3 JON 1 - KARANU KABI SAMTAM

¹ Kating tiisii kalei Inii kasang kito lungkasyii Gaiyas dakii ryii leile.

² Lungkasyii gukangpii, nangnii rangii lamto bisii bamle katu Inii kati takumpii, godato mahlyii hang bisii leimatu tang karam jangpii sateichii nangnii ra gasii leimatu tang karam jangpii Inii riitale.

³ Kadapokii nang- nii kasang tai swikalei takumpii, kangsanamei kangkanii gongsii gotiilung mah kasang kito sakchyii kapyii tinglang kak, Inii hangkapii nta takle.

⁴ Gunahmeinii kasang kito tat leile katu shii katu aidoito Inii kisii ka-nta tei gale.

Gaiyas go tam kamatoi

⁵ Lungkasyii gukangpii, nangnii kangsanamei dakii, routiisii juti kasu sabamei dakii tiikapyii kito ma- lum kabuita nangnii tiile;

⁶ ahnyiinii Charsh doito gomah lungkasyiimah sakchyii tei pyiitakle, Saraanii lungmang tang karam mah jairali kito, ahnyiimah mbui tiitat tei tatjou kabui tiisii lungsyiisii ahnyiigo tiihalo.

⁷ Kadapokii ahnyiinii malum kasumei dato tiikaha tei samah kado lusupii Krista jangpii ahnyiinii ahnyiimah mbui thiitat tei tatpat takle.

⁸ Teipiinii kasang kito tha tii njoi katumei tiitang karam jangpii, tei kakum meigo nyiinii tiiha tang karamle.

Deutripas ninado Deumitrios

⁹ Inii Charsh dakii chiti kadwi hangninii ryiitakle, nlenii ahnyii kak kito aphyiisat kanyii Deutripasnii Inii katam tei shiipyii makle.

¹⁰ Teipiinii Inii gongleponii, Mpounii tiikalei mpou tha tei Inii tam maningloi tangle. Mpounii nyii phyiiryiikii sam kashyii tamchet chetle, sateichii sam airoipiinanii shaat supii, mpounii kangsanameigo lukaipyii makle, lukai kanyiimei hang godo mpounii namle, sateichii ahnyiigo charsh kito baado baatoile.

¹¹ Lungkasyii gukangpii, kashyii jairali tei rali sulo, nlenii kabi jairali tei ralilo. Kabi katiimei hangtei Saraa mahle; Kashyii katiimei hang teinii Saraago ngou womakle.

¹² Meihangnii sateichii kasang sek teinii Deumitrios mah sakchyii pyiitakle, Iniido mpougo sakchyii pyiileile, sateichii gumah sakchyii ai kasangle katu nangnii tile.

Kaluimah salam

¹³ Inii godakii tamtang karam hangkii leile, nlenii Inii mukdwipii ninado kolompii ryiilak takle;

¹⁴ nlenii Inii n-go kalangsii kadou tangle katu maning malumle sateichii nyiinii ju kadousii rashii tangle.

¹⁵ Godato kamajung tei leimatulo, kangmei hangnii n-go salam pyiileile. Nyii kangmei hang go mei nsang nsang zei latsii salam pyiiseilo.