TIILAMLWI KAPYIIMEI THA JUKAMATI 27 - KARANU KABI SAMTAM

Polnii Romki maatang karam jangpii malyii gamto katat

¹ Sateichii nyiinii Itali ki maatang karam jangpii sat kalutai, ahnyiinii Pol go ninado kaki kaki kabang kikii bang kabam meigo sagong mah saryiimei mei hai pyiiryiito apum katiipii Juliya sii kalat mei hangninii dakii pyiitoi aitakle.

² Sateichii Asia bang kito kalei bam bamki hoile kajyii Adramittiya mah malyii hangninii ki tong wosii, nyiinii dwijai phyiiryiito tat tutakle; sateichii Thesolonika kito lung kalei Mesidoniya mei Aris- tarkasnii nyiigo kaswile.

³ Adoipiinei leimik tei nyiinii malyii hoisii Sidon ki gong takle, Juliyanii tiisamoupyii tang karam jangpii mpougo mpat pyiile.

⁴ Sateichii teikito dwijai phyiiryii tat kapat kak, tingkainii nyiigo dang kalu jangpii, nyiinii nsung tang karam jangpii Kaipras ki dwipii maguisii kabam sazyii kathang ki hoi gongle.

⁵ Sateichii Silisiya nei Pamphaliya doito kalei dwijai tei tat majupat tosii, nyiinii Laisiya kito kalei Mira ki gongtakle.

⁶ Teiki teito saryiimei hai phyiiryiito apum katiipii teinii Itali ki katang hoitang karam Alekjendriya mei mah malyii hangninii dou wosii, nyiigo malyii teigam tei tong malu wotakle.

⁷ Sateichii leimik kathangkii nyiinii hangnaniipii malyii hoi gongsii, Klidas doi tei kamage gatsii gong wosek-kii, tingkainii nyiigo adoilampang tatki matu kasu jangpii, Salmoni doi Kret ki dwipii maguisii kalei sazyii kathang kitei hoigong takle.

⁸ Sateichii kamage gatsii dwijai kutei hoigongsii, Laisiya namdiki kuto kalei ngoukabi malyii ka-ntakbam sii kalat bam hangninii ki nyiinii gong takle.

⁹ Sateichii tinglang hangkapii thaangsii bamtoi kaleitai, sateichii malot karyii tinglang tei tat maju katu taiswisii, malyii gamto katat tei aitoinii sadoi shyiigong sek-kii,

¹⁰ Polnii ahnyii dakii machyiilosii aitiisii tamle, julo, malyii gamki pung kalei mah sateichii malyii ai kaga roisupiinii nyii rangiido gatang takle katu Inii ngoutakle.

¹¹ Nlenii saryii- mei mei hai phyiiryiito apum katiipii teinii Polnii katam sam gotei sungnii malyii kalipii nei malyii garyii mah apumpii mah sam goteipou kisii malum takle.

¹² Sateichii malyii ka-ntakbam tei sataidou kabam bam bikasu jangpii mazhii leponii Phonex kitei gong wosii, teiki teito satei tinglang tei bam woleponii sii mei kamoikanii teibam kiteito dwijai phyiiryii hoipat tang karam jangpii sam rashii wotakle; Phonex katu bam teinii lamka lam pangto leimik kaliitlam sateichii lamryiilam pangto leimik kaliitlam pangkii aju karyiibamsii kalei Kret mah malyii ka-ntakbam hangniniile.

Dwijai phyiiryiito tingkai tingrot dwi

¹³ Sateichii lamka lamto ting- kainii gwibui buisii gwitu takle, sateichii ahnyii mah kamaning tei tiiwobui taklesii maningsii, malyii hoipatsii Kret mah dwijai kutei hoimanang gong takle.

¹⁴ Nlenii tinglang thang supii leimik kapat lamryii sii kalat hangkapii katei tingkai tingrot teinii dwipii maguisii kabam sazyii kathang kiteito gui- gong takle.

¹⁵ Sateichii malyii gotei jum wosii tingkai gotei dangpei lak sek-kii, teitiisii mpat aisii nyiigo gui- pongsii tat matu takle.

¹⁶ Sateichii Kaoda sii kalat dwipii maguisii kalei sazyii kathang kacheng hangniniiki pak gongsii, nyiinii malyii kacheng hangninii kamage gatsii jum wotakle.

¹⁷ Tei tei chyiimatu wosii ahnyiinii malyii tei rengpii pei magui takle, malyii teinii Libiya mah dwi- jaiku tei pakga leponii sii ahnyiinii kahing jangpii ahnyiinii malyii phyiiryiikii lamkabam peira tei chyiisanasii tingkaigo guipongsii tat matutakle.

¹⁸ Sateichii tingkai teinii nyiigo kisii tiikamage katu kito adoi- piinei leimik teinii mei kangkanii malyii lungkii pungkalei mah tei toi mpat tutakle.

¹⁹ Sateichii leimik hangtum kashang piinei teinii ahnyii bah sekpiinii malyii garyii mah anak tei toi mpat tutakle.

²⁰ Sateichii leimik kathangkii nyii phyiiryiikii leimikniido, sageiti niido vapyiisu sek-kii, sateichii katei tingkai tingrot teinii nyii phyiiryiito gomnei wosek-kii, aitoinii nyii ai ringtangle katu mah kamalum hangtei gatakle.

²¹ Sateichii tinglang leimik katangki mahingpitu sek-kii, tei tinglang kak Polnii ahnyii sumtei sat tosii tamle, “He kangsanamei, gonyiinii gusam swisii, Kret kiteito hoipat suleponii, kasoi ninado kaga ai kadoulakle.

²² Nlenii aitoinii Inii gonyiigo lung tiimage lak tang karam jangpii tam katwi leile; kadaponii malyii tei supiinii, gonyii kak kito mei hangninii kado tailakle.

²³ Kadaponii Inii mpou mei tiisii, sateichii mpou godo Inii nga ngasii kalei, Saraamah sating gamlui hangninanii ndazyii tinghum guda gong satsii tamle,

²⁴ hingsulo, Pol, nangnii sagong doi sat tang karam takle. Sateichii julo, nangnii kaswisii malyii gamto tongkalei meihang go Saraanii godakii pyiibam takle.

²⁵ Teijangpiinii kangsanamei, swi kamage sulo, kadaponii gudakii tam kabam takumpiinii pat tanglesii Inii Saraago malumle.

²⁶ Nlenii nyiihang dwipii magui kabam sazyii katangki gong tang takle.”

²⁷ Sateichii zangriisii madai nkhii kashang piinei tinghum tei Adriya dwijai kito nyiigo pungpat pungliitsii leibangpii, tinghum asum kakum doukii, malyii garyii hoikalei meinii sazyii katangki nagong leitakle sii maning takle.

²⁸ Teito ahnyiinii dwi tei raojukii kat makai kathok tei doutakle; sateichii chengniikii tatpatsii nlailoisii adwi tei raojukii ahnyiinii kat keariisiimangii nkhii katuk tei doutakle.

²⁹ Sateichii nyiigo kuitu kadi gamki hoimakhii rot kaleigo hingsii ahnyiinii malyii kahoi nito sarangh mwigok pak madai toikaisii, tingva liit tang karam jangpii riitasii bamle.

³⁰ Sateichii malyii kahoimeinii malyii kacheng gamto malyii kahoi ting poi mpat tang karam jai tiisii malyii kacheng tei poi mpatsii malyii kiteito pakga lesii tiileibangpii,

³¹ Polnii saryiimei mei hai phyiiryiito aphyii kasatpii dakii sateichii saryii katiimei dakii tamle, “Ahnyiinii malyii lungto bam suleponii gonyiigo keipyiipei wolakle.”

³² Teitinglangki saryii katiimei teinii malyii kacheng mah rengtei tat ndangsii, teitei mpat aitakle.

³³ Sateichii tingva liit tuna Polnii ahnyii meihang go mah chengniikii chiilosii tamle, mpounii tamle, “Tingnei leimik keariisiimadai nkhii gonyiinii koisii samah kado chiisupii mahingpii takle.

³⁴ Teijangpiinii mah cheng chengna chiitang karam jang- pii Inii gonyiigo tam leile; kadaponii ai gonyiimah rangii bikabui jang- piiniile, kadapokii gonyii phyiigamto tham pak kado maga lakle.”

³⁵ Sateichii mpounii ai ai tamsii, tiirok tei poisii meihang doito Saraago hakalang tei tamsii, teitei tiirak wosii chiitu takle.

³⁶ Teito meihang teinii lung samousii ahnyii sekpiiniido chii wotakle.

³⁷ (Sateichii malyii lungtei nyii meihangpii mei haina reksanasii siiruk nkhiile.)

³⁸ Sateichii ahnyiinii chiisaat wosek- kii, dwijai kikii gihu tei toikaisii malyii tei tiimatangtu takle.

Malyii nkak katu

³⁹ Sateichii tingtang sek-kii, ahnyiinii sazyii tei tisutakle; nlenii atusakhyii khyiina kabam dwinii nlai katu dwijaiku bam hangninii ngoule; teiki teikii mazhii leponii malyii tei matou lesii ahnyiinii sam karashiile.

⁴⁰ Sateichii Sarangh mwi hangtei toikai aisii dwijai kikii kaitakle; teitinglang ki sek-kii ahnyiinii malyii rakchego poi ndwi kabam rengtei hek mpat aitakle. Sateichii adoilamkii lam kabam peira tei tingkailam pangkii chyii- makhiisii, ahnyiinii atusakhyii khyiina phyiiryiikii masat tang karam jangpii tiile.

⁴¹ Sateichii dwijai hangna kadou katu nitei liit sek-kii, malyii tei kangnengki pakliit takle; sateichii malyii tei maineisii nlaipat wolak takle, nlenii malyii teilam pang teinii tingkai tingrot kashyii teipiinii tiipakchet chet toi aitakle.

⁴² Sateichii kabang ki kabam mei kangkanii dwi laksii pakga tangle katupii ahnyiigo girang ailesii saryii katiimei teinii sam rashii wotakle.

⁴³ Nlenii Polgo keipyii nyiisii saryiimei mei hai phyiiryiito aphyii kasatpii teinii ahnyiimah rashii kalu samtei nam aitakle; sateichii dwi lak pat kabuimei teinii malyii kito sokpatrei wosii, sazyii kathang ki kaapat malulo katupii tam kakhat- pyii takle.

⁴⁴ Sateichii kamasakmei teinii, mei kangkanii malam phyii- ryiito, sateichii kangkanii malyii mah katwi ka-ndang gamto kaapat matulo sii mazhiipyii takle. Sateichii aitiisanii nyiimei hangnii sazyii kathang gam kaapat tosii keikapyii tei dou wole.