HEBRUMEI 12 - KARANU KABI SAMTAM

Nyii pfii Saraa

¹ Teijangpii nyiigo sakchyiimah mongjyii kadi hangninii teinii nyiigo bang magui kabam taiswisii, nyiinii kamaswi ninado nyiigo jum kalei kem hangtei nyiinii matou aide.

² Sateichii nyiimah kamalum mah abang ninado tiimatui kapyiipii Jisugo jusii, nyiidoi kalei pak maga tang karam tei lung leh kati tei kaswisii pakde. Ah doito kalei ka-nta jangpii ahnii kasangbam gotei samah kado maning supii Krosh tei leh wosii, Saraamah sagongbam bah ajiilam teito bam wotakle.

³ Kadapokii gonyiinii gonyiimah lungswi kamagesii koumang kasu tiisii, ah phyiiryiiki kem katiimei hangnii aiziikapii ngoukarou leh kalu mpou gotei maninglo.

⁴ Kada- pokii gonyiinii kemgo saryii tiisii kalei kiteito joumang kalei gonyii mah zai katangpii gonyiinii nam womakle rei.

⁵ Sateichii Saraanii gonyiigo mpou nahmei takumpii lung tiikamadi sam katam tei gonyiinii mangai aitakpo? “Gunah, Bangpiinii n-go tiimajyii katu tei malasii poisulo, sateichii mpounii n-go kadwi karat tinglang kak nang lung taisulo.

⁶ Kadapokii Bangpiinii lungkasyii meigo mpounii tiimajyiipyiile, sateichii mpounii nah sapfiimei hangninii tiisii lukakai hang go mpounii kadwi karat hangtei pyiile.”

⁷ Gonyiinii leh katu tei tiimajyii katu jangpiiniile; Saraanii nah sapfiimei hang dakii tiikalei takumpii gonyii dakii tiisii leile, kadapokii Pfiinii tiimajyii kasu nah sapfiimei ta leipo?

⁸ Mpou nah sapfiimei hang go katii takumpii, n-go kadwi karat tei tiisu- leponii, nangnii mpounah kasang makle, nlenii siihanah takle.

⁹ Aidoito kisii nyiigo tiimajyii kapyii meinah mah Apfiimeido leile, sateichii nyiinii ahnyiigo sadzyii ngariit tiile. Nyiinii rangii hangmah pfii kangto kisii nkangsii lunglakpo?

¹⁰ Kadapokii ahnyiinii bilesii katam taiswisii tinglang shangniikii jangpiinii nyiigo tiimajyiipyiile, nlenii mpoumah kamatei njai tei dou njoi matu tang karam jangpii, nyiimah bitang karam jangpii mpounii nyiigo tiimajyii pyiisii leile.

¹¹ Tiikamajyii hang ai manoisek jangpiinii nta tang karam tei ngoumakle, nlenii kama- gele; nlenii aitai kana kinii teipiinii tiiralipyii kabam doukalumei hang dateito kasang kamajyii mah kamajung riiti tei mati leile.

Katam karali ninado tiiloi sulosii kakhat katu

¹² Teijangpiinii set kalei gobah ninado gonyii kakok kasui hangtei tiisangting wolo,

¹³ sateichii pi katwi tei ashaangrou kiteito poitoi aisu- piinii tii mbiwo kabui tiisii gonyiinii gonyii pi jangpii pwidi tiimajyiilo.

¹⁴ Meihang go majungsii lung tang karam ninado kamatei tiilung lung tang karam tei tiilo, dapodinchii kamatei ai haisupii mei kaniido Bangpiigo ngoulakle.

¹⁵ Saraa mah jumage kati kiteito tai nlaitu kasu tiisii machyiigat wolo. Mei kado “kakaabang” hangninii tiisii pokpat ahmah hiikara teipiinii kaki hang- kiigo tiimashyii katu takum matu sulo.

¹⁶ Sateichii mei kaniido sapwi- mei sapfiimei kashyii kahong tha katii, mak-kii mpou nah katingpiinii doukamajyii tei malot hangniniipii joitoi kalei, Isau takumpii matei kasu mei tei gamatu tang karam jangpii tiigatpii juwolo.

¹⁷ Kadapokii gonyii- nii tile, katunii, tai kanaki Isaunii satoi tei dounyii katu kak mpougo mazhiisu takle, kadapokii mpounii mikdwi patsii fiikido mpounii lung kali tang karam tinglang kabi tei dousu takle.

¹⁸ Kadapokii gonyiinii deng kabui, songkalei miki, katik ki, kamyii ki, tingkai tingrot ki,

¹⁹ kachem mah rok ki, ninado samtam mah rok ki gonyii- nii manang gongmakle, roktei shii kalumei hangnii nlai loisii samkang hangninii kado tam matulak tang karam jangpii khangtakle.

²⁰ “Kada- pokii saram kounah katangdo zang tei dengleponii, kuitupii rotrang tang karamle” sii mwija kapyii tei ahnyiinii lehpei wolak takle;

²¹ sateichii ngou katu tei aitiiziikapii hingle katunii, Mosesnii tamle, “Inii hangkapii hingsii nchyiitakle.”

²² Nlenii Zaiyon zang ninado karing Saraa mah namdi, sating gam mah Jerosalem ki, fiipei kalak sating gamlui hangda,

²³ sating gamkii zei ryiikai kabam lung karei nah sapfiimei hang go ndwini sateichii samtak tiitang karampii Saraada, sateichii mei kabimeigo sajek kaga tiikapyii rangii hangda,

²⁴ sat tang karam karanu samtam tiida kapyii Jisuda, ninado Abel mah zai sung kisii kabi pyiitangle sii tamsii kalei kajui kakai zai datei gonyiinii manang gong wotakle.

²⁵ Tamkalei ah gotei gonyiinii mazhii kasu tiisii sakai wolo. Kadapokii sazyii pouryiito ahnyiigo tiilosii tam kakhat katu ah gotei ahnyiinii mazhii kasu kito ring sutakleponii, sating gamto tiilosii tam kakhatpyiisii kalei ah dateito nyiinii nlek wosekchii, nlailoisii kadaziikapii kisii ringlak takpo!

²⁶ Tei tinglang kak, mpoumah rok teipiinii sazyii pouryii tii nlai takle, “Nlenii aitoinii Inii nlailoisii sazyii pouryiigo roinii tii nlai supii sating godo tii-nlai tangle” sii mpounii rii- shii tii aitakle.

²⁷ Sateichii “nlailoisii binii” sii tam kalei ainii tii nlai kasumah hang gotei taimatu tang karam jangpii, tiikabam mah hang gotei tii-nlai tangle ninado poitoi aitangle katu tei madupii mangoule.

²⁸ Teijangpii tii nlaipei kalak sagong sazyii hangninii doukalu jangpii hakalang tamsii, nyiinii sadzyii ngariit katii ninado kahing tei njasii Saraa dakii lukai kamajyii kamata tei pyiitoide;

²⁹ Kadapokii nyiimah Saraa ainii rukatoi mi hangninii kasangle.