IPISAMEI 1 - KARANU KABI SAMTAM

¹ Saraamah kamaning kito Jisu kristamah tiilamlwi kapyiimei I-Pol dato– Iphisas kito kalei kamateimei ninado Krista Jisugo njasii ahnyiimah tiilung kito lungsii kalei malum kabuimei dakii:

² Nyii Pfii Saraa sateichii Bangpii Jisu Kristanii gonyiigo jumage kapyii ninado kamajung kamakung tei pyii matulo.

Rangii mah satoi krista dato

³ Nyii Bangpii Jisu Kristamah Saraa ninado pfii gotei tam matoileje! Kadapokii nyiinii Kristago nja kalu kito mpounii sating gam sazyii hang kito nyiigo rangiimah satoi pyiisii kalei teipii mpounii nyiigo satoi pyiibam takle.

⁴ Nyiinii matei matu tang karam jangpii sateichii mpou doito sajek tei gamatu tang karam jangpii, Kristago nyiinii nja kalu paikito mpou mei tiimatu tang karam jangpii, sazyii pouryii tii mpat kasunato, Saraanii nyiigo kalaibam takle. Mpoumah lungkasyii jangpii.

⁵ Jisu Krista paikito Saraanii nyiihang go mpou nahmei tiimatu tangle katu tei satto takle–ai ai mpoumah kamaning kamarei teile.

⁶ Saraago tam matoileje, mpoumah kangam jumage kapyii jangpii, kadapokii mpounah sapfii mpou zei kito mpounii nyiigo matapii luha kapyii jangpii!

⁷ Kadapokii Kristanii karatsii taikapyii teipii nyiihang go matapii laat mpatpyii takle, katunii, nyii kem kama hangtei magapyii takle. Saraamah jumage kapyii tei kadaziikapii dipo,

⁸ teiziikii moisii mpounii nyii dakii kapyii tei! Mpoumah swirek kabi sateichii mik kangou hang kito.

⁹ Saraanii tii- tanglesii kamaning tei mpounii sat kalu tiitang karam kamakum kamaning tei nyii dakii matipyiile.

¹⁰ Tinglang tei gongsekchii Saraanii tiimatui tiimashang tang karam, tiitang karam ainii, Krista go aphyiikii kaikabam tei kaswisii, sating ninado sazyii lungto kalei Saraa baichem hang go poigong ndwitang karam teile.

¹¹ Saraanii tiikanyii kamaning kamarei taiswisii mahlyii hang ai tiibam takle; sateichii saroi roisang kito mpounii kamaning gotei jubam- sii, mpoumah tiikanyii kamaning kamarei roinii jangpii, Kristago nyiinii njasii kalei kito, mpoumah mei tiimatu tang karam jangpii, Saraanii nyiigo kalai wotakle.

¹² Teitii leponii, Krista dato karei reisang tiisii maning malum tang karam mei, Saraa mah pumtei kavago tam matoileje!

¹³ Sateichii gonyiigo keikapyii karing poigong kapyii kasang kabi rasam tei gonyiinii shiikalu kito, gonyiiniido Saraamah mei tei tiiwo takle, sateichii Kristago gonyiinii malum wotakle; ninado mpounii go- nyiigo pyiitang lesii riishii tiikabam, pyiisii kalei rangii kamatei teipii Saraanii mpoumah apum katiimah siiti tei gonyii phyiiryiikii toukai pyiitakle.

¹⁴ Saraanii mpoumeigo pyiitanglesii riishii tiikabam, nyiinii doutang karam soikalak tei rangii teile. Sateichii mpoumah tiisii kalei hang go matwi mashangsii arangra katii pyiitangle katumah lung kalum tei Saraanii nyiigo pyiile. Mpoumah pumtei kava gotei tam matoileje!

Polnii kariita

¹⁵ Kaang aijangpii, Bangpii Jisugo gonyiinii kamalum ninado Saraago kamalum meihang go gonyiinii lungkasyii tei Inii shiikalu sekpiinii,

¹⁶ Gonyii jangpii Inii Saraago hakalang katam tei ntak makle. Gumah kariita hang kito Inii gonyiigo maningsii leile.

¹⁷ Sateichii gonyiigo tiisakai pyii tang karam ninado gonyiinii mpougo tikabui jangpii, gonyii dakii Saraago mati mangoupyii tang karam, rangii tei gonyii dakii pyii matulosii, kangam Pfii, nyii Bangpii Jisu Krista dato Inii khangsii leile.

¹⁸ Mpoumah kava tei ngoukabui tiisii gonyiimah lungswi hangtei laatpyii matusii, mpounii gonyiigo lat kalu tei kadapei maning kamalum jangpiipo katu sateichii mpoumah meigo pyii tanglesii riishii tiikabam kamadat satoi hangtei kadaziikapii dipo katu tikabui jangpii,

¹⁹ sateichii malumsii kalei nyii dato mpoumah teimaham tei daziikapii disii tha tiisii leipo katu timatu tang karam jangpii Inii khang leile.

²⁰ Nyii dato tha tiisii kalei teimaham ai mpounii Kristago katai kito tiimaring pyiisanii sating gam sazyii kito mpou bah ajiilamkii mpougo mbam kalumah kadi teimaham gotei masamramle.

²¹ Teikito Kristanii Sating gam apum katiimei hang, teimaham kajum meihang, pumtei hang ninado Abangmei hang phyiiryiito apum tiisii leile; sazyii pouryii aito roisupii gongtang karam sazyii pouryiimah zeihang doito sagoi kaki zei tei mpou dato leile.

²² Saraanii Krista pi kangkii mahlyii hangtei kaipyiile ninado mahlyii hang doito dikaki Bangpii tiisii Charsh hang jangpii mpougo pyiile.

²³ Charsh hang ai Kristamah pumrong teile, bamlyii hang kito mpou roinapii mahlyii hang tiimashangsii kalei teile.