2 TIMOTHI 3 - KARANU KABI SAMTAM

Kashyii tinglang nakagong sam

¹ Nlenii kana tinglangki kashyii kahong tinglang gongtangle katu ai tiwolo,

² kadapokii meinahnii mpouroipii mpougo lungkasyii, sanahgo kamarei, palhii kadi, det kadi, meigo kalet kalou katii, pwi pfiinii katam swikasu, tiikapyii mai tikasu, mateikasu.

³ Meigo lungka- syii kaga, lungset kaga, kasang kasu kashyii sam katam, mpouroinapii mpoupumgo jum matwi kasu, kaika- shyii, kabigo ngou karou;

⁴ malumpei kalak, rumrumsii adok tiikasu, kashyii kahong swipii katokryii, Saraago lungkasyii sung pumzai mah kasamou go kisii kamarei.

⁵ Saraago kamaning jai kapoi, nlenii teimah teimahamgo mazhii kasu, tei kakum meihang dateito nlek wolo.

⁶ Kadaponii ahnyiihang aikak kito mei kangkanii kikilung tatliitsii kem mah kamaswi pungkalei ninado pumzaimah kamarei ka-ntha hang teipiinii chyiitatsii kalei,

⁷ ralipyii kado kasang tei madou kado tigong- pei kalak, kasui sapwimei hang go kajum mei leile.

⁸ Jens nei Jamresnii Moses go mazhii kasu takumpiinii lungto kasang gakalei kamalum kito mazhii kasu mei aimei ainiido kasang go mazhii sutakle.

⁹ Nlenii ahnyiinii thang lakle daponii ahnyii ai daziikapii swigapo katu tei meihangnii ngoutangle, Jens nei Jamres dato pat kalei tei teichiikok thiile.

Kalui kito ralikapyii sam

¹⁰ Nlenii gumah ralikapyii, gu jairali sateichii Gutiilung kito Inii mikleeng kalei gumah kamalum, gulung lum kati, gu mah lungkasyii, gumah lung leh kati;

¹¹ Gumah kaset kalak kapyii ninado tiikamage katuhang taitei nangnii swiwo takle; Antiyok kito Ikoniam kito sateichii Lustra kito gudato kada dapei pat takpo, kadaziikapii kaset kalak tei Inii leh takpo katu nangnii tile, Nlenii teihang kiteito Saraanii n-gu keipyiile.

¹² Krista Jisu dato Saraa kamaning tiilung lung kanyiimei hang gotei kaset kalak pyiisii tiikamage tangle,

¹³ Sateichii kashyii kahongmei sateichii ashoi katimei ahnyii roinapii ahnyiigo kasang kasu choisii hem wosii mei kakimeigo kasang kasu teipii choisii hemsii kashyii kiteito kisii kashyii kitei tatsii leitangle.

¹⁴ Nlenii gojangpiinii nangnii ralikalu sateichii sangtingsii malum kalu kasang hang kiteito tatsii leijoulo. gomah madhiikapyii mei tei tatapo katu nangnii tile.

¹⁵ Sateichii Krista Jisugo kamalum kito keikapyii karing kiteikii pang kagong n-go swirek kabi pyii kabui kamatei kabi rasam hangtei tiina kaleidouto nangnii titakle katu nangnii maning ziile.

¹⁶ Kabi rasam hang ai Saraanii chyii ngaikai pyiile sateichii Saraa nga kangamei hangnii kabi tha hang jangpiinii matwi mashangsii mahlyiihang tiida kabui tiisii.

¹⁷ Madhii pyiitang karam jangpii kama gotei n-gitang karam jangpii, tiimajyii pyiitang karam jangpii, sateichii kasang kamajyii tiilung lungtang karam mah kaang kito tiiralipyii tang karam jangpii ai bile.