HEBRUMEI 6 - KARANU KABI SAMTAM

¹ Kaang aijangpii Krista mah karei roukatiimah samtam tei toi aisii, nyiinii mishang kaleilam teikii tatjou tude, katai tha kito lung kakali mah sateichii Saraa dakii kamalum mah,

² dwi ka-mpum hangmah kaang kito rali kapyiimah, bah poikamakhii mah, kataimei ringkakhii mah sateichii kalui kaga samtak katii mah bangmaa tei nlailoisii tiimakhii sude.

³ Sateichii Saraanii mazhiipyii leponii, ai ai nyiinii tiitangle.

⁴ Kadapokii binii swi tii-mvapyii kalei, sating gam mah luha masei kalei, sateichii rangii kamatei mah njai dou njoi kalumei,

⁵ Saraamah samtak mah sateichii gong tang karam aha kanamah teimaham hang mah, chiikabi chiikashyii masei kalei ahnyii teinii koukalei kito,

⁶ ahnyiigo nlailoisii lung kali matu katu katang kiteikii kailoi katu tei tiipeiwo lakle; dapokii ahnyiinii Saraa nah sapfii mpou gotei ahnyii jangpii Krosh gamki gisii, mpougo madurahapii tii nrou aitakle.

⁷ Kadapokii sagoi gamto nlai nlai loisii satingryii kamang tei sak kalu, sateichii lu tha takalei ahnyii jangpii sagei ralui pokpat kapyii sazyii teinii Saraa dato satoi doule.

⁸ Nlenii tu kapung sateichii rhiima pokpat lepo- nii, sazyii tei kadakle, sateichii ka- sheeng doutang karam natakle, teimah kalui teinii mipii rukatoi teile.

⁹ Nlenii nyiinii teitiisii tam kado, lungkasyiimei, gonyii jangpiinanii gonyiimah keikapyii karing go reng karhiisii kalei kisii kabi satoi tei gonyiinii bamle katu nyiinii tiigatpii tile.

¹⁰ Kadapokii Saraanii majyii kasu gale, gonyiinii kamateimeigo tiikaha ninado aitoido tiihasii kalei gonyiinii tiikabam tha ninado mpou jangpii mangou kabam lungkasyii tei mpounii mangai lakle.

¹¹ Sateichii gonyiinii mahat supii, kamalum ninado lung leh kati paikito riishii tiikabam tei doukalu ahnyiimah jai karalimei tiitang karam jangpii,

¹² gonyii hangnii kalui katang maning malum katu tiigatpii lung leh kati katang tei lungliit katu tei katang gonyiinii tiikamangou nyiinii mareile.

Saraa mah riishii

¹³ Kadapokii Saraanii Abraham dakii riishii katii tinglang kak, riishii katiiki liit tang karam jangpii kisii dikaki mei zei kado kaga jangpiinii, mpou zei latsii riishii tiitakle,

¹⁴ madou supii Inii n-go satoido pyii tangle, sateichii moido moibui matu tangle.

¹⁵ Sateichii aitiisii mpounii lung lehti sii leh kalu kito riishii tiikapyii tei doutakle.

¹⁶ Kadapokii meinahnii ahnyii sung kisii kadimah zei tei latsii riishii tiileile, sateichii kasou kalei hang kito tiitak tang karam jangpii riishii rasat ainii kaluile.

¹⁷ Mpounii riishii tiikabam gotei doutang karam ahnyii dateikii, mpounii tiimatu kanyii tei mpounii tiisang tiikali lakle katu tei Saraanii matei sagaisii timatunyiile, tei- jangpii mpounii hangna kak kiteikii riishii teipii satpyiile.

¹⁸ Teipiinii ai tha hangna katunii, kalipei wokalak ninado Saraanii chuipeiwo kalak kaang ai leile. Teijangpiinii mpougo kaswisii nsungbam doukalumei nyiihang go nyiidoito kalei maning kamalum kiteito makhiipyii takle.

¹⁹ Nyiinii maning kamalum ai malyii ka-ntakbam takumpii nyiimah karing jangpii bamle. Ainii sadoi kashyii kito keikalu ninado soikalak sateichii Saraa kamaning kilungkii lam kabam peira tailam katang tatliit wokabui teile.

²⁰ Nyiihang tung tiisii Jisunii nyiidoi reisii teiki tei tat tutakle, sateichii Melkizedek taito adoidoi tiisii lung kadoihum kalei taiswisii kalui kaga kanat kajum Tingditupii hangninii tiiwo takle.