tha katii hang kito satoi pyii tangle.

²⁶ Mei kata hangninanii mpou ai kanat kanhii kabimeilesii maning takpokii, mpoumah malyii ai jum majyii jum matwi suleponii, mpou- mah kanat ai kadakle ninado mpounii mpouroinapii mpougo chuisii hem wotakle.

²⁷ Nyii Pfii Saraa doito kamatei ninado kahong kaga kanat teinii: pwi pfii kagamei sateichii kamipwimeigo ahnyiimah kamage kalak kito jukaha sateichii mpougo sazyii pouryiimah kashyii kahong kito rum matu kasu aile.