GALATIMEI 2 - KARANU KABI SAMTAM

Pol ninado tiilamlwi kapyiimei kakimei

¹ Tingkum keariisii madai nkhiitai Inii Taitasgo pang wosii, Barna- basgo kaswisii Inii Jerosalemki tat pile.

² I-tatsu shyiilesii Saraanii gudakii mati mangou kapyii jangpii Inii tatpile. Inii Jehudimei kasu luikakimei hang dakii tam ralipyiisii kalei Kabi rasam mah samtam tei doimajangtat pyiisii kaleimei dakii adoidoi tiisii tampyii takle. Tinglang kareiki mak-kii tingneishang gutha katii kito tiidoulak tang karam katu ai Inii mareimakle.

³ Sateichii n-gu kaswisii kalei Taitas, mpou ai Grikmei tiisii leikado, mpougo tiigyii malemlosii dwisii pumtei tiiki makle.

⁴ Mei kangkanii teitii matunyiisii leikado, nyiinii Jisu Kristago nja wosii hangninii tiiwo kalu kito nyiinii doukalu arangra katiimah kaang kito fii-mpat tang karam jangpii, aimei hang ainii mwi kashyiimei tiisii nyii bouki kak gongliit takle. Ahnyiinii nyiigo kabangmei tii- matunyiisii leile,

⁵ nlenii kabi rasam mah kasang tei tiimashyii katu gasii gonyii jangpii kaibam tang karam jangpii, ahnyii dakii minit hangninii jangpii katangdo akang-nkang tang karam tei nyiinii pyiimakle.

⁶ Nlenii doimajang kapyiimei takumpii ngousii kalei (Inii ai ai tam leile, daponii ahnyii ai kadapeipo katu thaam kaki gudato mah kado ngou makle; Saraanii meiju jusii samtak tiilei makle.) Inii tam leile, tei kakum doi majang kapyiimei hang teinii n-gu mah kado kai mpampyii makle.

⁷ Nlenii malatpii tiigyii malem kaleimei hang jang- piinii kabi rasam tei Pitar dakii pyii- kabam takumpiinii, tiigyii malem kasumei hang jangpii gudakii kabi rasam ai pyiibam takle katu tei ahnyiinii ngou wosek-kii,

⁸ kadaponii tiigyii malem kaleimeimah tiilamlwi kapyiimei tha kito Pitar jangpiinii tiikapyii ah teinii Jehudimei kasu luikakimei hang dakii n-gudo tiipyii takle;

⁹ guda pyii kabam jumage kati tei ki kachenglesii zei katat Jakob, Kaifas, ninado Jon nii ngou wosek- kii, nyiinii Jehudimei kasu luika- kimei dakii sateichii ahnyiinii tiigyii malem kaleimei dakii tat tang karam jangpii, gudakiido Barnabas dakiido, ahnyiinii ndwi hangninii tiikalumah bah ajiilamtei pyiitakle.

¹⁰ Ahnyiimah bemei kak kito mah kagamei jang- piinii maningseilo katu tei roinii ahnyiinii kakhang teile. Iniido tiinyiisii kalei tei teitei sekle.

Antiyok kito Pitarnii tiikama

¹¹ Nlenii Pitarnii Antiyok ki kagong tinglang kak, Inii mpougo mei machii doito mazhiisu takle, da- ponii mpou ai tiimabam takle.

¹² Kadapokii Jemsnii lang matu kabam kangkii teinii teiki gong kasu tinglang ki kak teinii, Pitarnii Jehudimei kasu luikakimei hang go kaswisii mah chii njoisii bamle. Nlenii mei aimei ainii gongkalu tinglang taitonii, mpounii tailam nkat nlaisii ahnyiigo kaswisii mah chii njoisu takle, dapokii tiigyii malem kaleimei bee gotei mpounii hingtakle.

¹³ Satei- chii mpougo kaswisii kalei Jehudimei kakimei hangteiniido lungmatei kasu jaitei Pitargo kaswisii tiituham takle, teipiinii Barnabasgo katangdo ahnyiimah lungmatei kasu jai teipii pungsii tat tutakle.

¹⁴ Nlenii ahnyiinii kabi rasam mah kasang teitei swisii majyiisii tat makle katu tei Inii ngou wosek-kii, ahnyii hang doito Inii Pitar dakii tamle, “Nangnii Jehudimei hangninii tiisii leikado, Jehudimei mah ajaitingshang takumpii tat supiinii, Jehudimei kasu luikakimei takumpii tat leponii, nangnii lui kakimei hang go Jehudimei takumpii lung matu tang karam kada takumpiinii atei tiitangpo?”

Ajaitingshang teinii keikapyii karing pyiipei kalak

¹⁵ Kasangle, nyiinii Jehudimei hangninii tiisii manaale ninado kem katii luikakimei makle;

¹⁶ teitii kido, meinah aigo ajaitingshang mah tha hang ryiikalu jangpiinii tiimajyii pyii makle, nlenii Jisu Kristago kamalum paikito tiimajyii pyiile katu tei tisii, nyiigo ajaitingshang mah tha hangtei ryiikalu jangpii supiinii, Kristago kamalum jangpii, tiimajyiipyii matu- tang karam jangpii nyii sek piiniido Krista Jisugo malum wotakle; dapokii ajaitingshang mah tha hang ryiikalu jangpii meigo kado tiimajyii kapyii gale.

¹⁷ Nlenii nyiinii Kris- tamah paikito tiimajyii tang karam fiikalei kito, nyii sekpiiniido, kem katiimei hangle katu tei douleponii, teitiileponii Krista ai kem mah nga kanga tha tiisii kalei teipo? Teisang teimakle!

¹⁸ Nlenii Inii ramakou kalei ajaitingshang gotei Inii tiimakhii- houtu loileponii, ajaitingsang tiipaksii kaleimei hangninii takumpii Inii guroinapii n-gu mangou ai takle.

¹⁹ Kadaponii ajaitingshang dakii Inii ajaitingshang paikito taitakle, Inii Saraa jangpii ring kabui jangpii.

²⁰ Teipiinii ringkalei ai I-makle, nlenii gulungto ringkalei ai Kristale. Inii aitoi ringsii kalei tiilung ai, n-gu lungsyiipyiisii gujangpii mpoumah karing kapyii, Saraa nah sapfii mpougo kamalum kito Inii ring leile.

²¹ Inii Saraamah jumage kapyii tei kadak matu makle. Kadaponii ajai- tingshang teipii meinahgo tiimajyii tiimatuipyiile leponii, Kristanii kaang gasii taitakle.