2 THESOLONIKAMEI 1 - KARANU KABI SAMTAM

¹ Pol, Sailas ninado Timothi dato nyii Pfii Saraa ninado Jisu Krista dato kalei Thesolonika kito kalei charsh dakii:

² Apfii Saraa ninado Bangpii Jisu Kristanii jumage kapyii ninado kamajung tei gonyiigo pyii matulo.

Kristanii kagongki samtak tiitang Karam

³ Kangsanamei, gonyii jangpii tinglang kaleita nyiinii Saraago hakalang tam tang karamle. Ai ai nyiinii tiimajyiile, kadaponii gonyii- mah kamalum tei hangkapii dikhiisii leile sateichii gonyiihang mei hang- ninanii hangniniigo kalungsyii katu tei dibuibuisii leitakle.

⁴ Teijangpii gonyiinii dousii kalei kamage kalak ninado kaset kalak hang kiteito gonyiimah lung kasangting lung leh kati ninado kamalum jangpii Saraamah charsh hang kito gonyii jangpii nyiinii detdisii leile.

⁵ Saraamah samtak tei kasangle katu tei ai hang ainii matile, katunii, gonyiinii Saraamah sating sazyii ki lung kabui tiitang karam jangpiile, teijangpii gonyiinii kamage kalaktei pung leile.

⁶ Kadapokii mi mishong kito mpoumah teimaham kadi sating gamlui hang go kaswisii sating gamto Bangpii Jisunii kagong kak,

⁷ gonyiigo kaset kalak doumatu katumeigo kamage kalak, sateichii kamage kalak doukaleimei gonyii dakii nyiigo kaswisii ka-ntak tei Saraanii pyii tangle,

⁸ tei tinglang kak Saraago mazhii kasumei ninado nyii Bangpii Jisumah kabi rasamgo swikasu meigo Saraanii powrui tangle.

^9-10 Bangpiinii mpoumah kamateimei hang dato tam kamatoi doutang karam, sateichii kamalum meihang teinii sung gamatu tang karam jangpii, (dapokii nyiinii gonyii dakii kapyii sakchyii tei gonyiinii malum wotakle,) mpounii kagong piinei, tei kakum meihang teinii kalui gasii tiikamaga mah kadwi karat sateichii Bangpii kalei nito sateichii mpoumah teimaham kadimah pumtei kava kiteito poitaam katu tei ahnyiinii doutangle.

¹¹ Saraanii gonyiigo lat kalu mah tiilung tai taiswisii gonyiinii lung matuiwo kabui jangpii, sateichii Saraanii mpou mah teimaham teipii gonyiinii kabi tha tiitang karam jangpii gonyiinii kamaning kamarei hangtei mpoumah teimahampii tiima- sang pyiisii gonyiimah kamalum mah tha tei tiimasang matu tang karam jangpii nyiinii tinglang kaleita gonyii jangpii riita leile.

¹² Katunii, kadapokii nyii Saraa ninado Bangpii Jisu Krista mah jumage kapyii taiswisii, gonyii dato nyii Bangpii Jisu Krista zeigo tam matoi tang karam ninado mpou dato gonyiigo tam matoi tang karam jangpiile.