TIILAMLWI KAPYIIMEI THA JUKAMATI 9 - KARANU KABI SAMTAM

Solnii lung kali kalu

¹ Nlenii aitoitodo Bangpiitai kaswimei hang go tiikahui tangle ninado gitangle katupii Solnii ngoukahing chyiingai ngaisii kanat kanhii kajum Tingditupiida tat tutakle,

² Bangpii mah pwidi swikalei sapfiimei godo sapwimei godo kata kangkago douwoleponii, ahnyiigo jum wosii Jerosalem kikii poigong katu mazhiitang karam jangpii Damaskas ki Jehudimei mah ndwi kito kalei mei dakii pyiitang karam mwija tei khangtakle.

³ Sateichii mpounii aitiisii tat leibangpii Damaskas sazyii tei nagonglei takle sek-kii, aitiisii pat takle, katunii binasek-kii sating gamto kava hangninanii mpouku hangki vapyii takle,

⁴ teito mpounii sazyii koumang takle; sateichii “Sol, Sol nangnii n-gu kadajangpii tiika- mage leipo?” Sii mpou dakii katam rok hangninii mpounii shiitakle.

⁵ Teito mpounii tamle, “Bangpii, nang tapo?” Saraanii tamle, “Inii nangnii tiikamagesii kalei Jisu teile.

⁶ Nlenii tusat tosii namdi kitei liitlo, sateichii nangnii kada dapei tiitangpo katu Inii godakii tampyii tangle.”

⁷ Sateichii mpougo kaswisii pwidi tat kalei sapfiimei hangteinii roknii shiisanii meigo kado ngousu sek-kii sam tampei wolaksii sat takle.

⁸ Sateichii Solnii sazyiito gungtu satto takle, nlenii mpou mik rak sek-kii samah kado ngousu takle teito ahnyiinii mpougo bahto jum wosii Damaskas ki namdi lung teikii chyiiliit pyiitakle.

⁹ Sateichii mpou leimik hangtum kashang katang tei samah kado ngoumakle, sateichii chiido sakdo supii bamle.

Solnii Damaskas ki Kabam

¹⁰ Sateichii Damaskas ki Kris- tenmei, zei “Ananiyas” sii kalat mei hangninii leile sateichii Bangpiinii mpou dakii mangoupyiisanii tamle, “Ananiyas!” teito mpounii tamle, “I aiki leile, Bangpii!”

¹¹ Teito Abangpiinii mpou dakii tamle, “Tusat tosii kamajyii pwidi sii kalat pwidi kadi kitei maasanii, Judas kikii Tarsas mpfii Sol sii kalat sapfii mpou gotei fiitulo, kadaponii julo, mpounii riitasii bamle.

¹² Sa- teichii Ananiyas katupii sapfii mpou ainii tatliit sii mpounii mik ngou wokabui jangpii mpou phyiiryiikii bah poikai pyiisii riita kalei tei ngoutakle.”

¹³ Nlenii Ananiyasnii khekalatle, “Bangpii, sapfii mpou aipou mah kaang kito, mpounii Jerosalem kito gomah kamalum mei dakii kadaziika kashyii tiikalei tei Inii meihang dato shiitakle;

¹⁴ sateichii aikito gozeigo kalatmei hang go jumtang karam jangpii kanat kanhii kajum Atingmei dato teimaham tei mpounii doutakle.”

¹⁵ Nlenii Bangpiinii mpou dakii tamle, “Tat tulo, kadaponii lui ka- kimei hang, sagongmei hang ninado Isrelmeinah doito guzei pung tang karam jangpii sapfii mpou ai gujangpii kalai mpat kabam baituile.

¹⁶ Kadapokii mpounii guzei jangpii kadaziika kamage kalak leh tangle katu tei Inii mpou dakii matipyii tangle.”

¹⁷ Teito Ananiyasnii maasii ki teiki tei liit takle sateichii mpoubah tei ah phyiiryiikii poikai pyiisii tamle, “Gukangsanapii Sol, Nangnii ngou kabui ninado n-go rangii kama- teipiinii tokryii matutang karam jangpii, katunii nangnii tat kagong pwidi kiteito godakii mangou kapyii Jisu teinii, n-go lang magongpyii takle.”

¹⁸ Sateichii teisek teikii mpou mik kiteito akaa-bet takum katu chengnakii tak khii takle teito mpounii mik ngou kalu tei doutakle.

¹⁹ Sateichii mpounii gungtu sat tosii dwi mpum wotakle, ninado mah chiiwo sek-kii mpoumah teimaham tei douloi wotakle. Sateichii mpounii Damaskas kito kalei boumeigo kaswisii leimik shangniikii bamle.

²⁰ Sateichii mpounii Jehudimei mah ndwini hangki tei liitsii, “Jisu ai Saraanah sapfii mpoule” sii tam ralipyiitu takle.

²¹ Sateichii shiikalu meihangnii madatsii tamle, “Jerosalem kito zei aigo kamata mei hang go tiimaga tang karam jangpii katii tei mei aipou makde? Sateichii mpounii aikito ahnyiigo jum wosii kanat kanhii kajum tingdimei doikii pang gong tang karam jangpii gongle.”

²² Nlenii Solnii tam rali kapyii tei kisii kisii teisii, Jisu ai Kristale katu maning kariirhii tei gasii tam rali kapyii kito, Damaskas kito kalei Jehudimei hang go sung tiimaga aitakle.

²³ Teitai tinglang kathangkii sou- kaleitai, Jehudimei hangnii mpougo gitoi tang karam jangpii sam rashii wotakle.

²⁴ Nlenii ahnyii mah kamakum rashii tei Solnii tiwo takle; ahnyiinii mpougo gitang karam jangpii tinghum tingna namdi mah takam kamjao kuto mbeisii bamle.

²⁵ Nlenii mpou boumeinii mpougo tinghumkii razyii hangninii lung kikii kaiwosii mbaang phyiiryiito toi m-mangpyii aitakle.

Solnii Jerosalem ninado Tarsas ki katat

²⁶ Sateichii mpounii Jerosalem ki liitto sekkii, mpounii Tiilamlwi ka- pyiimei go kadou tang karam jangpii tiitakle sateichii mpounii boumei hangninii tiitu takle katu tei malum supiinii, ahnyii hangnii mpougo hingtakle.

²⁷ Nlenii Barnabasnii mpougo pangsii Tiilamlwi kapyii- meida pang gongpyiisanii, mpounii pwidi lamto Bangpii go kada takumpiinii ngou wopo, Bangpiinii mpougo sam karashii kalu sateichii kada takumpii mpounii Jisu zei kito Damaskas sazyii kito sangtingsii kabi rasam tam ralipyiipo katu tei ahnyii dakii tiigatpii tampyii takle.

²⁸ Sateichii bangpii zei kito sakhyii bisii kabi rasam tam ralipyiisii, Jerosalem ki tatpat tatliitsii mpounii ahnyiigo kaswisii bam takle.

²⁹ Sateichii mpounii Grik lat katii Jehudimei go tampyiile ninado sam kajyiile, nlenii ahnyiinii mpougo gitang karam jangpii tiitu takle.

³⁰ Sateichii kamalum mei kangsa- nameinii tei tei tigong sek-kii, mpougo Kaisariya sazyii kikii pang patsii Tarsas kikii langtoi aitakle.

³¹ Teitinglang kak Judiya, Galili ninado Samariya hangki rangii kamatei paito charsh hang go tiimakhii pyiisanii kamajung tei dou wole; sateichii Bangpii go sadzyii ngariit katii kito ninado rangii kamatei mah jumage kapyii kito meilui moibuibui pat tutakle.

Pitarnii Litda ninado Jopa ki

³² Toinii Pitarnii bamlyii hangki tatsii tatsanii Litda kito kalei kamalum meida teido tatliit takle.

³³ Sateichii teibam kiteito zei Ananiyas sii kalat tingkum siisat katang zyiigamto zyiisii kalei, apum pei taisii kalei sapfiimei hangniniigo mpounii kadou wotakle.

³⁴ Teito Pi- tarnii mpou dakii tamle, “Ananiyas, Jisu Kristanii n-go tii mbipyii takle, gungtu sat tosii go-zyii tiiwolo.” Tei- sek-kii mpounii gungtu sat totakle.

³⁵ Sateichii Litda ninado Saron kito kalei mei hangnii mpougo ngou wotakle sateichii ahnyiinii Bang- piida ngaryii gong takle.

³⁶ Sateichii Jopa kito zei Tabitha sii kalat, kadat mpat sek-kii Dorkas sii kalatpei sapwimei boumei mei hangninii bamle, sapwi mpei ainii taksupii tiikalei hangtei tha kabipii ninado lungsyii lungset kati piinii tokryiile.

³⁷ Sateichii tei tinglang hang lungki teito, sapwi mpei teinii ranisii taitakle; sateichii ahnyiinii mpoupei gotei pangpatsii, aki shang kasagoipii ki teikii kai aitakle.

³⁸ Teito Litda nam tei Jopa nam kuto manangsii kabam taiswisii Boumei teinii Pitar tei teiki leile katu tei shiiwosii, “Lungsyiisii nyiida gongliit pyiitang karam risei sulo” sii mpou dakii tam matutang karam jangpii sapfiimei hangna mpou dakii lang matutakle.

³⁹ Teito Pitarnii tusat tosii ahnyiigo kaswisii tat tutakle. Sateichii mpounii teiki tei gongliit takle sek-kii, ahnyiinii mpougo ki shang kasagoipii kitei pangtu takle. Sateichii kamipwimei hangteinii hatsii hatsii, Dorkasnii ahnyiigo kaswisii lungkalei kak peijou ninado kaki kaki peimani sarui kapyii hangtei mangousii mpou dato sat takle.

⁴⁰ Nlenii Pitarnii ahnyiihang go tat matusanii, kok kum wosii riitale, sateichii katai pum datei ngaryii gongsii mpounii tamle, “Tabi- tha, gungtu wolo!” Teito mpoupeinii mik rak wotakle sateichii Pitar go ngou wosek-kii, gungtusii bam wotakle.

⁴¹ Teito Pitarnii mpoupei go bahpii chyii matu masatpyii takle sateichii kamalum meigo ninado kamipwimei hang go lat tosii mpoupeigo ringsii dou malu takle.

⁴² Sateichii Jopa sazyii kito kaleimei hangnii tei tei tigong sek-kii mei- hangnii Bangpiigo malum wotakle.

⁴³ Sateichii Pitarnii Simon sii kalat tiigyiitha tiisii kaleimei hangniniigo kaswisii Jopa ki tinglang kathangkii bamle.