HEBRUMEI 8 - KARANU KABI SAMTAM

Jisu nyiimah kanat kajum tingdipii

¹ Nyiinii tam kalei sam aikito kaang hangteinii aile: sating gam pumtei kava kadi mah sagongbam mah ajiilapangto kabam,

² kamatei bam kito ninado meinahnii supii Bangpiinii tiimakhii kabam kasang dwipei kito nga ngakalei, ai kakum kanat kajum tingdipii tei nyiinii doutakle.

³ Kadapokii kanat kajum tingdi- mei hang gotei kapyii ninado kouring karat matu tang karam jangpii bam kaipyii bamle; teijangpii kanat kajum tingdipii ainiido mah pyiitoi tang karam tei bam tang karamle.

⁴ Ajaitingshang taiswisii kapyii hangtei pyiikatoi kanat kajum atingmei hang kalei taiswisii, mpou ai sazyii pouryiito lei leponii, mpounii kanat kajum atingmei hangninii tiisang tiilakle.

⁵ Ahnyiinii kanat kajum atingmei takumpii, katii atha teinii sating gamto kalei mah nda ninado akhii teile. Kada- pokii Mosesnii dwipeiki tiimakhii- tuna tei Saraanii mpougo ralipyiisii tamle, “Zang gamto n-go mangou katu ajai agok taiswisii nangnii mahlyii hangtei tiilo.”

⁶ Nlenii ai- toinii Jisunii Saraa ninado mpoumah meihang kak kiteikii sat tang karam samtam hangninii tiida kapyii tei bibwi katu takumpii, ahnyiimah sung kisii bikaki kanat kajum atingmei tha tei mpou dakii pyiibam takle. Kadapokii ai ai kisii kabi riishii hang phyiiryiito tiibamle.

⁷ Kadapokii sat tang karam samtam karei teinii kama galeponii, hangna kashang jangpiinii tinglang tei gatangle.

⁸ Nlenii Saraanii mpoumah meihang dateito kama tei doukatu tinglang kak mpounii tamle, “Tinglang tei gongtangle, Bangpiinii tamle, gumei Isrelmei ninado Judah kito kaleimeigo sat tang karam karanu samtam tiimakhii tang karam tinglang tei,

⁹ ai ainii Inii ahnyiigo bahto jumsii Izip sazyii kito pangpat kapyii piinei leimik ahnyii peipaomei hangdakii Inii tiikapyii sat tang karam samtam takum lakle. Inii ahnyiigo kaswisii tiikabam sat tang karam samtam tei ahnyiinii majai makle, teipiinii Inii ahnyiigo shiipyii makle.

¹⁰ Aitoinii gongtang karam tinglang leimik kanaki Inii Isrelmeigo kaswisii poi makhii tang karam sat tang karam samtam teinii aile, sii Bangpiinii tamle, Inii gumah ajaitingshang hangtei ahnyiimah lung kikii kaipyii tangle, sateichii Inii ahnyiimah malung kikii Inii teihang tei ryiikai pyii tangle; sateichii Inii ahnyiimah Saraa tei tiitangle, sateichii ahnyiinii gumah mei teitiitangle.

¹¹ Sateichii Bangpiigo tilo, sii ahnyii hangnii mpougo njoisii lungkalei meigo mak-kii, mpou sanapiigo tam ralilakle, kadapokii kacheng sekto kadi katang meihangnii n-gu titangle.

¹² Kadapokii Inii ahnyiimah kakui kama kiteito kaleipyii tangle, sateichii ahnyiimah kem hangtei Inii maningpyii loilakle.”

¹³ Sat tang karam karanu samtam mah tam kalei aipii karei hangninii gotei Saraanii teimaham pyii aitakle; sateichii mah kata hangninii hamkalei ninado kaham katu tei kalangsii gatu tangle.