TIILAMLWI KAPYIIMEI THA JUKAMATI 23 - KARANU KABI SAMTAM

¹ Teito Polnii samtak katii katingmeigo ju kalingsii tamle, “Kangsanamei! Inii tingnei katangpii Saraa doito lung mateisii lungpi leile.”

² Sateichii kanat kanhii kajum Tingditupii Ananiyasnii mpou mwi- tei datlosii kuto sat kaleimei dakii kakhatpyiile.

³ Teitinglang ki Polnii mpou dakii tamle, he kahapii manuk kabam mbaang, “N-go Saraanii lak tangle! Nangnii ajaitingshang taiswi- sii n-gu samtak tiitang karam jangpii bamsanii, ajaitingsang kasupii n-gu datlosii mwija pyii leipo?”

⁴ Sateichii kuto sat kaleimeinii tamle, “Saraa mah kanat kanhii kajum Tingditupiigo nangnii n-gileipo?”

⁵ Teito Polnii tamle, “Kangsanamei, mpou ai kanat kanhii kajum Tingdi- tupii le katu Inii timakle, kadaponii aitiisii ryiibamle, ‘nangnii gomei mah apum katiimei hangniniigo tam mashyiilakle.’ ”

⁶ Nlenii mei ndwi lamkanii sadhu- mei sateichii mei ndwi lamkanii Farasismeile katu tei Polnii tiwosek- kii, samtak katii katingmei doikii mpounii saa mpatle, Kangsanamei, Inii Farasismei nah sapfiimei hang- niniile, kataimei hangnii ringkhii tangle katu maning kamalum jangpii n-gu samtak tiileile.

⁷ Sateichii mpounii aitiisii tam sek-kii Farasismei ninado sadhumei hang kak kito atei kasoutu takle, sateichii meihang ndwi tei njaipak aitakle.

⁸ Kadapokii ringkakhiido sating gamlui ninado rangiido galesii sadhumeinanii tamle, nlenii Fara- sismei-nanii ai hangtum ai leilesii tamle.

⁹ Teito hangkapii koi nrung pat tutakle sateichii Farasismei ndwilam pang kahaimei ajaiting- shang katimei kangkanii gungtu satsii sampii kajyiitu takle, “Nyiinii mei aipou gamto kashyii samah kado doumakle. Tanii titang mpou dakii rangii hangninanii mak-kii sating gamlui hangninanii karashii leikado malahle.”

¹⁰ Sateichii n-gi tei teisii kajyiipat tusek-kii, ahnyiinii Polgo datchet chet tudo malahlesii apum katii kadipii teinii hingsanii saryiimeinii hum mpougo ahnyiikak kito atei tiisii souwosii, sakui kikii pang kai ailosii kakhatpyii takle.

¹¹ Sateichii adoipiinei tinghum tei Bangpiinii kuto satsii mpou dakii tamle, “Lung dilo, kadapokii nangnii Jerosalem kito, gumah kaang kito sakchyii kapyii takumpiinii Rom kitodo nangnii tei takumpii sakchyii pyiitang karam takle.”

Jehudimeinii Polgo gitang taklesii rashii kalu

¹² Sateichii tingva liit sek-kii, Jehudimeinii makumpii karashii wosii ahnyiinii Polgo girang kasuta mah chiilakle, sakdo saklakle sii ahnyii roinapii riishii tiiwo takle.

¹³ Sateichii riishii tiikalu ai ahnyii mei rekdaisiikile.

¹⁴ Ahnyiinii kanat kanhii kajum Tingditupii ninado samtak katii katingmeida gongsii tamle, “Nyiinii Polgo girang kasuta samah kado maseilakle katupii nyiiroipii makumpii katei riishii tiiwo takle.

¹⁵ Teijangpiinii aitoi, gonyiinii mpou samtei kisii tiigatpii samtak tiitang karam jai tiisii gonyii dakii mpougo panghum matu tang karam jangpii samtak katii kating- meigo kaswisii Rom ki apum katii kadipii dakii matipyiilo; sateichii mpounii hum manang kasunakii, nyiinii mpougo gitang karam jangpii tiidabam takle.”

¹⁶ Nlenii Pol teipwi nah sapfii mpou teinii ahnyiinii mbeisii kalei tei shii wosek-kii mpounii gongsii sakui kilung tei liitsii Pol dakii tamle,

¹⁷ Teito Polnii saryiimei mei hai mah apum katiimei hangniniigo lat tosii tamle, “Ai nah sapfii mpou aigo pum katii kadipii dakii pangmaa pyiilo, mpounii mpou dakii sam tam mangou tang karam leile.”

¹⁸ Tei- jangpiinii mpounii ahgo pangsii pum katii kadipiida pang gongsii tamle, “Kabang kilungto kaleipii Polnii n-gu lat tosii ai nah sapfii mpou aigo godakii pangmaa pyiilosii tamle, kadapokii ahnii godakii sam tam mangou tang karam leile.”

¹⁹ Teito Romki pum katii kadipii teinii mpougo bah kajum wosanii lingkakii pangpatsii mpou dato makumpii n-nhiile, “Nangnii gudakii tam mangoutang karam kadapei leipo?”

²⁰ Teito mpounii tamle, “Jehudi- meinii mpou mah kaang kito kisii tiigatpii n-nhiitang karam jai tiisii Polgo supounei samtak katii kating- meida panghum matutang karam jangpii sat totakle.

²¹ Teijangpii nang ahnyii samtei swisei sulo, kadapokii ahnyii kak kito sapfiimei rekdai sung kaki mei ndwi hangninanii mpougo girang kasuta mahdo chiilakle, sakdo sak lakle sii ahnyii roinapiinii makumpii riishii tiiwosii mpougo shoisii leitakle; sateichii aitoinii ahnyiinii da tiisang wotakle.”

²² Teito apum katii kadipii teinii nah sapfii mpou gotei, “Nangnii samhang ai gudakii tam mati taklesii meida kado tam sulo” sii tam kakhatsii mpougo tat matu takle.

Polgo governor Felix dakii lang ka-mpat

²³ Sateichii saryiimei mei hai mah apum katiimei kak kito mei hangniniigo lat tosii tamle, “Tingnei tinghum pungtum kashang ting- langki Kaisariya ki katang tat tang karam jangpii saryiimei mei haina, takoigam katongmei reksana satei- chii angii kapoimei haina tiikada wolo.

²⁴ Sateichii Polgo takoi gam tong malu wosii governor Felixda katang kadok kadang gasii gongtang malu wotang karam jangpii, takoi hangtei tiikada wolo.”

²⁵ Sateichii mpounii ajai aitai swisii larek hangninii ryiiwo takle:

²⁶ “Klodius Lusiyas, teimaham kajumpii Governor Felix go Inii salam tiileile.

²⁷ Sapfii mpou aigo Jehudimeinii jum wosii, gitunakii mpou ai Romki meile katu tiwosii, gu saryiimeigo njasii ahnyii dato Inii mpougo kaleipyii takle.

²⁸ Sateichii ahnyiinii mpougo kadapei jangpii tam mashyii leipo katu akaang tei tinyiisii, Inii mpougo samtak katii katingmeida katangtei pang hum takle.

²⁹ Ahnyii mah ajaitingshang mah kaang kito sam kapat jangpii mpougo ahnyiinii tam mashyiile, nlenii kagi mak-kii kabang kikii bang kamajyii mah tam kamashyii sam samah kado galesii Inii doule.

³⁰ Sateichii sapfii mpou aipougo gitang karam jangpiinii makumpii tha tiikajyii leitangle katu ai gudakii tam mangou sek-kii, Inii mpougo tam kamashyiimei hang godo godoito gong mpou phyiiryiikii tam matulo katupii kakhat pyiisii mpougo godakii kapousii lang mpat leile.”

³¹ Teito Saryiimei teinii kakhat- sam taiswisii Polgo pangsii tinghumkii Antipas ki gong takle.

³² Sateichii supounei tei ahnyiinii takoigam katongmeigo mpounii kaswisii tat tang karam jangpii kaibamsanii sakuiki tei nlaigong takle.

³³ Ahnyii tei Kaisariya ki gongsek-kii, larek tei Governor dakii pyiisanii, Polgodo adoilam pangpat takle.

³⁴ Sateichii mpounii larek tei fii wosii, mpou ai kadaram meipo sii n-nhiile, sateichii mpou ai Silisiya kitole katu tei tiwosek-kii,

³⁵ n-go tam kama- shyiimei niido gongsanii, “Inii gosam tei tiigatpii shii tanglesii mpounii tam takle,” sateichii mpougo Herot mah sagong kilungto saryiimeinii koisii mbam tang karam jangpii kakhatpyii takle.