IPISAMEI 2 - KARANU KABI SAMTAM

Katai kito karing

¹ Gonyii mah kama ninado kem hang jangpii gonyiinii tai kalei kito mpounii gonyiigo tiimaringpyii takle.

² Tei tinglangki gonyiinii sazyii pouryiimah kashyii tai tei swisii, aitoi tinglang ki Saraanii katam swikasu sating nei sazyii kak kamarong kito apum tiisii kalei rangiimah teimaham hang gotei gonyiinii kaswisii leile.

³ Ai kak kito nyiihang ai tinglang hangninii kinii apum ninado lungswinii kamareitai tei swisii nyii pumnii kamaning kamarei kito lungsii leile. Teijangpii meinah lui kakimei takumpiinii, nyii ai nunuto Saraanii rakarhii mah nahmeile.

⁴ Nlenii Saraamah lungset kati teinii hangkapii nile, sateichii nyii jangpiinii mpoumah lungkasyii teinii hangkapiinii dile;

⁵ nyiimah kakui kama kito nyiinii rangiilamto taika- lei tinglang kitodo, Kristago kaswisii mpounii nyiigo tiimaringpyiile. Gonyiigo keikapyii teinii Saraamah jumage kapyii kitole.

⁶ Nyiinii Krista Jisu kaswisii hangninii tiisii nja kalu kito mpougo kaswisii sating gam sazyii kito kaswisii apum tiimatu tang karam jangpii mpougo kaswisii nyiigo mpounii tiimaringpyii takle.

⁷ Mpounii ai ai tiile, kadapokii gongtang karam tinglang hang kito Krista Jisu dato nyiigo mpoumah ajhii sakpei kalak jumage kapyii kanitei mpounii mangou tang karam jangpiile.

^8-9 Kadapokii kamalum paikito Saraamah jumage kapyii teipii gonyiigo keipyii takle. Teiteinii gonyiinii mahungsii tha katiihang kito doukalu mah makle, nlenii Saraanii kapyii luhale, teijangpii tei kaang kito meikaniido detdi wolakle.

¹⁰ Kadapokii Saraanii reipii tiida kabam kabi tha hang kito nyiinii tat matutang karam jangpii, Krista Jisu dakii tii mpat kabam nyii ai mpoumah tha katiimei takle.

Krista dato hangniniile

¹¹ Teijangpiinii maning gonglo, katunii, tinglang hangniniiki pumzai lamto luikakimei tiisii, pumzai lamto bahpiinii katii tiigyii kamalem kanat tiikalei meihangsii lat kaleimei teinii tiigyii kamalem kanat tiikasumei sii lat kalei gonyiinii,

¹² tei tinglangki Krista dato dhiisii, Isrelmeimah sazyiinah doito sapumnah tiisii sa- teichii pyiitanglesii riishii tiikabam sat tang karam samtam hang kito gonyiinii luikakimei tiisii, maning kamalum kaga ninado sazyii pou- ryiito Saraa haikasumei tiisii leile.

¹³ Nlenii tinglang hangniniiki dhiisii kalei gonyiigo aitoinii Krista Jisu dato Kristamah zai teipiinii pang gong manangpyii takle.

¹⁴ Kadapokii Jehudimei ninado lui kakimei hang go hangninii tiipyiisii Krista pum- sekpiinii nyiigo kamajung kamakung tei pung gongpyiile. Ahnyiigo chyii kapaksii sateichii kangourou matusii kalei mbaang gotei mpou pum sekpiinii mpounii tiipak aitakle.

¹⁵ Sateichii mpougo njasii hangninii tiikalu kito kasatai meilui hangninii tiimatu tang karam jangpii, Jehudimei mah kakhatsam ninado ajaimah ajaitingshang gotei mpounii tiimagapyii takle. Aitiisii mpounii tiimajung pyiile.

¹⁶ Mpounii Krosh gamto taikapyii teipii ahnyii mah kangourou kalei hangtei tiimagapyii takle. Krosh teipiinii lui hangna gotei pum hangninii kikii jum njapyii takle; sateichii ahnyiigo Saraa dakii pang nlaigong pyii takle.

¹⁷ Tei- jangpii Kristanii gongsii kamajung mah kabi rasam tei meihang dakii lui kakimeida, Saraa dato dhiisii kalei- meida, sateichii mpou dato ma- nangsii kalei, Jehudimeida gongsii tam ralipyiile.

¹⁸ Jehudimei kado, luikakimei kado nyiihangnii rangii hangninii kito pfii doi gongliit kabui teinii Kristamah paikitole.

¹⁹ Teijangpii gonyii luikakimei hangtei luikakimei mak-kii, sapum- nah sutakle, nlenii aitoinii gonyii hang ai Saraamah meihang go njoisii kaswisii kalung sazyii nahmei takle, sateichii Saraamah kikalung mpungki kahaimei hang takle.

²⁰ Krista Jisunii ki kaa roukatii kuitu tiisii, tiilamlwi kapyiimei hangmah ninado sampao kapungmei mah bangmaa phyiiryiikii gonyii godo tiimakhiibam takle.

²¹ Kimah rangh hang go jum njasii Bangpii dakii pyiitoi kalei kamatei Saraa kamaningki hang- ninii tiisii mpat matu katu teinii mpoule.

²² Mpougo njasii hangninii tiikalu kito Saraanii mpoumah rangii paikito lungsii kalei bam hangninii ki teikii mei kakimei hang go kaswisii gonyii godo tiimakhiibam takle.