TIILAMLWI KAPYIIMEI THA JUKAMATI 25 - KARANU KABI SAMTAM

Polgo Festas doito samtak katii

¹ Toinii Festasnii mpou sazyiiki gongsanii leimik hangtumtai Kaisariya kito Jerosalem ki tatpi takle.

² Teito kanat kanhii kajum Tingdimei ninado Jehudimei kito apum katiimei hangnii Pol phyii- ryiikii tam mashyiisii mpou dakii sam tamle,

³ Sateichii pwidi lamto mpougo makumpiinii gitoi tang karam jangpii mpougo Jerosalem kikii lat mpisei matu tang karam jangpii Festas dato ahnyiinii tiihalosii khangle.

⁴ Nlenii Polgo Kaisariya kikii bang bamle sateichii mpou pumsekdo thang supii teiki tei gong tanglesii Felixnii khekalatle.

⁵ “Teijangpiinii gonyii kak kito gonyii mei pumtei kajum meinii n-gu kaswisii tatsii sapfii mpou teipou phyiiryiikii tam mashyii kanyii lei lepochiinii, gonyiinii tei kito tamlo” sii mpounii tam takle.

⁶ Sateichii mpounii ahnyii kak kito leimik siisat mak-kii leimik kearii sung kisupii bamsanii Kaisa- riya ki katang tatliitsii supounei leimik tei mpounii samtak katii bam kitei bamsanii, Polgo pangpat matutang karam jangpii kakhat takle.

⁷ Sateichii mpounii pat sek-kii, Jerosalem kito kahum Jehudimei hangteinii mpou kuto sat maguisii, malum kabui kasang teinii pyiipei laksii, jumtang karam sam kahung kahung tam kamashyii sam hangkii poi mpat takle.

⁸ Polnii mpougo dang tang karam sam katam tei aile: “Jehudimei mah ajaitingshang phyiiryii kado, Saraa kamaning ki phyiiryii kado, Kaisar phyiiryii kado, Inii samah kado tiima makle.”

⁹ Nlenii Festasnii Jehudimei moi doi teito kabi tei dounyiisii, Polgo tamle, “Nangnii Jerosalem ki tatpisii sam aimah kaang kito teikito gudoito samtak tiinyii makpo?”

¹⁰ Polnii tamle, “N-gu samtak tiitang karam bam Kaisariya mah samtak katii bam doito I-sat leile, Jehudimei dakii Inii kama tiikabam samah kado gale katu nangniido tiigatpii titakle.

¹¹ Nlenii Inii tiima aitak dinchii sateichii Inii tai kamajyii tha tiibamle lepochiinii Inii katai kito nlek tang karam gale; nlenii mei aimeinii guphyiiryiikii tam mashyii kalei hang kito kasang hangninii kado gale lepochiinii, mei kaniido n-gu ahnyii dakii pyiipei wolakle, Inii Kaisar dato riita leile.”

¹² Sateichii Festasnii samtak katii katingmeigo sam karashii wosii khekalatle, “Nangnii Kaisar dato riita takle, nang Kaisarda tat tang karam takle.”

Polnii Agripa ninado Barnis doi kasat

¹³ Sateichii leimik shangniikii bam sek-kii, sagong Agripa nei Barnisnii Kaisariya ki gong takle ninado Festas go mata takle.

¹⁴ Sateichii ahnyiinii teibam kiteito leimik kathangkii bampi sek-kii, Pol mah rasam tei sagong doikii tam takle. “Felixnii jumsii kabang kikii kai kabam sapfiimei hangninii leile.

¹⁵ Sateichii Inii Jerosalem kito bam kalei tinglang kaktei sapfii mpou aipou mah kaang kito kanat kanhii kajum Tingdimei hangnii sateichii Jehudimei mah samtak katii katingmeinii mpou phyiiryiikii kama lwikai pyiilosii gudato khangle.

¹⁶ Nlenii Inii ahnyiigo khekalatle, katunii, tam kamashyii doukalu mei teinii tam kamashyii gotei ju kadousii mpou phyiiryiikii tam mashyii kabam teisam kaang kito mpounii mpou go dang tang karam tinglang tei dou kasunakii, mei go pyii katoi ai Rom kito kalei mei mah ajaitingshang makle.

¹⁷ Sateichii ahnyiinii aiki gong wosek-kii, Inii tinglang tei tiikadak supii supounei leimik sek-kii, Inii samtak katiibam nitei bamsanii mei sapfii mpou gotei pangliit losii mwija pyiitakle.

¹⁸ Teito mpougo tam kamashyii mei tei tusat takle, nlenii ahnyiinii tam tang manasii Inii kamaning tei ahnyiinii mpougo samah kashyii kahung kado tam sutakle.

¹⁹ Nlenii ahnyii mah kanat kanhii mah kaang kito sateichii ringziile sii Polnii katam tai kalei Jisu (sii kalat mei hangninii) mpou kaang kito ahnyiinii mpou phyiiryiikii siiset pat takle.

²⁰ Sateichii siiset aikaang kito kada takumpiinii n-nhiitangpo sii Inii maningsanii mpounii Jerosalem ki tatpisii, sam ai kaang kito samtak tiimatunyii makposii n-nhiile.

²¹ Nlenii Polnii sagong samtak tei shiitang karam jangpii mpougo saryiimeinii koipyii matulosii kakhang kito Inii mpougo Kaisariya kikii lang mpat kasuta saryiimei kaisii jusii mbam tang karam jangpii mwija pyiitakle.”

²² Teito sagong Agripanii Festas dakii tamle, “Gupum sekpiiniido mei aipou mah sam ai shiikainyiile,” sii mpounii tamle. “Supounei, nangnii mpou mah samtei shiitangle.”

²³ Teijangpii supounei leimik tei Agripa nei Barnisnii digatsii gong saryiimei thang phyiiryiito aphyii kasatmeigo sateichii namdikito apum katiimei hang go kaswisii sam shiitang karam bam kitei tatliit sek-kii, Festasnii mwija pyiisii Polgo pangliit takle.

²⁴ Sateichii Festasnii tamle, “sagong Agripa ninado nyiigo kaswisii aikito kaleimei hang, gonyii- nii sapfii mpou aipougo ngoutakle, mpou kaang kito mpounii ringkajyii maklesii saasii Jerosalem kitodo aiki todo Jehudimei hangnii gudato khangle.

²⁵ Nlenii mpounii tai kamajyii tha samah kado tiimakle katu tei Inii doutakle sateichii mpou pum sekpiinii sagong dato samtak katii kakhang taiswisii mpougo Inii lang mpat tang taklesii sat totakle.

²⁶ Mpou mah kaang kito gu Bangpii dakii Inii ryii pyiitang karam sat kalu samah kado gale. Teijangpiinii n-nhiitak lepokii, Inii ryii kabui tei dou kabwi jangpii gonyii doikii sateichii he Sagong Agripa, arou tiisii godoikii pang gong leile.

²⁷ Kadaponii kabang kikii bang kabam mei hangniniigo mpou phyiiryiikii tam mashyii kabam hang tei tiigatpii mangou supiinii langtoi tang karam ai gudato kaang kaga takumtu takle.”