TIILAMLWI KAPYIIMEI THA JUKAMATI 5 - KARANU KABI SAMTAM

Ananiyas nei Safira

¹ Nlenii Ananiyas katupii sapfii mpou tei mpou nou Safira go kaswisii mpou ki mah mahbam hangninii joi wotakle.

² Sateichii mpou nou niido tisii, mpounii joikalu teimah kito njai hangninii poigongsii Tiilamlwi kapyiimei dakii pyiitakle.

³ Pitarnii mpou dakii tamle, “Ana- niyas, nangnii rangii kamatei dato choitang karam jangpii, sateichii joikalu teimah amai kiteito njai hangninii poi kabai wotang karam jangpii, seitannii golungto kada- jangpii tokryiisii bam takpo?

⁴ Teitei joitoi supiinii kabam kaktei gomah makpo? Sateichii teitei joitoi kaleitai, teimah teido nangnii kamaning tiilakpo? Teitiileponii, tei kakum tha tei tiitanglesii dajangpii golung kito sat takpo? Nangnii meinah dakii choimakle nlenii Saraa dakiile.”

⁵ Ananiyasnii, tam kalei sam hang ai shii wosek-kii, koumang tai takle, sateichii teitei shii kalumei hang teinii hangkapii khiipat takle.

⁶ Teito rahangmeinah kangkanii gungtu wosii mpougo apeipii kajyii wosii, poipat tiigoi aitakle.

⁷ Sateichii pung tumkii sousek-kii, pat kalei tei tisupiinii, mpou nou teinii tatliitle;

⁸ teito Pitarnii mpoupei dakii tamle, “N-gu tampyiilo, goki meinii mah joikalu kiteito doukalu sana tei airoipo? Teito mpoupeinii tamle,” “Nle,” teiteipii ahangle.

⁹ Nlenii Pitarnii mpoupei dakii tamle, “Bangpii mah rangii go jai jutang karam jangpii goki meinii kaswisii mazhii kalu ai kadajang- piipo? Julo, gonaa go tiikagoimei pi tei ki takam ku leitakle, sateichii ahnyiinii n-godo poipat tangle.”

¹⁰ Sateichii tei tinglang sek teikii mpoupeinii Pitar pibang koumang taitakle, sateichii rahangmeinah teinii tatliit sek-kii mpoupei tei taisii kabam tei ngoutakle, teito ahnyiinii mpoupeigo kasi poipatsii mpou naa kukii poigoi takle.

¹¹ Teito Charsh hangda ninado pat kalei ai shii kalumei hang dato hangkapii kahing tei pat takle.

Sung kaga ninado kamadat

¹² Sateichii Tiilamlwi kapyiimei bahpiinii meihang kak-kii sung kaga ninado kamadat hangkii tiipyii takle sateichii ahnyii meihangnii Solomon mah ki kamwi kiteito lungswi hang- ninii tiisii bamle.

¹³ Nlenii sabato kalei bemei teinii ahnyiigo kaswi makle, meihangnii ahnyiigo tam mbisii leikado.

¹⁴ Nlenii Bangpiigo kamalummei sapwimei sapfiimei hangkii kisii kisii meitei moibuibuitu takle;

¹⁵ Teijangpii Pitarnii tat kapat kak mpou khii katangdo mei kata kangkii phyiiryiikii lakpyii matutang karam jangpii katii kanhiimei hang go pwidi kadi kadi kikii kasi poi- patsii azyii gamkii sateichii kasing gamkii mazyii takle.

¹⁶ Sateichii Jerosalem mah sazyii lungkoi kiteito kalei namdi namdi kito mei hangniido katii kanhiimeigo sateichii sara kashyiinii kaswi kalei meihang go pang gongsii ndwi wotakle ninado ahnyiihang gotei tii mbipyii takle.

Samtak katii katingmei doikii Pitar nei Jon go nlailoisii pang kakhii

¹⁷ Nlenii kanat kanhii kajum Tingdimei ninado mpougo kaswi kalei meihang katunii, sadhu bemei hangteinii, nrungsii kamaimhiipii tokryii takle.

¹⁸ Ahnyiinii Tiilamlwi kapyiimei gotei jumwosii, kabang kikii kai aitakle.

¹⁹ Nlenii Bangpii mah sating gamlui teinii tinghumkii kabangki ki kamwi takam tei lattoi pyiisanii ahnyiigo pang mpatpyiisii tamle,

²⁰ “Tat tulo, sateichii gonyiinii Saraa kamaning kilungto satsii meihang dakii aimah karing sam hang ai tam pyiilo.”

²¹ Teito ahnyiinii ai shiiwo sek-kii, tingtangtuna Saraa kamaning kilung tatliitsii tam ralipyiile, nlenii kanat kanhii kajum Tingdimei ninado mpougo kaswi kaleimei teinii, gongsanii samtak katii katingmei hang go lat ndwi wosii ahnyiigo pangpat tang karam jangpii, kabang kikii lang matutakle.

²² Nlenii kadi kathangmei hangteinii gongkii ahnyiigo kabang kilungkii dousupii ahnyiinii nlaigongsii nha tei tam takle.

²³ “Kabang kitei mahlyii tiigatpii takam kabam ninado kabang ki kikamwi takam koikalei meihang teinii takam ku satsii koisii kabam tei nyiinii ngoule, nlenii kabang ki kikamwi takam laat sek- kii, kabang kilungtei nyiinii meigo kado ngou makle.”

²⁴ Sateichii Saraa kamaning kilungto kadipii ninado kanat kanhii kajum Tingdimei teinii sam ai shii wosek-kii, kadapei pat takposii lungnyii lunghousii bam takle.

²⁵ Teito mei hangninanii gong- sii ahnyii dakii tamle, “Julo, gonyiinii kabang kikii bang kabam sapfiimei hangteinii Saraa kamaning kilungto satsii meigo tam ralipyiisii bam takle.”

²⁶ Teito Saraa kamaning kilungto kadipii teinii kadi kathang- mei go kaswisii maa ahnyiigo jum pang gong takle, nlenii kalak kathai tei tiimakle, kadapokii meimoi teinii ahnyiigo kuitupii rot tutang karam gotei hingtakle.

²⁷ Sateichii ahnyiinii ahnyiigo pang gong sek-kii, samtak katii katingmei doi teikii pangkhii masat takle, sateichii kanat kanhii kajum Tingdipii teinii ahnyiigo n-nhiisii tamle,

²⁸ “Zei aikito ralipyii sulosii nyiinii gonyiigo tiigatpii kakhatpyii takle, sateichii julo, gonyiinii rali kapyii aipiinii Jerosalem bam hangki tokryiisek takle, ninado mei aipou mah zai ai nyii phyiiryiikii gonyiinii majou kainyiile.”

²⁹ Nlenii Pitar ninado Tiilamlwi kapyiimei teinii khekalatle, “Mei mah go sung Saraa mah kakhatsam gotei gonyiinii switangle.

³⁰ Gonyiinii ating gamkii kuikajusii gitoi kalei Jisu go nyii pwi nyii pfii mah Saraa teinii tiimaringpyii takle.

³¹ Isrel- meinah go lung kakali ninado kem tiimaga pyiitang karam jangpii, kaleikapyiipii ninado doimajang kapyiipii tiisii mpoubah ajiilam sek teipiinii poimakhii pyii takle.

³² Sateichii nyiinii aisam hang mah sakchyii teile, sateichii Saraanii mpou sam kaswimei hang dakii pyii kabam rangii kamatei teiniido sakchyiile.”

³³ Ahnyiinii ai ai shii wosek-kii, ahnyii lungtei deng takle ninado ahnyiigo ginyii takle.

³⁴ Nlenii samtak katii katingmei kak kiteito kabijai katiimei hangninanii, katunii Gamaliel katupii, meihangnii sadzyii ngariit katii ajai tingshang kati ojamei hangninanii tusat tosii, ahnyii gotei shangniikii jangpii ki kajangkii kaibamlosii kakhat takle.

³⁵ Teito mpounii ahnyii dakii tamle, “Isrelmeinah, gonyiinii ai meigo tiikalei ai tiigatpii maning gatlo.

³⁶ Kadapokii tinglang aidoito mpou- roinapiinii mei hangniniilesii Theodas nii pat takle, mpouda sapfiimei mei haimadaikii mpougo kaswi wole, nlenii mpougo gitoi aisek-kii, mpou sam kaswimei hangnii pak marousii mah kado tiiwosu takle.

³⁷ Aipoutai ai meilui kafii tinglang kak Galili mpfii Judas patsanii, mpoutai kaswimei chengniikii lat mpat tole; mpou taiga takle, sateichii mpou sam kaswimei hangteinii marou maruk ai takle.

³⁸ Sateichii aitoinii Inii gonyii dakii tam leile, aimeida aito gonyiinii mpaa wosii ahnyiigo mpat ailo; kadaponii maning kalei lungswi ai mak-kii tiikalei tha ai meinah dato leponii, ai ai gatutangle;

³⁹ nlenii Saraa datoleponii, gonyiinii ahnyiigo tiimagapei wolakle, Saraanii mazhii kasudo gonyiinii kadoutu tangle!”

⁴⁰ Teito mpounii katam tei ahnyiinii shii wosii ahnyiinii Tiilamlwi ka- pyiimei gotei lat maliit tosii ahnyiigo dat datpyiisii, Jisu zei kito tam matu kasu tiisii hungsii kakhat- pyiisanii, ahnyiigo mpat aitakle.

⁴¹ Teipiinii ahnyiinii Jisu zei kito ka-nrou ai doumajyii lesii ntasii samtak katii katingmei doiteito tatpat takle.

⁴² Sateichii ahnyiinii sating kata Saraa kamaning kilungto ninado ki kitei ahnyiinii Jisu ai Krista lesii kabi rasam katam ninado tam ralikapyii tei matou makle.