2 TIMOTHI 1 - KARANU KABI SAMTAM

¹ Krista Jisu dato kalei karing mah riishii taiswisii, Saraanii kama- ning kamarei kito Krista Jisumah tiilamlwi kapyiimei hangninii tiisii kalei Polnii, Gumah lungkasyii gunah Timothi dakii: Krista dato kalei pyiitang lesii riishii tiikabam karing tei tam matilosii lang kai kabam Polnii–

² Lungkasyii gunah sapfii mpou Timothi dakii, nyii pfii Saraa sateichii nyii Bangpii Krista Jisunii n-go jumage kapyii, lungsyii kati sateichii kamajung tei pyii matulo.

Hakalang kapyii sateichii lung tiimadi kapyii

³ Gupei gupaomeinii tiikalei takumpii Inii lung mateisii nga ngakalei Saraago Inii halangle. Gumah kariita hangkito Inii n-go taksupii tinghum tingna maning kagong kak Inii mpougo halangle.

⁴ Inii Gomah mikdwi kahum tei maning gong sek-kii, tinghum tingna Inii n-go kadounyiisii bamle, kadapokii Inii ka-nta teipii tokryii kabui tiisii,

⁵ Godato kalei kasang kamalum tei Inii maning gongle, kamalum jaitiikasu ai kareiki gopei Luis ninado gopwi Unish dateito leile, sateichii aitoinii teitei godado leitakle katu Inii malumle.

⁶ Kaang aijangpii gubah poikai kapyii jangpii godato kalei Saraamah luha tei nangnii mi kashong takumpii shong matutang karam jangpii Inii n-go tam maning leile.

⁷ Kadapokii Saraanii nyii dakii kahingmah rangii tei pyii makle, nlenii teimaham mah, lungkasyiimah sateichii mpou roinapii mpoupum go jum matwi kabuimah rangii tei pyii takle.

⁸ Nyii Bangpii jangpiinii sakchyii kapyii tei nrou sulo mak-kii Krista jangpiinii kabangki kaleimei tiisii kalei gujangpii nrou sulo nlenii Saraamah teimaham taiswisii kabi rasam jangpii kamage kalak tei leh njoipyiilo.

⁹ Mpounii nyiigo keipyii takle sateichii kamatei kalat teipii nyiigo lat pyii takle, nyii tha taiswisii makle, nlenii mpoumah kamaning sateichii jumage kapyii taiswisii lat pyiile. Jumage kapyii ai ndou kareiki Krista Jisu paito mpounii nyiigo pyiitakle.

¹⁰ Nlenii aitoinii nyiigo kei- kapyiipii Krista Jisunii hum kapyii teipiinii mangoupyii takle, Mpounii katai gotei tii maga aisii kabi rasam paito karing ninado nlaikasu katai kaga tei kava kikii pung gongpyii takle.

¹¹ Kabi rasam aijangpii n-gu kabi rasam katam mei, tiilamlwi kapyii- mei ninado madhiikapyii mei tiilosii kalei wotakle.

¹² Sateichii kaang aihang jangpii kamage kalak hang ai Inii dousii leile, nlenii Inii aitoido maning kamalum teipii tokryiile, daponii Inii malum kalei mpougo Inii tile, sateichii mpounii gudakii pyiikabam tinglang leimik katang tei mpounii n-gu koipyii jupyii wobuile katu tei Inii malumle.

¹³ Krista Jisu dato kalei kamalum ninado lungka- syii kito, nangnii gudato shiikalu kabi samhang mah tiikamangou nda tei tiilo.

¹⁴ Nyiilung kito lungsii kalei rangii kamatei paikito gudakii pyii kabam kabi tei jum wolo.

¹⁵ Pugelao ninado Hormogenis haisii, Asia kito kaleimei hangnii gudato tat nrek poitu takle katu tei nangnii tile.

¹⁶ Abangpiinii Onisi- poraski kalung mpung go lungsyii pyii matulo; dapokii mpounii n-gu kamage kalak kito tii ntajat jat pyiisii n-gu kapai sagyiireng hang jangpii mpounii nroupyii makle.

¹⁷ Nlenii mpounii Romki gongsek-kii, mpounii lungliitsii n-gu fiisii dou- takle.

¹⁸ Teipiinei leimik mpounii Bangpii dato lungsyii kati tei dou wokabui tiisii Bangpiinii mpougo pyii matulo, sateichii mpounii Ipisas kito kadaziikapii moisii n-gu nga ngakapyii tei nangnii tiigatpii tile.