IPISAMEI 4 - KARANU KABI SAMTAM

Pumpot mah swi njoi katu

¹ Teijangpii gonyiigo lat kalu kiteito tiigatpii matwisii lung pyiilosii, Bangpii jangpii kabangki kaleimei hangninii tiisii kalei Inii gonyii dato khangleile.

² Tinglang kaleita lung sanalo, manoilo, sateichii lung leh tilo. Hangninanii hangniniigo lung leh kati teipii kaswisii gonyiimah lungkasyii tei mangoulo.

³ Kamajung kito gonyiigo pei ndwi kapyii rangiimah swi njoi katu tei mbam tang karam jangpii lungnhiilo.

⁴ Saraanii gonyiigo lat kalu kitei maning kamalum hang- ninii kiteikii lat kalu takumpii teiki tei pumpot hangninii sateichii rangii hangninii,

⁵ Bangpii hangninii, kamalum hangninii dwi ka-mpum hangninii, mahlyii hang phyiiryiito kalei,

⁶ mahlyiihang kito tha tiisii kalei, mahlyii hang mah Bangpii, meilui kalung hang mah Pfii sateichii Saraa hangninii leile.

⁷ Nlenii nyii mei nsang nsang dakii Kristamah luhamah kamasak ajhii taiswisii jumage kapyii tei pyiibam takle.

⁸ Teijangpii mpounii aitiisii tamle, “Mpounii kasagoi gam khii katu kak, maringpouchyiimei hangkago mpounii mpougo kaswisii pangsii tutakle. Sateichii meinah dakii mpounii luha tei pyiitakle.”

⁹ Aitoinii, “Mpounii kasagoi gam kakhii” katu ai kadapei gopo? Teiteinii mpounii sazyii mah katuk tuksang ki humpyiile katu gole.

¹⁰ Hum kapyii mpou teinii mahlyii hang go tiitokryii tang karam jangpii, sating gam phyiiryii kado khiikalu mpou tei sekle.

¹¹ Sateichii mpounii mei kangkago tiilamlwi kapyiimei, kangkago lungkakalingmei, kangka- go kabi rasam katam mei, kangkago jao kakoimei, sateichii ralikapyiimei tiimatu tang karam jangpii mpoumah luha hangtei pyiitakle.

¹² Kristamah pumtei tiimakhii kabui tiisii, Saraamah meihang teinii Kristenmei mah nga kanga tha tiitang karam jangpii tiikada matu tang karam jangpii, mpounii ai ai tiile.

¹³ Teipiinii nyiimah kamalum ninado Saraa nah sapfii mpougo nyiimah swirek kati kito hangninii tiisii kalei nitei nyiihangnii kaswisii gong ndwi tangle, sateichii nyiinii Saraago kamalum tei Krista takum sekpii miwosii, nyiinii mishang kalumei hangninii tiitangle.

¹⁴ Teitii leponii nyiinii meinahnii poi ka-mpat chem katham kathampii meigo kama kikii tiikai tang karam jangpii ralikapyii dwi n-nok kapat sateichii tingkainii lulam lulamkii gwipungsii katat nahmei takumloi lakle.

¹⁵ Nlenii lungkasyii kito kasangtei tamsii, aphyii kasat tiisii kalei, Krista dato nyiinii, mahlyii hang kito lungkhii tang karamle.

¹⁶ Mpou kangto pum- potmah njai katham katham hang ai poi kadoubamle sateichii pumpot matum ai pyiisii kalei shang shang hangteipii jum kajabamle. Teipiinii pumpot mah njai katham katham nsang teinii tiigatpii tha katii tinglang kak pumpot matum madum ai lungkasyii paikito dikhiile sateichii tiimakhiile.

Krista dato karanu tiilung

¹⁷ Teijangpii Bangpii zei kito Inii gonyiigo kakhatsii tam leile; luikakimeinii kakadak lungswi hang kito lungkalei takumpii gonyii lungsii bamloi sulo.

¹⁸ ahnyii teinii ahnyiimah swi kati kiteito tii m-myii aitakle. Ahnyii lung katei jangpii, ahnyiimah lungswi tei myiigongsii ahnyii Saraamah rangii dato sapum- nah mitutakle.

¹⁹ Ahnyiinii ka-nrou kasangam hangtei ga aitakle; ahnyiinii kasaat tei gasii matei kasu tha hangtei tiitang karam jangpii kashyii kahong kiteikii ahnyii roinapii pyii aitakle.

²⁰ Kristamah kaang kito nyiinii rali kalu teinii tei teimakle!

²¹ Go- nyiinii mpoumah kaang kito madou- supii shiitakle, sateichii mpoutai kaswimei tiisii Jisu dato kalei kasang tei gonyiigo ralipyii takle.

²² Teipiinii gonyiinii lungsii lei kalei tei tiilungtei gonyiigo lung matusii kalei kama kikii tiikakai mpoumah kamarei ka-ntha hangteipii tiimaga kalei, gonyiimah mei kaham tei rat toi ailo.

²³ Sateichii gonyii swi gonyii lung hangtei tiisatai ailo,

²⁴ Sateichii Saraamah njoi kasang kamajyii nina- do kamatei kito tiikabam kasataimei jailui tei gonyiinii kai wolo.

²⁵ Teijangpiinii kasang kasu tei rat toi aisii, gonyiihangnii mpou mpoumah kitiinah napameigo ka- sang tei tamlo. Kadapokii nyiihang ai Kristamah pum kito kaswisii kaleimei hangle.

²⁶ Rarhiilo, nlenii kem tei tiisulo, gomah rakarhii tei leimik liit kasunakii ga ailo.

²⁷ Kai kabi tei seitan go pyiisulo.

²⁸ Ragasii kalei ahteinii ragaloi matu sulo, nlenii tei tungpii ah mah bahpiinii tha kabi tei tiisii, mah kagameigo sei kabui tiisii mpoumah mah bam tang karam jangpii tha tiimatulo.

²⁹ Gonyiinii gonyiimah mwi kito sam kashyii hangninii kado pat matu sulo, nlenii tiikamakhii ninado tinglang teinii kadapei mareipo katu tiiha tang karam kabi sam tei roinii tamlo, kadapokii nangnii katam teipii n-go shiisii kaleimeigo kabi tei tiimatu tang karam jangpii.

³⁰ Sa- teichii Saraamah rangii kamatei gotei swi tiimashyii sulo; kadapokii Saraanii gonyiigo matapii laat ka-mpat leimik tei gong tangle katu mah soisang soikalak, gonyii phyii- ryiito apum tiisii kalei Saraamah siiti tei rangiile.

³¹ Kiikha, hungsii rakarhii, raikapat, saa nrung katu, sateichii kalet kalou katii, meigo kangourou katu hang ai gonyii dato poitoi maleilo.

³² Sateichii gonyii hangninanii hangniniigo kalungsyii- sii, lung manoilo; Saraaniido Krista paikito gonyiigo magakapyii takumpii gonyii hangninanii hangniniigo kama kaleipyiilo.