GALATIMEI 3 - KARANU KABI SAMTAM

Ajaitingshang mak-kii kamalum

¹ Oh kapang Galatimei gonyii doi- sekto Jisu Kristago krosh gamkii dhangsii gikalei tei mateitengsii mangoupyii takle; Gonyiigo tanii riikuhii pyiibam takpo?

² Gonyii dato Inii airoinii tinhyiile, katunii ajaitingshang tei gonyiinii ryiikalu swikalu jangpii rangii tei doumanii mak-kii, gonyiinii shiiwosii malum kalu kito rangii tei gonyiinii doupo?

³ Gonyii teiziikapii pang takpo? Rangiipanii tiimakhiibam sanii, pum zai teipii aitoinii gonyii tiimashang leitakpo?

⁴ Mahkado kasu jangpiinii gonyii hangkapii kamage kalak pungbam takpo, ai ai mahkado kasu jangpiisang leponii?

⁵ Saraanii gonyii- go rangii kapyii sateichii gonyii kak kito sung kaga tha hang tiikapyii tei gonyiinii ajaitingshang go ryii- kalu jangpii manii, mak-kii gonyiinii kabi rasam tei shiiwosii malum kalu jangpiipo?

⁶ Teitakumpii Abrahamdo, “Saraago kamalum jangpiinii mpougo kasang kamajyiimeisii lukei wole.”

⁷ Tei- tiileponii, Abraham mah kasang ataa anah meihang teinii kamalum mei hangteile katu tei gonyiinii tiwolo.

⁸ Sateichii Saraanii luikakimei hang go kamalum teipiinii tiimajyii tii- matuipyii tangle katu tei reipii ngou wosii; Abraham dakii kabi rasam tei aitiisii tam ralipyiisii tamle, “Godato luihang go satoi pyii tangle.”

⁹ Teipiinii kamalum meihang go satoi pyiitakle, kamalum kalei Abrahamgo kaswisii.

¹⁰ Ajaitingshang mah tha hang go bhangsii ringkalei meihangtei Saraa- mah kaseeng kangto leile. Kadaponii aitiisii tamle, “Ajaitingshang bung kikii ryiikabam mahlyiihang tei tinglang kaleita swikasu mei teinii Saraa mah kasheeng kangto leile!”

¹¹ Aitoinii mei hangninii kagodo Saraa doito ajaitingshang teipii tiimajyiipyii womakle katu tei ngoutakle, “Kada- pokii kamalum paikito kasang kama- jyiimei teinii ringtangle.”

¹² Nlenii kamalum gotei ajaitingshangnii tiitang karam samah kado gale. Teisungnii, kabi rasam kito katam takumpii, ajaitingshang go ryiima- shang kalumei teinii ringtangle.

¹³ Nyiijangpii Kristanii kasang tei tiisii, ajaitingshang mah kasheeng kiteito kalei mpatpyii takle kada- pokii aitiisii ryiibamle, katunii, “Ating gamto njusii siikaksii taikalei meihang tei Saraamah kasheeng tei doutakle.”

¹⁴ Teipiinii Krista Jisu paito Abraham dakii Saraanii satoi pyiitanglesii riishii tiikabam tei Jehudimei kasu luikakimei hang dakii gong matu tang karam jangpii, sateichii nyiinii kamalum paito ra- ngiimah rashii tiikabam tei doutang karam jangpiile.

Ajaitingshang ninado rashii tiikabam

¹⁵ Gu kangsanamei, tingnei ma- tuita tatsii kalei meinah mah jairali kito nda hangninii tiisii Inii tam leile, katunii, mah hangninii jangpii mei hangnanii mazhiihiitsii ahnei hangna kakto kamazhii mah bah soi tei pyii aisekchii, mei hangninii kaniido teitei tiipak wolakle, mak-kii teikikii mah kado kai mpam wolakle.

¹⁶ Riishii tei Abraham dakii ninado mpounah mpou taamei dakii tiibamle, Mpounii meimoigo katam takumpii, “Gotaa gonahmei hang dakii” sii tam makle. Nlenii mei hangninii kaang kito tam kalei takumpiinii, Gotaa gonah dakiisii tamle, taa nahtei Krista teile.

¹⁷ Inii tam kalei teinii aile, Saraanii reipii mazhiisii riishii tiikabam gotei, tingkum Haimadai tamrhii tainii kagong ajaitingshang teinii ti mati matulak tang karam jangpii piit toipei wolakle.

¹⁸ Kadapokii Saraamah luha doutang karam tei ajaiting- shang kito leileponii teitei riishii tiikabam kito suloi takle. Nlenii Saraanii Abrahamgo riishii tiikabam jangpiinii jumagepyii takle.

Ajaitingshang mah kaang

¹⁹ Teitiileponii, ajaitingshang ai kadapei kaang jangpii pyiibampo? Riishii tiikabam Abraham mah taa nahmei teinii gong kasuta leimatu tang karam jangpii, sateichii kakui kama katii katu ai kadapeipo katu mangou tang karam jangpii teitei kai mpam bamle. Ajaitingshang ai akakto katat meinah jaikatii, sating gamluinii punghum kabaila pyiile.

²⁰ Aitoinii akakto katat hangninii teinii matikapyii tei hangninii sung kile, nlenii Saraanii hangniniile.

²¹ Teitiileponii ajaitingshang ai Saraamah riishii tiikabam hang gotei mazhii sutakpo? Teisang tei makle! Kadapokii karing pung gong kabui mah ajaitingshang ai mei- nahnii doutakponii teigotei majaisii meihang ai Saraa doito matwi majyiiwo buitakle.

²² Nlenii kabi rasam kito katamnii, sazyii pouryii mpum madum ai kem mah teimaham kangto leile, Teijangpii Jisu Kristago kamalum meihang go pyiitang lesii riishii tiikabam luha teinii malum katu meihang go pyiile.

²³ Nlenii tinglang tei kamalum jangpii gong kasunii, gong kalei kamalum tei mati mangou kasuta teinii kabang kito kaleimei takumpii ajaitingshangnii nyiigo bangnei aitakle.

²⁴ Teipiinii kamalum paikito nyiigo tiimajyii pyiimatu tang karam jangpii Kristanii gong kasuta katang tei, ajaitingshang teinii nyiigo kaswisii majang tatpyiile.

²⁵ Nlenii kamalum jangpiinii aitoinii aiki gongsek-kii, ajaitingshang teinii nyiigo tung tiisii majangtat loilak takle.

²⁶ Kadapokii gonyiihangnii kama- lum paito Krista Jisugo gonyiinii njasii hangninii tiikalu kito Saraamah Nah meihang takle.

²⁷ Kadaponii Krista dato dwi mpum kalumei ahnyiihangnii pei kaba kumpii Kristago bawotakle.

²⁸ Jehudimeido, Jehudimei kasu luikakimeido thamki makle, apum meido, kikaleimei do taamki makle, sapfiimeido, sapwi- meido tam kimakle, kadaponii gonyiinii Krista Jisugo kaswisii hangninii tiikalu kito gonyii hang ai hangniniile.

²⁹ Sateichii gonyii ai Kristamah leponii gonyiinii Abraham taa, nahmei, riishii tiikabam taiswisii mahtou toutang karam mei teile.