TIILAMLWI KAPYIIMEI THA JUKAMATI 8 - KARANU KABI SAMTAM

¹ Sateichii mpougo kagi tei Solnii ahnyiigo kaswisii mazhiitakle.

Solnii Kristenmei go tiikamage katu

² Sateichii teipiinei leimik tei Jerosalem kito Charsh phyiiryiikii hangkapii tiikamage katu tei pat takle; teiki teito Tiilamlwi kapyiimei teisupiinii, ahnyii hang Judiya ninado Samariya sazyii hang kito pak marou maruk aitakle. Sateichii kasang katiimei sapfiimei kangkanii Stifan go poigoi pyiisii mpou jangpiinii rok sagoisii mageesii hatle.

³ Nlenii Solnii ki hang kitei liitsii sapwimei sapfiimei hang go chyii mpatsii kabang kikii kaisii meihang gotei tiikamage pyiile.

Samariya kikii kabi rasam tam ralikapyii

⁴ Sateichii tat marou maruktu kaleimei hang teinii kabi rasam tei tamsii tamsii bamlyiihang ki tat tutakle.

⁵ Sateichii Filipnii Samariya mah namdi kitei liit tosii ahnyii dakii Krista go tam mati mangoupyiile.

⁶ Sateichii meihangnii Filip mah samtam tei shiiwo sek-kii, sateichii mpounii tiikalu tiikamangou hang tei ngou wosek-kii, mpounii tam kalei gotei ahnyiinii lungswi hangninii tiisii lukai wole.

⁷ Kadapokii kashyii rangii hangteinii rok sagoisii saasii tatpat totakle; sateichii pum pei taisii kaleimei mak-kii pi katwimei hang go tii mbipyii takle;

⁸ Teipiinii namdi teiki teito hangkapii nta tutakle.

⁹ Nlenii teiki namdi ki teito ndou kamadat mahai katei jumsii kalei; Simon sii kalat sapfiimei hangninii bamle, sateichii mpounii mpou roinapii kadimei hangniniilesii Sa- mariyamei hang go sung tiimaga tiimaga leile.

¹⁰ Mpougo ahnyii- nahmei kacheng sekto kadi katangpii meihangnii lung liit gatsii tamle, “Mei aipou ai kadi kathangsii kalat sara mah teimaham teile.”

¹¹ Sateichii mpounii mpou mah kamadat mahai katii teipiinii ahnyiigo tinglang ka- tangkii asung tiikamaga jangteipiinii ahnyii dakii lung liitsii bamle.

¹² Nlenii Filipnii Saraa mah sating sazyii ninado Jisu Krista mah zei kito kabi rasam tam ralikapyii tei ahnyiinii malum wosek-kii, sapwi- meido sapfiimeido ahnyii hang dwi mpum wotakle.

¹³ Teito Simon ka- tangpiinado malum wosii, dwi mpum wosii, Filipgo taksupii kaswile, sateichii tiikamangou hang ninado tha kadi mei tiiwo kalak tha hang pat kalei tei ngou wosii mpounii madat takle.

Pitar nei Jon-nii Samariya sazyiiki katat

¹⁴ Sateichii Samariya kito kaleimeinii Saraa mah samtei lukai wotakle katu tei Jerosalem kito kalei tiilamlwi kapyiimei hangnii shiiwo sek-kii, ahnyiinii Pitar nei Jon go ahnyii dakii lang magongpyiile.

¹⁵ Mpoupiinanii tatliit sek-kii, ahnyiinii rangii kamatei doumatu tang karam jangpii riitakai pyiitakle.

¹⁶ Kadapokii rangii kamatei teinii ahnyii mei hangninii phyiiryii kado reisii humpyii makle, nlenii Bangpii Jisu zei kito ahnyiigo dwi mpum kapyii tei roile.

¹⁷ Tei tinglang kaktei ahnyii phyiiryiikii ahnyiinii bah kaipyii takle, sateichii ahnyiinii rangii kamatei dou wole.

¹⁸ Sateichii tiilamlwi kapyiimei bah kaikapyii kak rangii kamatei tei pyiitakle katu Simonnii ngou wosek-kii, mpounii ahnyii dakii sana pyiisii tamle,

¹⁹ “Inii mei kata hang- ninii gamkii bah poikaipii sekchii ahnii rangii kamateigo dou wokabui mah teimaham ai n-gudo pyiiseilo.”

²⁰ Nlenii Pitarnii tamle, “Go sana tei n-go kaswisii gamatulo, kadapokii Saraa mah luha kapyii gotei sanapiinii lyiiwo builesii nangnii maningle.

²¹ Atha aiki aito go njai mak-kii golangh samah kado gale, kadapokii golung matei makle.

²² Teijangpii gomah kashyii aiki aito lung kaliwolo sateichii golung ma- ningma kalei kiteito kaleipyii matu tang karam jangpii Bangpii dakii riitalo.

²³ Kadapokii nangnii kashyii lungswi kito sateichii kanat mah ajai kasu kataam karaam kito leile katu tei Inii ngoule.”

²⁴ Teito Simonnii khekalatle, “Gonyiinii tam kalei tei hangninii kado guphyiiryii gong kasu tiisii, gujangpii gonyiinii Bangpii dakii riita khangpyiilo.”

²⁵ Aitiisii ahnyiinii Bangpii mah sam tam tei tiigatpii sakchyii tiisii tampyii aisii, Samariyamei mah nam namki tei liitsii kabi rasam tamsii tamsii Jerosalem ki nlai gongle.

Filip ninado Ithopiya ki kadimei

²⁶ Nlenii Bangpii mah Sating gamluinii Filip dakii tamle, “Tusat tolo sateichii Jerosalem kito Gaza katang tat kaliit pwidi teikito lamka lam pangtei tat tulo; ai mahpwizyii sazyii pwidile.” (tingneishangnii pwidi ai mei tat lei sutakle.)

²⁷ teito mpounii tusat tosii tat tutakle; sateichii julo, Ithopiyamei tiikatu sapfii mpou, Ithopiyamei mah sagong nou Kandaseh mah seh sana hang phyiiryiito sangkaleipii, kadipii tei- nii Jerosalem ki Saraago mata tang karam jangpii tat leile;

²⁸ sateichii mpounii nlaigong tang karam jangpii mpou mah takoi garyii gam bamsii lungkakalingpii Isaiya mah larek tei fiisii bamle.

²⁹ Sateichii rangiinii Filip dakii tamle, “Ada khiiwosii takoi garyii aigo kaswi wolo.”

³⁰ Teito Filip nii mpou da tatliit manangsanii mpounii Lungkakalingpii Isaiya mah larek fiikalei tei shiiwosii tamle, “Nangnii fiikalei tei ti timakpo?”

³¹ Teito mpounii tamle, “Mei kata hangninanii n-gu tampyii suleponii, Inii kada takumpiinii tiwo tangpo? Teito mpounii Filip go: aigam tuwosii n-gu kaswisii bamseilo,” sii tam takle.

³² Sateichii mpounii fiikalei kabi rasam tei aile: “Jao go gitang karam jangpii chyiitat kalei takumpii mak-kii Jaonahnii mpou mai taitoi tang karampii doiteito nra kasu takumpiinii, mpounii mpou mwi n-gapat makle.

³³ Mpounii lung kamanoi jangpiinii mpou mah samtak katii tei poitoi takle, mpoumah atat areng go tanii tam wobuipo? Kadaponii mpou tiilung tei sazyii pouryiito poimatu tutakle.”

³⁴ Teito Ithopiyamei mi katupii sapfii mpou teinii Filip dakii khe- kalatle, “N-gu tampyiilo, Lungkaka- lingmeinii sam ai tago tam leipo? Mpou khang kito tamlei manii mak-kii mei kata hangninii mah kaang kito tamleipo?”

³⁵ Teito Filipnii mwi kokga patsii, kabi rasam aikito haosii Jisu mah kabi rasam tei mpou dakii tam ralipyiitu takle.

³⁶ Sateichii ahnyiinii aitiisii pwidi lamto tatleibangpii dwi kalei nitei gong wotakle; teito Ithopiyamei mi katupii teinii tamle, “Julo, aiki dwi lei takle, n-gu dwi mpumpyii tang karam kito kadapei kadang leipo?”

³⁷ (Teito Filipnii tamle, Golung matum madum haisii malum takle leponii mazhiile, teito mpounii khekalatle, Saraa nah sapfii mpou tei Jisu Kristale katu Inii malumle.)

³⁸ Teito mpounii takoi garyii tei sat tang karam jangpii kakhat takle, ninado Filipdo Ithopiyamei mi katupiido mpoupiinanii dwi kalei nitei hum wosii, mpounii mpougo dwi mpumpyii takle.

³⁹ Sateichii ahnyii- nii dwi kiteito pat sek-kii, Bangpii mah rangii teinii Filip go poisii tat tutakle sateichii Ithopiyamei mi katupii sapfii mpou teinii mpougo ngouloi sutakle; kadapochiinii mpou- nii nta ntasii tat tutakle.

⁴⁰ Nlenii Filip go Azotas kikii ngoutakle sateichii mpounii Kaisariya ki gongliit tang kasuta tei namdi hangki maasii kabi rasam tei tam ralipyiile.