TIILAMLWI KAPYIIMEI THA JUKAMATI 11 - KARANU KABI SAMTAM

Jerosalem ki kalei Charsh kikii Pitarnii mati kapyii

¹ Sateichii lui kakimei teiniido Saraa mah kabi rasam tei dou wotakle, katu tei Tiilamlwi kapyii- mei hangnii ninado Judiya kito kalei kangsanamei hangnii shiiwo takle.

² Teijangpiinii Pitarnii Jerosalem ki tat kapi tinglang kak tiigyii malem kaleimei hangteinii mpougo tam mashyiisii tamle,

³ “Nangnii kada- jangpii tiigyii malem kasumeiki kalung liitsii ahnyiigo kaswisii mah chii sak njoi leipo?”

⁴ Nlenii Pitarnii ahnyii dakii adoidoi tiisii tam haotu takle.

⁵ “Inii Jopa namdi kito riitasii bamle, teiki teito binasek-kii ma- dhang kapyii hangninii n-gu mangoule, katunii mah kakaipot apeigum kadi hangninii takumpii humsii, kha madai tiisii sating gamto jung kahum tei Inii ngoule; sateichii teitei gudasek humtakle.

⁶ Tei gotei Inii tiigatpii jusii, swi maning mashak leibangpii, sazyii pouryii mah pi pimadai kapung kounah hang, saram kounah hang, sazyii moipii chyii karhiisii katat kounah hang, sateichii sating gam mah ruinah hangtei Inii ngoule.

⁷ Teito ‘Gungtu sat tolo’ Pitar, gisii chiilo sii katam rok hangninii Inii shiile.

⁸ Nlenii Inii tamle, ‘makle’ Bangpii, kadaponii kasaba mak-kii matei kasu pot tei Inii gu mwi kikii kaisang kailei makle.

⁹ Nlenii rok hangninii sating gamto hangna kashang tiisii humtakle, Saraanii tiimatei kalei gotei nangnii kasaba sii lat lakle.

¹⁰ Sateichii ai ai hangtum kashang tiisii pat takle, sateichii kalei kaga tei nlailoisii sating gamkii poimatu tutakle.

¹¹ Sateichii julo, teisek-kii Kaisariya kito gudakii lang ka-mpat sapfiimei hangtum teinii nyiinii bam kalei adoi teito sat takle.

¹² Sateichii rangiinii n-gu maning kariirhii gasii ahnyiigo kaswisii tat tulosii ma- zhiipyii takle. Sateichii kangsanamei saruknii n-gu kaswile sateichii nyii- nii sapfii mpou lupii kitei liit takle.

¹³ Teito mpounii kada takumpii ngou wopo katu tei nyii dakii tampyii takle, katunii, sating gamluinii mpou kalungto satsii tamle, Jopa kikii lang mpatsii, zei Pitar sii kalat Simon gotei pang wolo;

¹⁴ mpounii godakii sam tampyii tangle, sam mah paikito nangniido goki kalungmei hangniido keikapyii tei doutangle.

¹⁵ Sateichii Inii sam tam haotu sek kii, nyii phyiiryii kado ndou kareiki hum kapyii takumpiinii, rangii kamatei teinii ahnyii phyiiryii kado humpyii takle.

¹⁶ Sateichii Jon-nii dwi kito mpumpyii takle, nlenii gonyii gonii rangii kamateipii dwi mpumpyii tak- lesii Bangpiinii tam kabam samtei Inii mangai makle.

¹⁷ Teijangpiinii nyiinii Bangpii Jisu Krista go malum wosek-kii, Saraanii nyiida kado ahnyiidakiido njoi chak-thii katu satoi pyii takleponii I-tasii Saraago namwo tangpo?”

¹⁸ Teito ahnyiinii sam hang ai shiiwo sek-kii, malhii supiinii Saraa- go tam matoisii tamle, “Teitiileponii lui kakimei dado ringkabui jangpiinii lung kali matu katu Saraanii mazhiipyii takle.”

Antiyok ki charsh

¹⁹ Aitoinii Stifan go gikalei jangpiinii pak marou maruk kaleimei teinii Phonisiya ninado Kaipras, ninado Antiyok sazyii ki katang liitsii, Jehudimei dakii roinii samtei tam tutakle.

²⁰ Nlenii Kaipras ninado Sairen kito kalei mei kangkanii Antiyok ki gong wosii Grikmei dakiido Bangpii Jisu mah kabi rasam tei tam ralipyiitu takle.

²¹ Sateichii Bangpii bah tei ahnyiigo kaswi- pyiisii, malum kalumei hangteinii Bangpiida ngaryii gong wotakle,

²² aimah tingha ai Jerosalem kito kalei Kristanii lat kalumeihang khoi kito shiiwo sek-kii, ahnyiinii Bar- nabas go Antiyok kikii lang mpatle.

²³ Mpounii gongsii Saraa mah ka- lungset tei ngou wosii ntale, sateichii ahnyiihang go lung sangtingsii Bangpii dato taksupii bam matutang karam mpounii tam katwipyiile.

²⁴ Kadapokii mpou ai kabipii ninado rangii kamatei ninado kamalumpii tokryiisii kalei sapfiimei hangniniile, sateichii meimoinii Bangpiida gong mpam wotakle.

²⁵ Teito mpounii Solgo kaswi tang karam jangpii Tarsas ki tat tutakle.

²⁶ Sateichii mpounii ahgo kadou wosek-kii, Antiyok ki pang gongtakle, sateichii ahnyiinii tingkum hangninii katang tei Kristanii latkalumei hang go kaswisii hangninii tiisii ndwisii, meihang go tam ralipyiile, sateichii Antiyok kito Boumeigo karei reisang tiisii Kristen sii latle.

²⁷ Sateichii toinii ai tinglang aihang aiki aito Jerosalem kito Lung- kakalingmei Antiyok ki tatliitle.

²⁸ Sateichii ahnyii kak kito zei Agaba sii kalat mei hangninanii gungtu sat tosii, sazyii pouryii bamlyii hang kito tak kating gongtang takle katu tei rangii paikito tam mpat takle; sateichii ai ai Klodius haki aitiisii pat takle.

²⁹ Sateichii Judiya kito kalei kangsanameigo meihangpii mpou mpounii kangam taiswisii tiiha kamaga matutang karam jangpii boumei teinii raangsii maning wotakle.

³⁰ Ai ai ahnyiinii tiitakle sateichii Barnabas nei Sol bahpii teitei katingmei bah kikii mpot magongpyii aitakle.